అమరావతిలో బ్యాడ్మింటన్, క్రికెట్ అకాడమీలు

ఆంధ్రప్రదేశ్ రాజధాని అమరావతిని ప్రపంచస్థాయి నగరంగా తీర్చిదిద్దేలా ఏపీ ప్రభుత్వం ప్రణాళికలు రచిస్తోంది. ఈ క్రమంలోనే రాజధాని అమరావతి కోసం రెండో దశ భూసమీకరణకు సిద్ధమైంది. ఇందులో భాగంగా శనివారం జరిగిన 50వ సీఆర్డిఏ అథారిటీ సమావేశంలో పలు కీలక నిర్ణయాలు తీసుకున్నారు. ముఖ్యమంత్రి నారా చంద్రబాబు నాయుడు అధ్యక్షతన 50వ సీఆర్డీఏ అథారిటీ సమావేశం శనివారం జరిగింది. ఈ సమావేశంలో మొత్తం ఏడు అంశాలపై చర్చించి.. సీఆర్డీఏ అథారిటీ ఆమోదం తెలిపింది. అమరావతి రాజధాని పరిధిలో మరో 20,494 ఎకరాలు భూమిని సమీకరించాలనే ప్రతిపాదనకు సీఆర్డీఏ అథారిటీ ఆమోదం తెలిపింది. ఏయే గ్రామాలలో భూసమీకరణ చేయాలనే దానిపైనా ఓ నిర్ణయం తీసుకున్నారు.

పల్నాడు జిల్లాలోని వైకుంఠపురం, పెదమద్దూరు, యండ్రాయి, కార్లపూడిలేమల్లే గ్రామాలతో పాటుగా.. గుంటూరు జిల్లాలోని వడ్డమాను, హరిశ్చంద్రపురం, పెదపరిమి గ్రామాలలో భూ సమీకరణ చేసేందుకు సీఆర్డీఏ అథారిటీ ఆమోదం తెలిపింది. అమరావతిలో హైడెన్సిటీ రెసిడెన్షియల్ జోన్, మిశ్రమ అభివృద్ధి ప్రాజెక్టులకు ఆర్‌ఎఫ్‌పీ పిలిచేందుకు గ్రీన్ సిగ్నల్ ఇచ్చింది. మందడం, రాయపూడి, పిచుకలపాలెం గ్రామాల్లో ఫైనాన్స్ సిటీ, స్పోర్ట్స్ సిటీల్లోని 58 ఎకరాల్లో ఈ హైడెన్సిటీ రెసిడెన్షియల్ జోన్ నిర్మాణానికి ఆర్ఎఫ్‌పిని ఆహ్వానించేందుకు సీఆర్డీఏ అనుమతి ఇచ్చింది.

అమరావతిలో ఫైవ్ స్టార్ హోటళ్లకు సమీపంలో కన్వెన్షన్ సెంటర్ల నిర్మాణం కోసం చేసిన ప్రతిపాదనలకు సీఆర్డీఏ అథారిటీ పచ్చజెండా ఊపింది. మందడంలో వివాంతా, హిల్టన్ హోటల్స్, తుళ్లూరులో హయత్ రీజెన్సీ, లింగాయపాలెం నోవోటెల్ సమీపంలో ఈ కన్వెన్షన్ సెంటర్లు నిర్మించనున్నారు. ఒక్కో సెంటర్‌కి 2.5 ఎకరాల చొప్పున భూమి కేటాయించారు. అలాగే అమరావతి నిర్మాణ పనులకు కృష్ణానది నుంచే ఇసుకను డ్రెడ్జింగ్ చేసుకునేందుకు అనుమతి ఇచ్చారు.

అలాగే అమరావతిలో పలు సంస్థలకు భూములు కేటాయించారు. మంత్రుల కమిటీ నిర్ణయాలకు సీఆర్డీఏ అథారిటీ ఆమోదం తెలిపింది. సీబీఐకు 2 ఎకరాలు, జూలాజికల్ సర్వే ఆఫ్ ఇండియాకు 2 ఎకరాలు, స్టేట్ ఫోరెన్సిక్ సైన్స్ ల్యాబ్‌కు 5 ఎకరాలు. ఏపీ కోఆపరేటివ్ బ్యాంకు లిమిటెడ్‌కు 0.495 ఎకరాలు, పుల్లెల గోపీచంద్ బ్యాడ్మింటన్ అకాడమీకి 12 ఎకరాలు, ఎంఎస్‌కే ప్రసాద్ ఇంటర్నేషనల్ క్రికెట్ అకాడెమీకి 12 ఎకరాలు కేటాయించారు.

మరోవైపు అమరావతిలో మన్యం వీరుడు అల్లూరి సీతారామరాజు, అమరజీవి పొట్టి శ్రీరాములు విగ్రహాలను ఏర్పాటు చేయనున్నారు. ఈ మేరకు సీఎం చంద్రబాబు నాయుడు అధికారులకు సూచనలు చేశారు. అలాగే ఎకో పార్కులకూ మంచి పేర్లను పెట్టాలని స్పష్టం చేశారు. అమరావతి ఎయిర్ పోర్టు నిర్మాణం విషయంలో కేంద్రంతో సంప్రదింపులు చేయాలని అధికారులకు సూచించారు.