హెయిర్ క్లిప్పు, చిన్న కత్తి, ధోతీ సాయంతో..రైల్వే స్టేషన్‌లోనే మహిళకు పురుడు

ఉత్తర ప్రదేశ్‌లోని ఝాన్సీ రైల్వే స్టేషన్‌లో ఈ సంఘటన చోటుచేసుకుంది. పన్వేల్ నుంచి బారాబంకికి వెళ్తున్న ఒక నెలలు నిండిన గర్భిణికి తీవ్రమైన ప్రసవ వేదన మొదలైంది. రైల్లోనే నొప్పులు రావడంతో.. ఏం చేయాలో పాలుపోని ఆమె భర్త రైల్ మదద్ యాప్ ద్వారా వైద్య సహాయం కోరాడు. దీంతో స్పందించిన సిబ్బంది ఆమెను తర్వాతి స్టేషన్ అయిన ఝాన్సీ స్టేషన్‌లోనే రైలు నుంచి దింపారు. కానీ అప్పటికే ఆమెకు నొప్పులు ఎక్కువ కాగా.. ప్లాట్‌ఫామ్‌పైనే పడుకోబెట్టారు. దీంతో స్థానికులంతా గుమిగూడారు. అదే సమయంలో అక్కడే తన రైలు కోసం వేచి ఉన్న 31 ఏళ్ల ఆర్మీ డాక్టర్ మేజర్ రోహిత్ బచ్‌వాలా ఈ విషయాన్ని గుర్తించారు. ఏదో ఎమర్జెన్సీ ఉందని తెలిసి అందరినీ తోసుకుంటూ అక్కడకు వెళ్లారు.

మహిళ పరిస్థితి తీవ్రతను అర్థం చేసుకున్న మేజర్ బచ్‌వాలా.. అక్కడే ప్రసవం చేయక తప్పదని గుర్తించారు. ఎలాంటి వైద్య పరికరాలు అందుబాటులో లేకపోవడంతో.. తన జేబులో ఉన్న చిన్న కత్తి, హెయిర్ క్లిప్‌లు ధోతీ సాయంతో అప్పటికప్పుడు ప్రసవానికి అవసరమైన ఏర్పాట్లు చేశారు. రైల్వే మహిళా సిబ్బంది, స్థానిక మహిళలంతా ఆమె చుట్టూ నిలబడగా.. మేజర్ బచ్‌వాలా ఆమెకు పురుడు పోశారు. దాదాపు 10 నిమిషాల పాటు కష్టపడి ఆమెకు పురుడు పోయగా.. పండంటి ఆడబిడ్డ జన్మించింది. తల్లీ బిడ్డ ఇద్దరి ఆరోగ్యం బాగానే ఉండగా.. ప్రసవానంతరం వారిద్దరినీ తక్షణమే సమీపంలోని ఆసుపత్రికి తరలించి తదుపరి వైద్య సేవలు అందించారు.

మేజర్ బచ్‌వాలా సమయానికి స్పందించడంతోనే తల్లీ బిడ్డ క్షేమంగా బయట పడినట్లు సిబ్బంది తెలిపారు. ముఖ్యంగా ఎలాంటి వైద్య సదుపాయాలు లేకపోయినా స్థానిక ప్రజల వద్ద ఉన్న చిన్న చిన్న వస్తువుల సాయంతోనే ఆయన పురుడు పోయడాన్ని అందరూ ప్రశంసించారు. ముఖ్యంగా దీనిపై మేజర్ బచ్‌వాలానే మాట్లాడుతూ.. బొడ్డు తాడును బిగించడానికి తాను అక్కడే ఉన్న మహిళ హెయిర్ క్లిప్పు తీసుకుని వాడినట్లు చెప్పారు. అలాగే బిడ్డ ఆరోగ్యం స్థిరంగానే ఉందని నిర్ధారించుకున్న తర్వాత పాకెట్ కత్తితో బొడ్డు తాడును కత్తిరించినట్లు వెల్లడించారు. అయితే అక్కడే ఉన్న స్థానికుల్లో ఒకరి ధోతీని.. డెలివరీ సమయంలో చుట్టూ అడ్డంగా పెట్టి పురుడు పోసినట్లు స్పష్టం చేశారు.