ఏపీ ప్రభుత్వం కొత్త ఆలోచన.. సైన్స్ పార్కులు ఏర్పాటు

ఆంధ్రప్రదేశ్ రాజధాని అమరావతిని అంతర్జాతీయ నగరంగా తీర్చిదిద్దాలని ఏపీ ప్రభుత్వం సంకల్పించిన సంగతి తెలిసిందే. అందులో భాగంగా అమరావతిలో అంతర్జాతీయ విమానాశ్రయం, స్పోర్ట్స్ సిటీ, ఇంటర్నేషనల్ క్రికెట్ స్టేడియం వంటి నిర్మాణాలు చేపట్టునున్నారు. అలాగే అమరావతిలో అంతర్జాతీయ ప్రమాణాలతో క్వాంటం వ్యాలీ ఏర్పాటుకు ఏపీ ప్రభుత్వం చర్యలు తీసుకుంటున్న సంగతి తెలిసిందే. 2026 జనవరి ఒకటో తేదీ నాటికి అమరావతిలో క్వాంటం వ్యాలీ కార్యకలాపాలు ప్రారంభమయ్యేలా చూడాలని ప్రయత్నిస్తోంది. ఈ క్రమంలోనే ఏపీ ప్రభుత్వం మరో ఆలోచన కూడా చేస్తున్నట్లు సమాచారం.

పట్టణ ప్రాంతాల్లో సైన్స్ పార్కులు ఏర్పాటు చేయాలని తాజాగా ప్రభుత్వం ప్రణాళికలు రచిస్తున్నట్లు సమాచారం. ప్రతిష్టాత్మక అమరావతి క్వాంటం వ్యాలీకి సానుకూల వాతావరణ కల్పించే దిశగా ఈ సైన్స్ పార్కుల ఏర్పాటు గురించి ప్రభుత్వం ఆలోచన చేస్తోంది. పబ్లిక్, ప్రైవేట్ పార్టనర్‌షిప్ (పీపీపీ) విధానంలో ఈ సైన్స్ పార్కులు ఏర్పాటు చేయనున్నట్లు సమాచారం.

ది సైన్స్ సిటీ ఆఫ్ ఆంధ్రప్రదేశ్.. పట్టణ ప్రాంతాల్లో ఏర్పాటు చేసే సైన్స్ పార్కులకు నోడల్ ఏజెన్సీగా వ్యవహరించనుంది. పాఠశాల విద్యార్థులు, ఔత్సాహికులు, సాధారణ ప్రజలలో సైన్స్ మీద ఆసక్తిని పెంపొందించే లక్ష్యంతో సైన్స్ పార్కులను ఏర్పాటు చేయనున్నట్లు ఆంధ్రప్రదేశ్ సైన్స్ సిటీ సీఈవో కేశినేని వెంకటేశ్వర్లు వెల్లడించారు. సైన్స్ పార్కుల ద్వారా రాష్ట్రంలోని విద్యార్థులకు డీప్ టెక్, ఇన్నోవేటివ్ ఓరియెంటడ్ ఎడ్యుకేషన్ మీద అవగాహన వస్తుందని చెప్పారు.

మరోవైపు అమరావతిలో సైన్స్ సిటీ నిర్మాణానికి కసరత్తు జరుగుతోంది. ప్రపంచస్థాయి ప్రమాణాలతో అమరావతి సైన్స్ సిటీ నిర్మించాలని ఆంధ్రప్రదేశ్ సైన్స్ సిటీ భావిస్తోంది. సైన్స్ సిటీ ద్వారా సరికొత్త సాంకేతిక ఆవిష్కరణలకు అమరావతిని కేంద్ర బిందువుగా మార్చాలని ప్రణాళికలు రచిస్తోంది. అమరావతిలో సైన్స్ సిటీ నిర్మాణం గురించి 2014లోనే చంద్రబాబు ఆలోచన చేశారు. రూ. 200 కోట్లతో సైన్స్ సిటీ నిర్మించాలని ప్రణాళికలు రచించారు. అయితే 2019 ఎన్నికల్లో విజయం సాధించి వైసీపీ అధికారంలోకి వచ్చింది. దీంతో అమరావతి సైన్స్ సిటీ ప్రాజెక్టు పక్కనపెట్టేశారు. అయితే ఏపీలో టీడీపీ కూటమి మళ్లీ అధికారంలోకి రావటంతో ఇప్పుడు మరోసారి సైన్స్ సిటీ ప్రస్తావన తెరపైకి వచ్చింది.