అధిక బరువుని తగ్గించే యోగాసనాలు

యోగాతో అన్ని సమస్యకు పరిష్కారం దొరుకుతుంది. ముఖ్యంగా అధిక బరువుతో ఇబ్బంది పడే వారు రోజూ యోగా సాధన చేస్తే సహజంగానే బరువు తగ్గేందుకు అవకాశం ఉంటుంది. అయితే..చాలా మంది కామన్ గా ఎదుర్కొంటున్న సమస్య పొట్ట రావడం. పొట్ట కరిగించుకోవడం చేయని ప్రయత్నం అంటూ ఉండదు. నోరు కట్టేసుకుంటూనే రకరకాల వ్యాయామాలు చేయాల్సి ఉంటుంది. అయితే..యోగా వల్ల చాలా త్వరగా బెల్లీ ఫ్యాట్ తగ్గిపోతుంది. పొట్ట చుట్టూ పేరుకుపోయిన కొవ్వుని కరిగించడంలో కొన్ని యోగాసనాలు చాలా బాగా ఉపయోగపడతాయి. రోజూ వీటిని ప్రాక్టీస్ చేస్తే చాలు. మరి ఏయే ఆసనాలు వేయాలి. ఏ యోగాసనాలతో బెల్లీ ఫ్యాట్ కరిగిపోతుంది. వీటి గురించి కాస్త వివరంగా చర్చిద్దాం.

సూర్య నమస్కారాలు

సూర్య నమస్కారాలలో మొత్తం 12 భంగిమలుంటాయి. వీటిని సరైన విధంగా సాధన చేస్తే ఎన్నో ఆరోగ్య ప్రయోజనాలు పొందవచ్చు. గుండె సరైన విధంగా పని చేసేందుకు ఇవి ఎంతగానో ఉపయోగపడతాయి. అంతే కాదు. మెటబాలిజం మెరుగుపడడానికి కూడా ఇది సాయపడుతుంది. అయితే..కేలరీలను కరిగించడంలోనూ సూర్య నమస్కారాలు చాలా బాగా పని చేస్తాయి. సుమారుగా ఒకేసారి 90 కేలరీలు కరిగిస్తాయని అంచనా. వీటిని రోజూ సాధన చేయడం వల్ల బాడీలో ఫ్లెక్సిబిలిటీ పెరుగుతుంది. అదే సమయంలో గుండె కూడా ఎలాంటి జబ్బులు రాకుండా సేఫ్ గా ఉంటుంది. కండరాలు బలంగా తయారవుతాయి. రక్త సరఫరా పెరుగుతుంది. దీంతో పాటు శవాసన కూడా ప్రాక్టీస్ చేస్తే రోజుని ఆనందంగా, ఆరోగ్యంగా మొదలు పెట్టవచ్చు.

వీరభద్రాసన

​వీరభద్రాసన కూడా బెల్లీ ఫ్యాట్ ని కరిగించడంలో చాలా బాగా తోడ్పడుతుంది. ఇందులో మొత్తం మూడు రకాల భంగిమలుంటాయి. వీటి వల్ల చేతులు, కాళ్లు, భుజాలతో పాటు పొట్ట కండరాలు కూడా స్ట్రెచ్ అవుతాయి. అంటే ఒకేసారి శరీరం మొత్తం కదిలిపోతుంది. రోజూ ప్రాక్టీస్ చేస్తే రక్త సరఫరా మెరుగవుతుంది. దీంతో బాడీ బ్యాలెన్స్, స్టామినా పెరుగుతాయి. రక్త సరఫరా పెరిగినప్పుడు ఆటోమెటిక్ గా కేలరీలు ఖర్చవుతాయి. ఎన్నో రోజులుగా పేరుకుపోయిన కొవ్వు కూడా చాలా త్వరగా కరిగిపోతుంది. రోజూ సాధన చేస్తే మళ్లీ కొవ్వు పేరుకునే అవకాశం కూడా ఉండదు. మొత్తం మూడు భంగిమల్లో వారియర్ పోజ్ 2 ఆసనం చాలా బాగా పని చేస్తుంది. అయితే..మూడింటినీ కలిపి చేస్తే ఆరోగ్య ప్రయోజనాలు రెట్టింపు అయ్యే ఆస్కారముంటుంది.

చతురంగ దండాసన

ప్లాంక్స్ చేయడం చాలా మందికి తెలిసే ఉంటుంది. పూర్తిగా నేలకు పాదాలను చేతులను ఆనించి పొట్ట భాగాన్ని మాత్రం కాస్త పైకి లేపి ఉంచాలి. ఈ పోజ్ లో ఉండి ఎన్ని ప్లాంక్స్ చేస్తారనే దాన్ని బట్టి బాడీ స్టామినా ఎంత ఉందనేది తెలుస్తుంది. అయితే..ఇప్పుడు చెప్పే చతురంగ దండాసన దాదాపు ఈ వ్యాయామానికి దగ్గరగానే ఉంటుంది. భుజాలు, చేతులతో పాటు కాళ్లలోని కండరాలు కూడా కదిలిపోతాయి. ముఖ్యంగా అప్పర్ బాడీలో శక్తి పెరగడానికి ఈ ఆసనం ఎంతగానో తోడ్పడుతుంది. రోజూ ఈ ఆసనం సాధన చేస్తే బాడీ పోస్చర్ పెరుగుతుంది. భుజాలు, చేతుల్లో బలం పెరుగుతుంది. దీంతో పాటు మొత్తంగా మెటబాలిజం రేట్ పెరిగేందుకు అవకాశం ఉంటుంది. అయితే..ఈ ఆసనం వేయాలంటే కాస్తంత ఎనర్జీ అవసరం. అందుకే ఉదయమే ప్రాక్టీస్ చేయడం మంచిది. చాలా త్వరగా కేలరీలు కరిగిపోతాయి.

భుజంగాసన

దీన్నే కోబ్రా పోజ్ అంటారు. అంటే పాము ఆకారంలో ఉండడం. పాము తల ఎత్తినట్టుగా ఉంటుంది ఈ ఆసనం. ఛాతి, పొత్తి కడుపు కండరాలు స్ట్రెచ్ అవుతాయి. వెన్నెముక కూడా ఆరోగ్యంగా ఉంటుంది. జీర్ణ సమస్యలను తీర్చడంలో ఈ ఆసనం ఎంతగానో ఉపయోగపడుతుంది. అంతే కాదు. పొత్తి కడుపుపై ఒత్తిడి పడడం వల్ల ఎక్కువగా చెమట పడుతుంది. చెమట రూపంలో కొవ్వు అంతా బయటకు వెళ్లిపోతుంది. పొట్ట చుట్టూ పేరుకున్న ఫ్యాట్ చాలా వరకూ కరిగిపోతుంది. శ్వాస తీసుకోవడంలో ఇబ్బందులను తగ్గించడంతో పాటు ఒత్తిడిని కూడా పోగొడుతుంది భుజంగాసన. మెటబాలిజం కూడా మెరుగవుతుంది. బరువు తగ్గాలనుకునే వారు రెగ్యులర్ గా ఈ ఆసనం వేస్తే చాలా త్వరగా ఫలితాలను చూడవచ్చు.

నావాసన

దీన్నే బోట్ పోజ్ అని పిలుస్తారు. ఇది బాడీ స్ట్రెంత్ ని పెంచడంతో పాటు హిప్ భాగంపై ప్రెజర్ పడేలా చేస్తుంది. కండరాలు బలంగా మారడంలో తోడ్పడుతుంది. ముఖ్యంగా పొత్తి కడుపు కండరాలు కదిలిపోతాయి. ఫలితంగా చాలా త్వరగా ఫ్యాట్ కరిగిపోతుంది. వేలాడుతూ కనిపించే పొట్ట ఉన్న వారు ఈ ఆసనం రెగ్యులర్ గా ప్రాక్టీస్ చేయడం మంచిది. దీంతో పాటు అధోముఖ స్వనాసన కూడా బెల్లీ ఫ్యాట్ ని కరిగించడంలో తోడ్పడుతుంది. దీని వల్ల చేతులు, కాళ్ల కండరాల సాగినట్టుగా అవుతాయి. రక్త సరఫరా మెరుగవుతుంది. అజీర్తితో ఇబ్బంది పడే వారు రోజూ ఈ ఆసనం ప్రాక్టీస్ చేయొచ్చు. బాడీ డిటాక్స్ అయ్యేందుకు కూడా ఇది ఉపయోగపడుతుంది.