నాలుగో టెస్టులో కరుణ్ నాయర్ కష్టమే.. సాయి సుదర్శన్‌‌కు ఛాన్స్

ఇంగ్లండ్ - ఇండియా మధ్య జరుగుతున్న టెస్టు సిరీస్ ఎంతో ఆసక్తికరంగా సాగుతోంది. మొదటి రెండు టెస్టుల్లో చెరొకటి సొంతం చేసుకోగా.. లార్డ్స్ టెస్టులో భారత్ పోరాడి ఓడిపోయింది. దాంతో ఐదు టెస్టుల సిరీస్‌‌లో ఇంగ్లండ్ 2-1తో లీడ్‌లో ఉంది. లార్డ్స్ టెస్టు అనంతరం టీమిండియాలో ఏదైనా మార్పు జరిగితే అది కరుణ్ నాయర్ స్థానంలోనే అని అందరూ అంచనా వేస్తున్నారు.

ఓల్డ్ ట్రాఫోర్డ్‌ వేదికగా జూలై 23 నుంచి ఇంగ్లండ్‌తో నాలుగో టెస్టు మ్యాచ్ ఆడేందుకు భారత్ సిద్ధమవుతోంది. అయితే ఈ టెస్టు మ్యాచ్‌కి ముందు టీమిండియా ఒక కీలక మార్పు దాదాపు ఖాయమైనట్లేనని తెలుస్తోంది. నెంబర్ 3లో కరుణ్ నాయర్ స్థానంలో యువ ఆటగాడు సాయి సుదర్శన్‌కు అవకాశం ఇచ్చే సూచనలు స్పష్టంగా కనిపిస్తున్నాయి.

ఎనిమిది సంవత్సరాల తర్వాత టెస్టు జట్టులోకి వచ్చిన కరుణ్ నాయర్ ఇంగ్లండ్ టూర్‌లో పెద్దగా ప్రభావం చూపలేకపోయాడు. ఆరు ఇన్నింగ్స్‌లలో ఎక్కువగా స్టార్ట్స్ ఇచ్చినా దాన్ని భారీ స్కోర్స్‌గా మలచలేకపోయాడు. డైవ్ చేసేటప్పుడు మంచి షాట్స్ ఆడినప్పటికీ.. లెంగ్త్ నుంచి పైకి లేచే బంతుల విషయంలో మాత్రం ఇబ్బంది పడ్డాడు. లార్డ్స్‌లో ముఖ్యంగా రెండో ఇన్నింగ్స్‌లో బ్రైడన్ కార్స్ బౌలింగ్‌లో లోపలికి వచ్చే బంతిని విడిచిపెట్టడంతో చాలా విమర్శలు వచ్చాయి.

23 సంవత్సరాల సాయి సుదర్శన్ మొదటి టెస్టు అనంతరం జట్టు ప్లానింగ్‌లో భాగంగా మిగతా రెండు టెస్టుల నుంచి దూరం పెట్టారు. ఆఖరి రెండు టెస్టులలో టీమిండియాకు మంచి బ్యాటింగ్ లైనప్ అవసరం. ఈ సిరీస్‌లో భారత్ విజయం సాధించాలంటే ఆఖరి రెండు టెస్టుల్లో విజయం సాధించాల్సిందే.

"ప్లేయింగ్ ఎలెవన్‌లో ఒకే ఒక మార్పు ఉంటే, అది కరుణ్ నాయర్ స్థానంలో సాయి సుదర్శన్ రావడమే. కరుణ్ స్టార్ట్స్ ఇచ్చాడు కానీ పెద్ద స్కోర్లు చేయలేదు. క్రీజులో అతను అంత కంఫర్టబుల్‌గా కనిపించడం లేదు. భవిష్యత్ దృష్ట్యా సుదర్శన్‌కు ఎక్కువ అవకాశాలు ఇవ్వడమే మంచిది. ఎందుకంటే ఇంగ్లండ్‌లో మళ్లీ సిరీస్‌లు ఆడే అవకాశం త్వరగా రాదు" అని టీమిండియా మాజీ వికెట్ కీపర్ దీప్ దాస్ గుప్తా అభిప్రాయం వ్యక్తం చేశాడు.