ఐదు వారాల నిరీక్షణకు తెర.. ఎట్టకేలకు కేరళను వీడిన బ్రిటన్ ఫైటర్ జెట్

ప్రపంచంలోనే అత్యంత అధునాతనమైన, శక్తివంతమైన యుద్ధ విమానాల్లో ఒకటైన బ్రిటిష్ రాయల్ నేవీకి చెందిన ఎఫ్‌-35బీ స్టెల్త్ ఫైటర్ జెట్.. దాదాపు ఐదు వారాల సుదీర్ఘ నిరీక్షణ తర్వాత కేరళలోని తిరువనంతపురం అంతర్జాతీయ విమానాశ్రయం నుంచి ఎట్టకేలకు బయలుదేరింది. సాంకేతిక లోపం కారణంగా నిలిచిపోయిన ఈ యుద్ధ విమానం విజయవంతంగా మరమ్మతులు పూర్తి చేసుకుని స్వదేశానికి తిరుగు పయనమైంది.

జూన్ 14వ తేదీన ఈ ఎఫ్‌-35బీ యుద్ధ విమానం కేరళ విమానాశ్రయంలో అత్యవసరంగా ల్యాండ్ కావాల్సి వచ్చింది. బ్రిటన్ నుంచి ఆస్ట్రేలియాకు వెళ్తున్న మార్గంలో ఇంధనం తక్కువగా ఉండటం, ప్రతికూల వాతావరణ పరిస్థితులు తలెత్తడం వంటి కారణాలతో ఇది అత్యవసరంగా దిగినట్లు తొలుత వార్తలు వచ్చాయి. అయితే తర్వాత బ్రిటన్ అధికారులు స్పష్టం చేసిన వివరాల ప్రకారం.. ఈ విమానంలో హైడ్రాలిక్ వ్యవస్థకు సంబంధించిన సాంకేతిక లోపం తలెత్తింది. ఈ సమస్య కారణంగానే జెట్ ముందుకు కదలలేక అక్కడే నిలిచిపోయింది.

ఈ యుద్ధ విమానం భారత్-యూకే నావికాదళ విన్యాసాల్లో కూడా పాల్గొంది. అటువంటి కీలకమైన ఈ విమానం అనూహ్యంగా మధ్యలో చిక్కుకుపోవడం అధికారులను ఆందోళనకు గురిచేసింది. స్థానికంగా ఈ సాంకేతిక సమస్యను పరిష్కరించడం సాధ్యం కాకపోవడంతో.. బ్రిటన్ నుంచి ఏకంగా 24 మంది ప్రత్యేక నిపుణులతో కూడిన బృందాన్ని తిరువనంతపురానికి రప్పించారు. అయితే వారంతా ఐదు వారాల పాటు శ్రమించి.. క్లిష్టమైన మరమ్మతు పనులను పూర్తి చేశారు. ఈ ప్రక్రియలో భారత వైమానిక దళం (ఐఏఎఫ్) కూడా అవసరమైన సహాయ సహకారాలను అందించింది.

మరమ్మతులు పూర్తయిన తర్వాత విమానం తిరిగి ఎగిరేందుకు అవసరమైన క్లియరెన్స్‌లు లభించాయి. మంగళవారం (జులై 22వ తేదీన) తెల్లవారుజామున ఈ ఎఫ్‌-35బీ ఫైటర్ జెట్ తిరువనంతపురం విమానాశ్రయం నుంచి టేకాఫ్ అయి తిరిగి బ్రిటన్‌కు బయలుదేరినట్లు అధికారులు ధృవీకరించారు. ప్రపంచ స్థాయి అత్యాధునిక యుద్ధ విమానం భారత గడ్డపై ఇన్ని రోజులు చిక్కుకుపోవడం, ఆ తర్వాత విజయవంతంగా బయలుదేరడం ఒక అరుదైన, ఆసక్తికరమైన సంఘటనగా నిలిచింది.

మరోవైైపు ఈ విమానం చాలా రోజుల పాటు కేరళలోనే చిక్కుకుపోగా.. సోషల్ మీడియాలో దీనిపై అనేక రకాల మీమ్స్, వ్యంగ్య పోస్టులు వెల్లువెత్తాయి. ఈ ఫైటర్ జెట్‌ను ప్రముఖ ఆన్‌లైన్ మార్కెట్‌ప్లేస్ OLXలో అమ్మకానికి పెట్టారంటూ ఓ వార్త వైరల్‌గా మారడం విశేషం. ముఖ్యంగా 4 మిలియన్ల డాలర్లకు అమ్మకానికి పెట్టినట్లుగా నెటిజన్లు ఫేక్ పోస్టులు సృష్టించగా.. OLXలో అలాంటి ప్రకటన ఏదీ లేదని స్పష్టమైంది. ఇది కేవలం హాస్యం కోసం సృష్టించిన తప్పుడు వార్త అని తేలిపోయింది.