కొత్త జంటను కిరాతకంగా తుపాకీతో కాల్చి .,,,,పాకిస్థాన్‌లో పరువు హత్య

తమ అభీష్టానికి వ్యతిరేకంగా పెళ్లిచేసుకున్నారని ఆగ్రహిస్తూ ఓ యువజంటను అత్యంత కిరాతకంగా కాల్చిచంపిన ఘటన పొరుగు దేశం పాకిస్థాన్‌లోని బలూచిస్థాన్ ప్రావిన్సులో ఆలస్యంగా వెలుగు చూసింది. ఈ దారుణ ఘటనపై దేశవ్యాప్తంగా ఆగ్రహావేశాలు వ్యక్తమవుతున్నాయి. హత్యకు సంబంధించిన వీడియో సోషల్ మీడియాలో వైరల్ కావడంతో తీవ్ర విమర్శలు వెల్లువెత్తుతున్నాయి. ఈ సంఘటన మే నెలలో బక్రీద్ పండగకు మూడురోజుల ముందు క్వెట్టా నగర శివారులో జరిగినట్లు తెలిసింది. వైరల్ వీడియోలో, SUVలు, ట్రక్కుల్లో వచ్చిన కొంతమంది వ్యక్తులు ఒక యువ జంటను కింద దింపి, నిర్మానుష్య ప్రదేశానికి తీసుకెళ్తున్న దృశ్యాలు ఉన్నాయి.

ముఖానికి స్కార్ప్ ఉన్న యువతికి ఖురాన్ ఇవ్వగా.. ఆమె దాన్ని తీసుకొని ముందుకు నడుస్తోంది. అనంతరం హిబ్రూ భాషలో ‘‘నాతో ఏడడుగులు నడవండి... ఆ తరువాత నన్ను కాల్చవచ్చు’’ అని అడిగింది. ఆ వ్యక్తి ఆమెను కొంత దూరం అనుసరించగా.. ఆమె ఇంకోసారి ‘‘మీకు నన్ను కాల్చే హక్కు మాత్రమే ఉంది. ఇంకేమీ చేయలేరు’’ గర్వంగా అనడం.. తర్వాత అతడు ఆమెపై తుపాకీతో మూడు రౌండ్లు కాల్చగా, ఆమె కిందపడి మృతిచెందడం కనిపిస్తోంది. తర్వాత మరిన్ని కాల్పుల శబ్దాలు వినిపించగా, అక్కడి ఉన్నవారు చప్పట్లు కొడుతూ హర్షధ్వానాలు చేయడం వీడియోలో రికార్డయ్యింది. చివరికి, ఆమె క్కనే ఒక రక్తసిక్త పురుషుడి మృతదేహం కూడా కనిపిస్తుంది.

ఈ వీడియోపై దేశవ్యాప్తంగా ఆగ్రహం వెల్లువెత్తడంతో స్థానిక పోలీసులు దర్యాప్తు ప్రారంభించారు. హత్యకు గురైన జంటన బానో బీబి, అహ్సాన్ ఉల్లా‌గా గుర్తించారు. ఈ జంట ఇటీవల కుటుంబాల ఇష్టాలకు వ్యతిరేకంగాపెళ్లి చేసుకున్నట్టు సమాచారం. దీనిని పరువు హత్యగా నిర్దారించిన పోలీసులు.. కేసు నమోదుచేశారు. ఇప్పటివరకు 13 మందిని అరెస్టు చేసినట్టు క్వెట్టా పోలీస్ చీఫ్ నవీద్ అఖ్తర్ తెలిపారు. వీరిలో యువతి సోదరుడు, జంటను చంపేయాలని ఆదేశించిన స్థానిక తెగ పెద్ద సర్దార్ సతక్జై కూడా ఉన్నారు. మహిళ సోదరుని ఫిర్యాదు మేరకు తెగ పెద్ద ఇలాంటి ఆదేశం ఇచ్చినట్టు తెలిసింది.

పాకిస్థాన్‌ మానవ హక్కుల కమిషన్ గణాంకాల ప్రకారం.. గతేడాది కనీసం 405 పరువు హత్యలు చోటుచేసుకున్నాయి. అయితే, నిపుణుల అంచనాల ప్రకారం.. వాస్తవ సంఖ్య మరింత ఎక్కువగా ఉండొచ్చు. ఈ హత్యల్లో చాలా వరకూ ఎలాంటి కేసులు కూడా నమోదుకావు. మానవ హక్కుల కార్యకర్తలు, మహిళా సంఘాలు ఈ ఘటనను తీవ్రంగా ఖండిస్తున్నాయి. స్థానిక సంస్కృతుల పేరుతో మహిళల పట్ల జరిగే ఈ క్రూరమైన నేరాలపై చట్టపరమైన చర్యలు తీసుకోవాలని డిమాండ్ చేస్తున్నాయి.