భర్త నాలుక కొరికి.. నమిలి మింగేసిన భార్య

వామ్మో.. రోజు రోజుకూ కొందరు మనుషులు మానవ మృగాళ్లలా తయారు అవుతున్నారు. చిన్న చిన్న విషయాలకే విపరీతమైన కోపం తెచ్చుకుంటూ.. ఎంతటి దారుణాలకు అయినా పాల్పడుతున్నారు. ముఖ్యంగా భార్యభర్తల మధ్య వచ్చే గొడవలతో.. దంపతులు ఒకరిపై ఒకరు దాడి చేసుకుంటున్నారు. తాజాగా భర్తతో జరిగిన చిన్న గొడవకే విపరీతమైన కోపం తెచ్చుకున్న ఓ భార్య.. అతడిపై దాడికి పాల్పడింది. ముఖ్యంగా అతడి మీద పడి నాలుకను అందుకుంది. దాన్ని కొరికేసి మరీ నమిలి మింగేసింది. ఆపై తీవ్ర రక్తస్రావం అవుతున్నా పట్టించుకోకుండా గొడవ పడుతూనే ఉంది. విషయం గుర్తించిన స్థానికులు అతడిని ఆస్పత్రికి తరలించగా.. అక్కడకు కూడా వెళ్లిన భార్య పిచ్చిగా ప్రవర్తించింది.

సంఘటన వివరాల్లోకి వెళితే.. బీహార్‌ గయా జిల్లాలోని ఖిజ్రాసరాయ్ పోలీస్ స్టేషన్ పరిధికి చెందిన ఓ గ్రామంలో ఛోటే దాస్ అనే వ్యక్తి నివాసం ఉంటున్నాడు. అయితే అతడికి చాలా రోజుల క్రితమే వివాహం కాగా.. వీరి కాపురం హాయిగానే సాగుతోంది. అయితే మొన్నటి వరకు ఇద్దరూ ప్రేమగానే ఉన్నా ఈ మధ్య కాలంలో వీరి మనస్పర్థలు వచ్చాయి. దీంతో తరచుగా గొడవలు పడుతున్నారు. ఎప్పటిలాగే మంగళవారం రోజు కూడా వీరిద్దరి మధ్య గొడవ జరిగింది. ఇద్దరూ ఒకరినొకరు మాటా మాటా అనుకున్నారు. ఈక్రమంలోనే ఛోటే దాస్‌ భార్య తీవ్ర ఆగ్రహానికి గురైంది. కోపంతో ఊగిపోతూ.. భర్త నాలుకను తన నోటితో పట్టేసింది. పళ్లతో నాలుకను గట్టిగా కొరికేసింది.

 భర్త ఎంత వదిలించుకోవాలని చూసిన గట్టిగా పట్టుకున్న ఈమె నాలుక పూర్తిగా తెగిపోయే వరకు ఆగలేదు. ఆపై అతడి నాలుక ఆమె నోట్లోకి రాగా.. అతడి కళ్ల ముందే నమిలి మింగేసింది. భార్య నాలుక కొరికేయగానే.. తీవ్ర రక్తస్రావం అయింది. దీంతో ఛోటే దాస్ బయటకు పరుగులు పెట్టాడు. విషయం గుర్తించిన స్థానికులు వెంటనే అతడిని ఆస్పత్రికి తరలించారు. భార్య కూడా అతడి వెంటే వెళ్లింది. అయితే ముందుగా సమీప ప్రభుత్వ ఆస్పత్రికి వెళ్లగా.. ప్రాథమిక చికిత్స చేసిన వైద్యులు మగధ్ వైద్య కళాశాలకు సిఫార్సు చేశారు. మెరుగైన చికిత్స నిమిత్తమే.. అక్కడకు పంపినట్లు డాక్టర్ మీనారాణి తెలిపారు.

అయితే ఇంత జరుగుతున్నా.. ఆస్పత్రిలో కూడా భార్యా భర్తలు గొడవ పడుతూనే ఉన్నట్లు గ్రామస్థులు చెబుతున్నారు. మరోవైపు ఈ ఘటనపై ఎలాంటి అధికారిక ఫిర్యాదు అందలేదని.. ఖిజర్సరాయ్ పోలీసులు తెలిపారు. ఒకవేళ బాధితుల వైపు నుంచి ఫిర్యాదు అందితే.. చట్టపరమైన చర్యలు తీసుకుంటామని స్పష్టం చేశారు.