డ్రోన్ నుంచి క్షిపణి ప్రయోగం సక్సెస్,,,భారత రక్షణ సామర్థ్యానికి మేజర్ బూస్ట్

భారత తన రక్షణ సామర్థ్యాన్ని మరోసారి ప్రదర్శించింది. రక్షణ రంగ పరిశోధన అభివృద్ధి సంస్థ డ్రోన్ ద్వారా క్షిపణిని విజయవంతంగా ప్రయోగించింది. ఆంధ్రప్రదేశ్‌లోని కర్నూలులో ఉన్న నేషనల్ ఓపెన్ ఏరియా రేంజ్‌‌లో చేపట్టిన ఈ ప్రయోగం విజయవంతమమైంది. డ్రోన్ ద్వారా ప్రిసిషన్ గైడెడ్ మిసైల్‌-వీ3ని ను విజయవంతంగా పరీక్షించింది. ఈ సందర్భంగా డీఆర్డీఓను రక్షణ మంత్రి రాజనాథ్ సింగ్ అభినందించారు. ఈ ప్రయోగాలను భారత క్షిపణి సామర్థ్యాలకు ‘గొప్ప ప్రోత్సాహకం’గా ఆయన అభివర్ణించారు.

‘‘భారత రక్షణ సామర్థ్యానికి ఇది ఒక ప్రధాన ప్రోత్సాహకంగా నిలిచింది.. రక్షణ రంగ పరిశోధన అభివృద్ధి సంస్థ (ఢీఆర్డీవో) యూఏవీ ద్వారా ప్రయోగించే ఖచ్చితమైన దిశా నిర్దేశిత క్షిపణి (ULPGM)-V3ను ఆంధ్రప్రదేశ్ రాష్ట్రం కర్నూలులో ఉన్న నేషనల్ ఓపెన్ ఏరియా రేంజ్ (NOAR)లో విజయవంతంగా పరీక్షించింది.. డీఆర్డీఓకు సహకరించిన భాగస్వాములు, డీపీపీపీలు, ఎంఎస్‌ఎంఈలు, స్టార్ట్‌అఫ్‌లకు అభినందనలు. ULPGM-V3 అభివృద్ధి, ప్రయోగం విజయవంతం కావడం భారత్ ఇప్పుడు కీలకమైన రక్షణ సాంకేతికతలను వినియోగించి ఉత్పత్తి చేయగలదని నిరూపిస్తోంది’ అని రాజ్‌నాథ్ ఎక్స్ (ట్విట్టర్) పేర్కొన్నారు.

పలు వార్‌హెడ్‌ల కలిగిన ULPGM-V2ను డీఆర్డీవోకు చెందిన టెర్మినల్ బాలిస్టిక్స్ రిసెర్చ్ ల్యాబొరేటరీ (TBRL) గతంలో అభివృద్ధి చేసింది. వీటిని బెంగళూరులో ఇటీవల నిర్వహించిన ఏరో ఇండియా 2025లో ప్రదర్శించారు. విస్తృత పరిధి కలిగిన ఈ క్షిపణుల్లో ఇమేజింగ్ ఇన్‌ఫ్రారెడ్ (IIR) సీకర్లు, డ్యుయల్-థ్రస్ట్ ప్రొపల్షన్ వ్యవస్థలు వంటి ఆధునిక సాంకేతికతలు ఉన్నాయి. తాజాగా పరీక్షించిన V3 వేరియంట్లోనూ ఈ వ్యవస్థలు ఉండే అవకాశం ఉంది. కాగా, ఆపరేషన్ సిందూర్ తర్వాత భారత్ తన రక్షణ సామర్థ్యాన్ని మరింత బలోపేతం చేసేలా ప్రణాళికలను రూపొందించింది. అధునాతన ఆయుధాలను.. క్షిపణులను అభివృద్ధికి భారీ ప్రాజెక్ట్‌లను చేపట్టింది. ఇందులో భాగంగా ఇటీవల లడఖ్‌లో ఆకాశ్ ప్రైమ్ క్షిపణిని విజయవంతంగా పరీక్షించిన సంగతి తెలిసిందే. ఆపరేషన్ సిందూర్ సమయంలో ఆకాశ్ క్షిపణి వ్యవస్థ పాకిస్థాన్ దాడులను సమర్ధంగా తిప్పికొట్టిన సంగతి తెలిసిందే.

అత్యంత ఖచ్చితత్వంతో దాడులు నిర్వహించే ULPGM వ్యవస్థలు అన్ని రకాల వైమానిక వేదికల నుంచి ప్రయోగానికి అనుకూలంగా ఉంటాయి. కదన రంగంలో ఇవి వ్యూహాత్మక మద్దతు ఇస్తాయి. కాగా, ఈ ప్రయోగాలకు కర్నూలులోని నేషనల్ ఓపెన్ ఏరియా రేంజ్ (NOAR)ను డీఆర్డీవో వ్యూహాత్మకంగా ఎంచుకుంది. ఇటీవల ఇక్కడ నుంచే హై ఎనర్జీ లేజర్ ఆధారిత డైరెక్టెడ్ ఎనర్జీ వెపన్స్ (DEWs)ను కూడా విజయవంతంగా పరీక్షించారు. ఇందులో స్థిరంగా ఉన్న యూఏవీలతో పాటు, స్వార్మ్ డ్రోన్లను నిర్వీర్యం చేసే సామర్థ్యాలు ఉన్నాయి.