రెండు సెంచరీలతో టెస్టుల్లోకి ఎంట్రీ ఇచ్చేందుకు తిలక్ వర్మ రెడీ

ఒకవైపు అండర్సన్ - టెండూల్కర్ ట్రోఫీతో శుభమన్ గిల్ నాయకత్వంలోని టీమిండియా ఇంగ్లండ్‌పై పోరాడుతుంటే.. మరోవైపు అదే ఇంగ్లండ్ గడ్డపై భారత యువ ఆటగాళ్లు సంచలనాలు సృష్టిస్తున్నారు. మొన్నటి వరకు టీ20ల్లో అదరగొట్టిన కుర్రాళ్లు ఇప్పుడు రెడ్ బాల్ క్రికెట్‌లోనూ అదరగొడుతున్నారు. తెలుగు తేజం తిలక్ వర్మ కౌంటీ క్రికెట్‌లో వరుస శతకాలతో అందరి దృష్టి ఆకర్షిస్తున్నాడు.

టీమిండియా హెడ్ కోచ్‌గా గౌతమ్ గంభీర్ బాధ్యతలు చేపట్టాక జట్టులో యువకుల ప్రాధాన్యత పెరిగింది. టీ20ను పూర్తిగా కుర్రాళ్లతో నింపేసిన గంభీర్.. టెస్టుల్లో కూడా యువ రక్తానికి అవకాశం ఇస్తున్నాడు. రోహిత్ శర్మ, విరాట్ కోహ్లి రిటైర్మెంట్ తర్వాత టీమిండియా టాప్ ఆర్డర్ కాస్త వీక్ అయింది. ఈ క్రమంలోనే సాయి సుదర్శన్, కరుణ్ నాయర్‌కు జట్టులో చోటు కల్పించినా పూర్తి స్థాయిలో ఫిట్ కాలేకపోయారు. ఇలాంటి సమయంలో జట్టులో చోటు సంపాదించేందుకు తిలక్ వర్మ శతవిధాల ప్రయత్నిస్తున్నాడు.

కౌంటీ ఛాంపియన్‌షిప్ డివిజన్‌లో తిలక్ వర్మ హాంప్షైర్ తరఫున ప్రాతినిథ్యం వహిస్తున్నాడు. నాటింగ్‌హామ్ షైర్‌తో జరుగుతున్న మ్యాచ్‌లో తెలుగోడు శతకంతో సత్తా చాటాడు. ఈ మ్యాచ్‌లో తొలుత బ్యాటింగ్ చేసిన నాటింగ్‌హామ్ షైర్ జట్టు తొలి ఇన్నింగ్స్‌లో 578/8 పరుగులు చేసి డిక్లేర్ చేసింది. హాంప్షైర్ జట్టు కూడా నాటింగ్‌హామ్‌కు గట్టి పోటీ ఇస్తోంది.

నాలుగో స్థానంలో బ్యాటింగ్‌కి దిగిన తిలక్ వర్మ 256 బంతుల్లో 13 ఫోర్లు, రెండు సిక్సర్లతో 112 పరుగులు బాదాడు. కౌంటీల్లో ఎంట్రీ ఇచ్చిన మొదటి ఎడిషన్‌లోనే సెంచరీల మోత మోగిస్తున్నాడు. వోర్సెస్టర్‌ షైర్‌పై 56, 47 పరుగులు చేసిన తిలక్.. ఎస్సెక్స్‌తో జరిగిన మ్యాచ్‌లో 241 బంతుల్లో 11 ఫోర్లు, మూడు సిక్సర్లతో వంద పరుగులు చేశాడు.

22 సంవత్సరాల తిలక్ వర్మ ఇప్పటి వరకు భారత్ తరఫున 25 టీ20లు, నాలుగు వన్డేలు ఆడాడు. టీ20ల్లో రెండు సెంచరీలు, మూడు హాఫ్ సెంచరీలతో 49.93 యావరేజ్‌తో 749 పరుగులు నమోదు చేశాడు. ముంబై ఇండియన్స్ తరఫున ఐపీఎల్ ఆడుతున్న తిలక్ 54 మ్యాచ్‌లలో 8 హాఫ్ సెంచరీలతో 1499 పరుగులు చేశాడు.