దేశంలోనే తొలిసారి బయోమెట్రిక్,,,, కంటి చూపుతోనే పేమెంట్లు

ఏదైనా ఆన్‌లైన్ పేమెంట్ చేయాలంటే ఓటీపీ ఎంటర్ చేయాల్సి ఉంటుంది. అందుకోసం కార్డుతో పాటుగా రిజిస్టర్డ్ మొబైల్ నంబర్ వెంట తీసుకెళ్లాల్సి వస్తుంది. అలాగే కొన్నిసార్లు సరైన నెట్‌వర్క్ లేక ఓటీపీ అందుకోవడంలో ఇబ్బందులు తలెత్తుతుంటాయి. ఇలాంటి అసౌకర్యానికి ఫెడరల్ బ్యాంక్ చెక్ పెట్టింది. దేశంలోనే తొలిసారి ఇ-కామర్స్ కార్డ్ ట్రాన్సాక్షన్లకు బయోమెట్రిక్ అథెంటికేషన్ పరిష్కారం చూపించింది. ఇకపై ఈ బ్యాంక్ కస్టమర్లు ఏదైనా కొనుగోలు చేసినప్పుడు టచ్ చేయడం లేదా కంటి చూపుతోనే పేమెంట్లు చేయవచ్చు.

ఇకపై ఓటీపీల గోల ఉండదు. ఆన్‌లైన్ కొనుగోళ్లను ఫింగర్ ప్రింట్ లేదా ఫేస్ ఐడీ ద్వారా పేమెంట్లు చేయచ్చు. అది కూడా కేవలం 3 సెకన్లలోనూ పూర్తి చేయవచ్చు. ప్రతి ట్రాన్సాక్షన్ మీ డివైజ్ ద్వారా సురక్షితంగా వెరిఫై అవుతుంది. బ్యాకప్‌గా అందుబాటులో ఉన్న సాంప్రదాయ పద్ధతులతో వివరాలు చెక్ చేసుకోవచ్చు. సాంప్రదాయ పద్దతుల్లోనూ పేమెంట్లు చేయవచ్చు.

డిజిటల్ ట్రాన్సాక్షన్ల భద్రతను పెంచేందుకు రిజర్వ్ బ్యాంక్ ఆఫ్ ఇండియా ఇప్పటికే టు- ఫ్యాక్టర్ అథెంటికేషన్ తప్పనిసరి చేసిన సంగతి తెలిసిందే. అందులో పాస్‌వర్డ్, పిన్ నంబర్లు ఒకటి అయితే, రెండోది ఓటీపీ ఉంటున్నాయి. ఓటీపీకి బదులుగా బయోమెట్రిక్ సైతం ఉపయోగించవచ్చు. అయితే, ప్రస్తుతం మన దేశంలో 2 ఫ్యాక్టర్ అథెంటికేషన్ కోసం సాధారణంగా పాస్‌వర్డ్స్, పిన్, డివైజ్ బైండింగ్, గ్రిడ్ నంబర్, సెక్యూరిటీ ప్రశ్నలు, ఓటీపీ వాడుతున్నారు. వాటి స్థానంలో ఫింగర్ ప్రింట్ లేదా ఫేస్ ఐడీని సైతం ఉపయోగించుకోవచ్చు.

బయోమెట్రిక్ అథెంటికేషన్‌తో ఎలా పే చేయాలి?

మీరు ముందుగా మీ బయోమెట్రిక్ వివరాలను మీ బ్యాంక్ ఖాతాకు అనుసంధానం చేయాల్సి ఉంటుంది. ఆ తర్వాత ఎలాంటి అడ్డంకులు లేకుండా క్షణాల వ్యవధిలో పేమెంట్లు చేయవచ్చు. అందుకు ముందుగా మెర్చంట్ యాప్‌లోని స్కీన్ చెకౌట్‌లోని ఆప్షన్లలో టొకెనైజ్డ్ కార్డ్ ఆప్షన్ ఎంచుకోవాలి. దీంతో మీరు నేరుగా బయోమెట్రిక్ అథెంటికేషన్ పేజీలోకి వెళ్తారు. మీ ఫింగర్ ప్రింట్, ఫేస్ ఐడీ లేదా మీ 4 డిజిట్ పిన్ ఎంటర్ చేసి ట్రాన్సాక్షన్ పూర్తి చేయాలి. బయోమెట్రిక్ అథెంటికేషన్ యాక్టివేట్ చేయడానికి, భాగస్వామి వ్యాపారి ప్రొఫైల్‌లోని ఫోన్ నంబర్ మీ బ్యాంక్ ధృవీకరించిన లేదా రిజిస్టర్డ్ ఫోన్ నంబర్‌తో సరిపోలుతుందని నిర్ధారించుకోవాల్సి ఉంటుంది.

అయితే, మొబైల్ వెబ్‌ బ్రౌజర్ల ద్వారా బయోమెట్రిక్ అథెంటికేషన్ ఉపయోగించి ఆన్‌లైన్ పేమెంట్లు చేయడం అనేది ఇంకా అందుబాటులోకి రాలేదు. ఇన్ యాప్ పేమెంట్లను ఎనేబుల్ చేయడం ద్వారా 2 ఫ్యాక్టర్ అథెంటికేషన్ అనేది మొబైల్ బ్రౌజర్ బయోమెట్రిక్ అథెంటికేషన్‌ను అడ్డుకుంటుంది. దీంతో పేమెంట్లు చేయడానికి ఉండదు.