మైనర్‌కు 'ఐ లవ్ యూ' చెప్పడం లైంగిక వేధింపుల కిందకు రాదు..: హైకోర్టు సంచలనం

చట్టపరమైన అంశాలపై దేశవ్యాప్తంగా తీవ్ర చర్చకు దారితీసే ఒక సంచలన తీర్పును ఛత్తీస్‌గఢ్ హైకోర్టు వెలువరించింది. ఒక మైనర్ బాలికకు 'ఐ లవ్ యూ' అని చెప్పినంత మాత్రాన అది లైంగిక వేధింపుల కిందకు రాదని.. లైంగిక ఉద్దేశం స్పష్టంగా రుజువు కానంత వరకు పోక్సో చట్టం కింద నేరం కాదని ఉన్నత న్యాయస్థానం స్పష్టం చేసింది. ఈ తీర్పు బాలల రక్షణ చట్టాల అమలు, వాటి విశ్లేషణపై నూతన చర్చకు తెరలేపింది.

ఈ కేసు వివరాల్లోకి వెళ్తే.. 2019 అక్టోబర్ 15వ తేదీ నాడు.. ఓ ఏళ్ల 15 బాలిక బడి నుంచి ఇంటికి వెళ్తోంది. ఇదే సమయంలో ఓ యువకుడు ఆమె వద్దకు వచ్చి 'ఐ లవ్ యూ' అని చెప్పాడు. దీంతో బాలిక పాఠశాలకు వెళ్లి ఉపాధ్యాయులకు ఫిర్యాదు చేసింది. దీంతో వాళ్లు మందలించి మరోసారి ఇలాంటి పని చేయకూడదని హెచ్చరించారు. కానీ ఆపై ఇంటికెళ్లిన బాలిక తల్లిదండ్రులకు కూడా ఈ విషయం చెప్పగా.. వారు పోలీసులను ఆశ్రయించారు. తమ కుమార్తెను ఓ యువకుడు నిత్యం వేధిస్తున్నాడని, ఐ లవ్ యూ కూడా చెప్పినట్లు ఫిర్యాదులో పేర్కొన్నారు. ఈక్రమంలోనే పోలీసులు అతడిపై ఐపీసీ సెక్షన్ 354డీ, 509, పోక్సో చట్టంలోని సెక్షన్ 8, ఎస్సీ, ఎస్టీ చట్టంలోని సెక్షన్ 3(2) కింద కేసులు నమోదు చేశారు.

అలాగే ఈ కేసు కోర్టుకు చేరగా.. సరైన సాక్ష్యాధారాలు లేకపోవడంతో ట్రయల్ కోర్టు యువకుడిని నిర్దోషిగా ప్రకటించింది. దీంతో సర్కారు ఛత్తీస్‌గఢ్ హైకోర్టును ఆశ్రయించారు. తాజాగా ఈ కేసుపై విచారణ జరిపిన న్యాయస్థానం.. ట్రయల్ కోర్టు ఇచ్చిన తీర్పును సమర్థించింది. యువకుడు లైంగిక ఉద్దేశంతో ఐ లవ్ యూ చెప్పాడని భావించలేమని జస్టిట్ సంజయ్ ఎస్ అగర్వాల్ నేతృత్వంలోని సింగిల్ బెంచ్ పేర్కొంది. యువకుడికి లైంగిక ఉద్దేశం లేకుండా.. ప్రేమిస్తున్నానని చెబితే దాన్ని లైంగిక వేధింపుల కేసులుగా పరిగణించలేమని వెల్లడించింది. కేసుకు సంబంధించిన అన్ని వాస్తవాలను పరిగణలోకి తీసుకున్న హైకోర్టు యువకుడిని నిర్ధోషిగా ప్రకటించింది. ఈ కేసులో రాష్ట్ర సర్కారు చేసిన అప్పీల్‌ను తిరస్కరించింది.

ఇటీవలో ఓ యువతి.. తనను ఓ 35 ఏళ్ల వ్యక్తి లైంగికంగా వేధించాడని, ఐ లవ్ యూ కూడా చెప్పాడని కోర్టుకు వచ్చింది. ఆటపట్టిస్తూనే ప్రేమిస్తున్నానని చెప్పాడని పేర్కొంది. ఘటన జరిగినప్పుడు ఆమె మైనర్ కావడంతో సదరు వ్యక్తిపై పోలీలుసు పోక్సో చట్టం కింద కేసు పెట్టారు. విచారణ తర్వాత సెషన్స్ కోర్టు అతడిని దోషిగా గుర్తించి మూడేళ్ల జైలుశిక్ష వేసింది. దీనిపై అతడు బాంబే హైకోర్టును ఆశ్రయించగా.. విచారణ జరిపిన న్యాయస్థానం సెషన్స్ కోర్టు తీర్పును ఖండించింది. ముఖ్యంగా ఐ లవ్ యూ చెప్పడంలో లైంగిక ఉద్దేశం ఉన్నట్లు నిరూపితం కాలేదని.. అందుకే ఆరోపణలు ఎదుర్కుంటున్న వ్యక్తిని నిర్ధోషిగా తేలుస్తున్నట్లు తీర్పును ఇచ్చింది. తాకాలని కానీ అసభ్యకరమైన సైగలు గానీ చేయకుండా.. ఐ లవ్ యూ చెబితే నేరంగా పరిగణించలేమని స్పష్టం చేసింది.