కాక్‌పిట్‌లోకి దూసుకెళ్లి భారత సంతతి పైలట్‌ అరెస్ట్

అమెరికాలో భారత సంతతికి చెందిన పైలట్‌ అరెస్ట్ కలకలం రేపుతోంది. ఏకంగా విమానం కాక్‌పిట్‌లోకి దూసుకొచ్చి మరీ పోలీసులు అరెస్ట్ చేయడం గమనార్హం. డెల్టా ఎయిర్‌లైన్స్‌కు చెందిన కో-పైలట్ రుస్తమ్ భగ్వాగర్ (34)ను చిన్నారిపై లైంగిక దాడి కేసులో అరెస్ట్ చేశారు. అయితే, పోలీసులు అత్యంత దారుణంగా వ్యవహరించారు. విమానం ల్యాండ్ అయిన వెంటనే, ప్రయాణికులు ఇంకా దిగకముందే కాక్‌పిట్‌లోకి దూసుకెళ్లి అదుపులోకి తీసుకున్నారు. డెల్టా విమానం 2809 ఆదివారం ఉదయం 7.05 గంటలకు మినియాపొలిస్ నుంచి శాన్‌ఫ్రాన్సిస్కో ఎయిర్‌పోర్ట్‌కు చేరుకుంది. విమానం ల్యాండ్ అయిన 10 నిమిషాల్లోనే 10 మంది హోమ్‌ ల్యాండ్ సెక్యూరిటీ ఏజెంట్లు విమానంలోకి ప్రవేశించారు.

తుపాకులు, బ్యాడ్జీలు ధరించి కాక్‌పిట్‌లోకి ప్రవేశించి రుస్తమ్‌కు హ్యాండ్‌ కఫ్ వేసి బయటకు తీసుకెళ్లారు. ప్రయాణికులు ఇంకా దిగకముందే ఘటన చోటుచేసుకుంది. ఒక ప్రయాణికుడు మాట్లాడుతూ.. సెక్యూరిటీ ఏజెంట్లు మమ్మల్ని తోసుకుంటూ కాక్‌పీట్‌లోకి వెళ్లి అరెస్ట్ చేయడంతో మేమంతా షాక్‌ అయ్యామని అన్నాడు. కాగా, చిన్నారిపై లైంగిక దాడికి పాల్పడినట్టు భగ్వాగర్‌పై ఆరోపణలు ఉన్నాయి. దీనిపై కాంట్రా కోస్టా కౌంటీ షెరీఫ్ డిపార్ట్‌మెంట్, హోంల్యాండ్ సెక్యూరిటీ ఏజెంట్లు 2025 ఏప్రిల్ నుంచి దర్యాప్తు చేస్తున్నారు.

చిన్నారిపై లైంగిక దాడికి సంబంధించి 5 కేసులు నమోదయ్యాయి. పక్కా ఆధారాలతో వారెంట్ జారీ చేసి అతడ్ని అరెస్ట్ చేశామని తెలిపారు. ప్రస్తుతం డిటెన్షన్ సెంటర్‌లో ఉంచారు. బెయిల్‌కు జామీనుగా 5 మిలియన్ డాలర్లుగా నిర్ణయించారు. కాగా, రుస్తమ్‌తో కలిసి పనిచేసిన ప్రధాన పైలట్‌కి కూడా ఈ అరెస్ట్ గురించి ముందస్తు సమాచారం లేదు. ఒకవేళ అతడికి తెలిస్తే భగ్వాగర్‌కు సమాచారం ఇస్తాడని అనుమానించారు.

దీనిపై "డెల్టా ఎయిర్‌లైన్స్ సంస్థ స్పందిస్తూ ఉద్యోగి అనుచిత ప్రవర్తనకు తమ సంస్థ మద్దతు ఇవ్వదని, దర్యాప్తునకు సంపూర్ణ సహకారం అందిస్తామని తెలిపింది. ‘ఈ ఆరోపణలు అసహ్యకరమైనవిగా భావిస్తున్నాం.. సంబంధిత పైలట్‌ను విచారణ పూర్తయ్యేంతవరకూ విధుల నుంచి తప్పించాం’ అని పేర్కొంది. అయితే, కేసు పూర్తి వివరాలను మాత్రం హోమ్‌ల్యాండ్ సెక్యూరిటీ వెల్లడించాల్సి ఉంది.