వారంలో రెండోసారి,,,11 లక్షల మంది మహిళల ప్రయివేట్ చాట్ లీక్

మహిళల వ్యక్తిగత విషయాలను పంచుకునే డేటింగ్ యాప్ ‘టీ’ వివాదంలో చిక్కుకుంది. మరోసారి యాప్‌ భారీ డేటా లీక్‌కు గురైంది. గత వారం వరకు 11 లక్షల మందికి పైగా యూజర్ల మధ్య జరిగిన వ్యక్తిగత సందేశాలు బయటకు రావడం కలకలం రేపుతోంది. దీంతో యాప్ వినియోగదారుల గోప్యత తీవ్ర ప్రమాదంలో పడింది. కొద్ది రోజుల వ్యవధిలోనే ఇలా జరగడం ఇది రెండోసారి. అమెరికాలోని మహిళల కోసం 2023లో ఈ యాప్‌ను సురక్షిత డేటింగ్ కోసం రూపొందించారు.

‘వెరిఫైడ్ గ్రీన్ ఫ్లాగ్ మెన్’ను ప్రోత్సహించే ఈ యాప్ నకిలీ ఆన్‌లైన్ ఐడెంటిటీలు నిర్ధారించేందుకు సబ్మిట్ చేసిన వ్యక్తుల ఫోటోలు, సెల్ఫీలు, వ్యక్తిగత డేటా ఆధారంగా వెరిఫికేషన్ చేస్తుంది. మొత్తం 1.1 మిలియన్ యూజర్లు చర్చించిన వ్యక్తిగత విషయాలు బయటకు వచ్చినట్టు అంతర్జాతీయ మీడియా ఓ కథనం ప్రచురించింది: అబార్షన్, వ్యభిచారం ఆరోపణలు, వ్యక్తిగత సమస్యలు, ఫోటోలు, ఐడెంటిటీ డాక్యుమెంట్లు, సైట్‌లో పోస్ట్ చేసిన పబ్లిక్ ఫోటోలు కూడా లీకైనట్టు పేర్కొంది. దీనికి ముందు జులై 25న 72 వేల మంది వ్యక్తిగత చాటింగ్‌లు లీక్ కావడం గమనార్హం. ఇందులో 13,000 సెల్ఫీలు, 59,000 యాప్‌లోని పోస్టులు, కామెంట్లు, డైరెక్ట్ మెసేజ్‌లలో ఉన్న ఫోటోలు ఉన్నాయి

మొత్తం 4.6 మిలియన్ (46 లక్షలు) యూజర్లతో యాప్‌ స్టోర్‌లో టాప్‌లో ఉన్న టీ యాప్‌పై గోప్యతా ఉల్లంఘనలు, వ్యక్తిగత డేటా బహిర్గతంపై తీవ్ర విమర్శలు వస్తున్నాయి డేటా లీక్‌పై Tea యాప్ అధికార ప్రతినిధి ఓ ప్రకటనలో స్పందించారు. ‘డేటా లీక్‌ను నియంత్రించేందుకు వేగంగా చర్యలు తీసుకుంటున్నాం. సైబర్ సెక్యూరిటీ సంస్థలతో కలిసి పూర్తిస్థాయి దర్యాప్తు కొనసాగుతోంది.. పోలీసులకు సహకరిస్తున్నాం’ అని తెలిపారు. అయితే, 2024 ఫిబ్రవరికి ముందు యూజర్ల డేటా మాత్రమే లీకైందని పేర్కొన్నారు. కానీ తాజా లీక్ 2023 యాప్ ప్రారంభం నుంచి గత వారం వరకు యూజర్ల సమాచారం ఉండటం గమనార్హం.

డేటా లీకైన యూజర్ల ఐడీలు ఇతర సైట్లలో కనిపిస్తున్నాయి. వాటిలో ‘టీ’ యూజర్లు అందచందాలను బట్టి సెక్షన్ల వారీగా వర్గీంచారు. దీంతో వ్యక్తిగత బెదిరింపులు,హ్యాకింగ్ ముప్పుపై యూజర్లు తీవ్ర ఆందోళనకు గురవుతున్నారు.