టేకాఫ్ అయిన కాసేపటికే బోయింగ్ డ్రీమ్‌లైనర్ నుంచి మేడే కాల్

యునైటెడ్ ఎయిర్‌లైన్స్‌కు చెందిన బోయింగ్ 787-8 డ్రీమ్‌లైనర్‌ గాల్లో ఉండగానే ఇంజిన్ విఫలమం కావడంతో పైలట్ మేడే కాల్ ప్రకటించాడు. వాషింగ్టన్ డల్లెస్ ఎయిర్‌పోర్టు నుంచి బయలుదేరిన విమానం 5 వేల అడుగుల ఎత్తుకు చేరుకున్న తర్వాత ఎడమవైపు ఇంజిన్ విఫలైమంది. దీంతో వెంటనే అత్యవసర పరిస్థితిని ప్రకటించిన సిబ్బంది.. అది సురక్షితంగా వెనక్కి మళ్లించేందుకు ఎయిర్‌ ట్రాఫిక్ కంట్రోలర్ (ఏటీసీ)కి సమాచారం ఇచ్చారు. అనంతరం ఇంధనం ఖాళీ చేయడానికి దాదాపు 3 గంటల పాటు విమానం గాల్లోనే చక్కర్లు కొట్టింది. ఇంధనం ఖాళీ అయిన తర్వాత సురక్షితంగా ల్యాండ్ చేశారు. జులై 25న జరిగిన ఈ ఘటన ఆలస్యంగా వెలుగులోకి వచ్చింది.

వివరాల్లోకి వెళ్తే.. జులై 25న యునైటెడ్ ఎయిర్‌లైన్స్‌కు చెందిన బోయింగ్ 787-8 డ్రీమ్‌లైనర్ UA108) విమానం వాషింగ్టన్ డల్లెస్ ఎయిర్‌పోర్టు నుంచి జర్మనీలోని మ్యూనిచ్‌కు బయలుదేరింది. టేకాఫ్ అయిన కొద్దిసేపటికే ఇంజిన్ విఫలం కావడంతో మేడే సిగ్నల్ ప్రకటించాల్సి వచ్చింది. విమానం దాదాపు 5 వేలఅడుగుల ఎత్తుకు చేరుకున్న సమయంలో ఎడమవైపు ఇంజిన్ విఫలమైంది. వెంటనే విమాన సిబ్బంది ఎమర్జెన్సీ ప్రకటించి, సురక్షితంగా దింపేందుకు ప్రయత్నాలు ప్రారంభించారు. ఏటీసీని సమన్వయం చేసుకుంటూ ఇంధనాన్ని ఖాళీ చేయడం కోసం 2. 38 గంటల పాటు గాల్లోనే ఉంచారు.

ఫ్టైల్‌అవేర్ అందించిన డేటా ప్రకారం.. వాషింగ్టన్ వాయువ్య దిశలో విమానం సుమారు 2 గంటల 38 నిమిషాలపాటు గాల్లోనే ఉండి, భద్రంగా ఇంధనం ఖాళీ చేయడానికి ‘హోల్డింగ్ ప్యాటర్న్’లో చక్కర్లు కొట్టింది. ఈ సమయంలో విమానం 6 వేల అడుగుల ఎత్తులో కొనసాగింది. విమాన బరువు తగ్గించేందుకు ఇంధనం పూర్తీగా అయిపోయేలా ఏటీసీ నుంచి పైలట్లు అనుమతి తీసుకున్నారు. ఆ సమయంలో గాల్లో ఉన్న ఇతర విమానాలకు ఇబ్బంది కలగకుండా ఎటువంటి ప్రమాదాలు జరగకుండా ఉండేందుకు ఏటీసీ నిపుణులు సూచనలు అందించారు.

ఇంధనం ఖాళీ అయిన తర్వాత ఇన్‌స్ట్రుమెంట్ ల్యాండింగ్ సిస్టమ్ (ఐఎల్ఎస్) సహాయంతో విమానం రన్‌వైపై దిగడానికి పైలట్లు అనుమతి కోరారు. రన్‌వై 19పై ల్యాండింగ్‌కు అనుమతించడంతో సురక్షితంగా కిందకు దింపారు. ఎడమవైపు ఇంజిన్ పూర్తిగా పనిచేయకపోవడం వల్ల విమానం ముందుకు వెళ్లలేకపోయింది. దానిని రన్‌వే నుంచి గ్రౌండ్ సిబ్బంది సహాయంతో పక్కకు తీసుకెళ్లారు. ప్రస్తుతం ఈ విమానం వాషింగ్టన్ డల్లెస్ ఎయిర్‌పోర్టులోనే ఉంది.

ఈ సంఘటనలో ఎవ్వరికీ ఎటువంటి చిన్న గాయం కూడా కాకపోవడంతో అందరూ ఊపిరిపీల్చుకున్నారు. పైలట్ల సమయస్ఫూర్తి, గ్రౌండ్ సిబ్బంది సమర్థవంతమైన సహకారంతో పెను ప్రమాదం తప్పింది. అయితే, ఈ ఘటనపై యునైటెడ్ ఎయిర్‌లైన్స్‌తో పాటు సంబంధిత విభాగాలు మరింత లోతైన దర్యాప్తు చేపట్టనున్నాయి.

ఇటీవల అహ్మదాబాద్‌లో జరిగిన ఎయిరిండియా విమాన ప్రమాదాన్ని ఈ సంఘటన గుర్తు చేసింది. లండన్‌కు బయలుదేరిన బోయింగ్ 787-8 డ్రీమ్లైనర్ టేకాఫ్ అయిన కాసేపటికే ఇంజిన్ విఫలమై.. అదుపుతప్పి కూలిపోయింది. దీంతో భారీ ఎత్తున మంటలు చెలరేగి అందులోని 240 మందితో పాటు 270 మంది ప్రాణాలు కోల్పోయారు.