గూగుల్ స్ట్రీట్ వ్యూ ఫొటోల్లో పోలీస్ ఆఫీసర్ నగ్న ఫొటో.. కోర్టుకెళ్తే రూ.10 లక్షల నష్ట పరిహారం

డిజిటల్ యుగంలో వ్యక్తిగత గోప్యతకు సంబంధించిన హక్కులు ఎంత కీలకమో తెలియజేస్తూ.. అర్జెంటీనాలో ఒక ఆసక్తికరమైన కోర్టు తీర్పు వెలువడింది. గూగుల్ స్ట్రీట్ వ్యూ వాహనం తన నగ్న చిత్రాన్ని ఆన్‌లైన్‌లో ప్రచురించినందుకు గాను.. ఒక వ్యక్తి సదరు సంస్థపై పరవు నష్టం దావా వేశాడు. విచారణ జరిపిన న్యాయస్థానం అది నిజమేనని తేల్చి.. గూగుల్ సంస్థకు 12,500 డాలర్లు (భారతీయ కరెన్సీలో సుమారు రూ. 10.81 లక్షలు) పరిహారం చెల్లించాలని తీర్పు నిచ్చింది.

అసలేం జరిగిందంటే..?

2017లో అర్జెంటీనాకు చెందిన పోలీసు అధికారి బ్రగాడో.. తన ఇంటి పెరట్లో పని చేసుకుంటుంన్నారు. ఆసమయంలో ఆయన నగ్నంగా ఉండగా.. గూగుల్ స్ట్రీట్ వ్యూ సర్వే వాహనం ఫొటోలు తీసుకుంటూ వెళ్తోంది. వీధుల ఫొటోలు మాత్రమే తీసినప్పటికీ.. అతడు పెరట్లో ఉండగా ఫొటోల్లో పడ్డాడు. ఆ విషయం గుర్తించని సిబ్బంది.. ఆ నగ్న చిత్రాన్ని గూగుల్ స్ట్రీట్ వ్యూలో పోస్ట్ చేశారు. అయితే ఆ ఫొటోలో అతడు మాత్రమే కాకుండా ఆయన ఇంటి నంబర్, వీధి పేరు కూడా స్పష్టంగా కనిపించాయి. దీంతో ఇది కాస్తా సోషల్ మీడియాలో వైరల్‌గా మారింది. అలాగే టీవీ ఛానెళ్లలోనూ ప్రముఖంగా వార్తలు వచ్చాయి. ఇలా బ్రూడో ఫొటో దేశ వ్యాప్తంగా తెగ వైరల్ అయిపోయింది.

అయితే తన గోప్యత, వ్యక్తిగత ప్రతిష్ట తీవ్రంగా దెబ్బతిన్నాయని భావించిన ఆ వ్యక్తి గూగుల్‌పై న్యాయ పోరాటం ప్రారంభించారు. ముఖ్యంగా తన అనుమతి లేకుండా, తాను నగ్నంగా ఉన్న చిత్రాన్ని బహిరంగంగా ప్రచురించడం ద్వారా గూగుల్ తన హక్కులను ఉల్లంఘించిందని కోర్టుకు తెలిపారు. ఈ కేసును విచారించిన న్యాయస్థానం అతనికి అనుకూలంగా తీర్పు చెప్పింది. గూగుల్ గోప్యతా ప్రమాణాలను పాటించడంలో విఫలమైందని నిర్ధారించి.. అతని ప్రైవసీ హక్కును ఉల్లంఘించినందుకు నష్ట పరిహారంగా భారీ మొత్తాన్ని చెల్లించాలని ఆదేశాలు జారీ చేసింది. ముఖ్యంగా 12,500 డాలర్లను అతడికి గూగుల్ సంస్థ ఇవ్వాలని తీర్పునిచ్చింది.

ఈ తీర్పు డిజిటల్ ప్రపంచంలో వినియోగదారుల గోప్యత ఎంత ముఖ్యమో తెలియజేస్తుంది. గూగుల్ స్ట్రీట్ వ్యూ వంటి ప్లాట్‌ఫారమ్‌లు విస్తృత ప్రాంతాలను మ్యాప్ చేస్తున్నప్పుడు.. ప్రజల వ్యక్తిగత గోప్యతను గౌరవించాల్సిన బాధ్యతను కలిగి ఉంటాయి. ముఖ్యంగా ముఖాలను, లైసెన్స్ ప్లేట్ నంబర్‌లను బ్లర్ చేయడం వంటి భద్రతా చర్యలు తీసుకుంటాయి. కానీ ఈ కేసులో మాత్రం అధికారులు ఆ జాగ్రత్తలు తీసుకోలేరని రుజువు కావడంతో.. భారీ జరిమానాను ఎదుర్కోవాల్సి వస్తోంది. ఈ తీర్పు.. ప్రజల అనుమతి లేకుండా వారి సున్నితమైన చిత్రాలను ప్రచురించడం తీవ్ర పరిణామాలకు దారి తీస్తుందని స్పష్టం చేస్తోంది.