రష్యా, జపాన్ భూకంపంతో భారత్‌కు సునామీ ముప్పు

రష్యాలోని సుదూర తూర్పు ప్రాంతమైన కామ్చాట్కా తీరంలో బుధవారం 8.8 తీవ్రతతో భారీ భూకంపం సంభవించిన విషయం అందరికీ తెలిసిందే. దీని ఫలితంగానే పసిఫిక్ మహాసముద్రం వెంబడి పలు దేశాలను సునామీ తాకింది. దీంతో అందరూ భారత దేశానికి, హిందూ మహాసముద్ర ప్రాంతానికి కూడా సునామీ తాకే అవకాశం ఉందని భావించారు. ఈక్రమంలోనే భారత జాతీయ సముద్ర సమాచార సేవల కేంద్రం (ఇన్‌కాయిస్ - ఇండియన్ నేషనల్ ఫర్ ఓషన్ ఇన్ఫర్మేషన్ సర్వీసెస్) పలు ఆసక్తికర విషయాలను తెలిపింది. ముఖ్యంగా ఇండియా, మహాసముద్ర ప్రాంతానికి ఎలాంటి సునామీ ముప్పు లేదని స్పష్టం చేసింది.

ఇన్‌కాయిస్ ఈమేరకే ఎక్స్ వేదికగా ఓ పోస్టు పెట్టింది. అందులో కామ్చాట్కా తూర్పు తీరంలో 8.8 తీవ్రతతో భూకంపం వచ్చిందని వివరించింది. అనంతరం సునామీ తాకిందని చెప్పింది. అయితే దీని కారణంగా భారత్‌‍కు ఎలాంటి సునామీ ముప్పు లేదని పేర్కొంది. అలాగే హిందూ మహాసముద్ర తీర ప్రాంతాలకు కూడా ఎలాంటి ముప్పు లేదని రాసుకొచ్చింది. ఐఎన్‌సీవోఐఎస్ (INCOIS) అధికారులు సైతం మాట్లాడుతూ.. భారత్‌కు సునామీ ముప్పు లేదని, ప్రజలు భయపడాల్సిన అవసరం లేదని భరోసా ఇచ్చారు. ఈ భూకంపం హిందూ మహాసముద్రానికి దూరంగా ఉండటం వల్ల సునామీ తరంగాలు భారత తీరాన్ని చేరే అవకాశం లేదని స్పష్టం చేశారు. ఐఎన్‌సీవోఐఎస్ నిరంతరం పరిస్థితిని పర్యవేక్షిస్తోందని.. అవసరమైతే తక్షణ సమాచారాన్ని అందించడానికి సిద్ధంగా ఉందని పేర్కొన్నారు.

 భూకంపం సంభవించిన వెంటనే జపాన్, అమెరికా, పలు పసిఫిక్ దీవులు, చిలీ, సోలోమన్ దీవులు, రష్యా, ఈక్వెడార్ వంటి దేశాలకు సునామీ హెచ్చరికలు జారీ అయ్యాయి. జపాన్‌లోని హోక్కైడో దీవిలోని నెమురోలో సుమారు 3 మీటర్ల ఎత్తున సునామీ తరంగాలు తీరాన్ని తాకాయి. రష్యాలోని కురిల్ దీవుల తీర ప్రాంతాలు.. ముఖ్యంగా సెవెరో-కురిల్స్క్‌ కూడా సునామీ ప్రభావానికి గురై.. అక్కడి ప్రజలను సురక్షిత ప్రాంతాలకు తరలించారు.

పసిఫిక్ సునామీ హెచ్చరిక కేంద్రం (PTWC) అంచనా ప్రకారం.. కోస్టారికా, ఫ్రెంచ్ పాలినేషియా, గువాయ్, హవాయి, జపాన్, జార్విస్ ఐలాండ్, జాన్‌సటన్ అటోల్, కిరిబాటి, మిడ్ వే ఐలాండ్, పాల్మిరా ఐలాండ్, పెరూ, సమోవా, చిలీ, జపాన్, సోలోమన్ దీవులకు 1 నుంచి 3 మీటర్ల ఎత్తు వరకు అలలు ఎగిసిపడే అవకాశం ఉంది. రష్యా, ఈక్వెడార్‌లలో ఈ కెరటాలు 3 మీటర్లకు మించి ఉండవచ్చని హెచ్చరించింది.

అంతేకాకుండా అంటార్కిటికా, ఆస్ట్రేలియా, చుక్, కొలంబియా, కుక్ దీవులు, ఎల్ సాల్వడార్, ఫిజీ, గ్వాటెమాలా, ఇండోనేషియా, మెక్సికో, న్యూజిలాండ్, నికరాగ్వా, పనామా, పపువా న్యూగినీ, ఫిలిప్పీన్స్, తైవాన్ తదితర దేశాల్లో 0.3 నుంచి 1 మీటరు ఎత్తు వరకు అలలు వచ్చే అవకాశం ఉందని చెప్పింది. ఇక 0.3 మీటర్ల కంటే తక్కువ ఎత్తులో అలలు వచ్చే మప్పు ఉన్న జాబితాలో బ్రూనై, చైనా, ఉత్తర కొరియా, దక్షిణ కొరియా, మలేసియా, వియత్నాం దేశాలు ఉన్నాయి.