పోస్టింగ్ తొలి రోజే.. లాయర్ల ముందు గుంజీలు తీసిన కలెక్టర్

జిల్లా కలెక్టర్ ఒకరు గుంజీలు తీసిన ఘటన ఒకటి ప్రస్తుతం సంచలనంగా మారింది. పరిసరాలు అపరిశుభ్రంగా ఉన్నాయనే కారణం వల్ల ఆయన ఇలా గుంజీలు తీశారు. అది కూడా లాయర్ల ముందు. ఈ సంఘటన ఉత్తరప్రదేశ్, షహనాజ్‌పూర్ జిల్లాలో చోటు చేసుకుంది. జిల్లాకు సబ్ డివిజనల్ మెజిస్ట్రేట్ అధికారిగా వచ్చిన ఐఏఎస్ రింకు సింగ్ రాహి అనే అధికారి పోస్టింగ్ తొలి రోజే ఊహించని పని చేసి వార్తల్లో నిలిచారు. నిరసన చేస్తున్న లాయర్ల ఎదురుగా గుంజీలు తీశారు. ఆ తర్వాత బహిరంగ క్షమాపణ తెలిపారు. అసలేం జరిగిందంటే..

నిన్న అనగా మంగళవారం తనిఖీలు నిర్వహిస్తుండగా ఈ సంఘటన చోటు చేసుకుంది. సబ్ డివిజనల్ ఆఫీసు పరిసరాలు పరిశుభ్రంగా లేకపోవడాన్ని గమనించిన ఐఏఎస్ అధికారి రాహి.. అక్కడంతా ఉమ్మేయడం, బహిరంగ ప్రదేశాల్లో మూత్ర విసర్జన చేయడం గమనించారు. ఈక్రమంలో అలాంటి పనులు చేయవద్దని వారిని వారించాడు. కానీ వినకపోవడంతో బహిరంగ ప్రదేశంలో మూత్ర విసర్జన చేసిన వ్యక్తి చేత గుంజీలు తీయించాడు.

అలానే కొందరు పిల్లలు సబ్ డివిజనల్ ఆఫీసు పరిసరాల్లో చక్కర్లు కొట్టడం రాహి గమనించారు. ఆ పిల్లల తల్లిదండ్రులు కూడా అక్కడే ఉన్నారు. వారు పిల్లలను వారించలేదు. దీంతో రాహి.. ఆ తల్లిదండ్రుల చేత కూడా గుంజీలు తీయించారు. అయతే కలెక్టర్ చర్యలు వివాదానికి దారి తీశాయి. ఆయన చర్యలకు వ్యతిరేకంగా కొందరు లాయర్లు ధర్నాకు దిగారు.

ఈ సందర్భంగా ఒక లాయర్ మాట్లాడుతూ.. ఈరోజు ఎస్‌డీఎం మా ఆఫీసు పరిసరాలను తనిఖీ చేయడానికి వచ్చారు. అప్పుడు మా క్లర్క్ ఒకరు బహిరంగ ప్రదేశంలో మూత్ర విసర్జన చేస్తున్నాడు. ఇది చూసిన రాహి.. మా క్లర్క్ చేత గుంజీలు తీయించారు. మా సిబ్బంది చేత అలా చేయించాల్సిన అవసరం ఏంటని మేం ప్రశ్నించాం’ అని చెప్పుకొచ్చారు.

రాహి మాట్లాడుతూ.. లాయర్లు.. క్లర్క్ చేత గుంజీలు ఎందుకు తీయించారని నన్ను ప్రశ్నించారు. మరోసారి ఈ తప్పు చేయకుండా ఉండటం కోసం ఇలాంటి శిక్ష విధించానని నేను వారికి తెలిపాను. దాంతో వారు మీ కార్యాలయం పరిసరాలు కూడా పరిశుభ్రంగా లేవు కదా అందుకు మీరు కూడా గుంజీలు తీస్తారా అనిప్రశ్నించారు. అప్పుడు నేను అవును అది నా తప్పే.. అందుకు శిక్షగా నేను గుంజీలు తీస్తాను అని చెప్పి.. ఆందోళనకు దిగిన లాయర్ల ముందు గుంజీలు తీశాను’ అని చెప్పుకొచ్చారు. రాహి వారికి బహిరంగ క్షమాపణ చెప్పిన తర్వాత లాయర్లు ఆందోళన విరమించారు. ఇప్పుడీ సంఘటన సంచలంగా మారింది.