ఎంపీ బాలశౌరి ఆఫీసులో పనిచేసే వ్యక్తి నిర్వాకం.. ఉద్యోగాలు ఇప్పిస్తానంటూ మోసం

నిరుద్యోగ యువత ఆశలు, ఆశయాలను వాడుకుంటూ.. అందినకాడికి దోచుకున్న మరో వ్యవహారం బయటకు వచ్చింది. నకిలీ ఆఫర్ లెటర్లు సృష్టించి.. అమాయకపు యువతను మోసం చేస్తున్న వైనం వెలుగు చూసింది. అయితే ఇందుకు ఏకంగా ఎంపీ పేరునే వాడుకోవటం ప్రాధాన్యం సంతరించుకుంది. జనసేనకు చెందిన మచిలీపట్నం ఎంపీ వల్లభనేని బాలశౌరి కార్యాలయంలో పనిచేస్తున్న గోపాల్ సింగ్ అనే వ్యక్తి ఈ మోసాలకు పాల్పడినట్లు ఆరోపణలు వస్తున్నాయి. గోపాల్ సింగ్ తాను ఎంపీ వల్లభనేని బాలశౌరి పీఏనని చెప్తూ.. ఉద్యోగాలు ఇప్పిస్తానని డబ్బులు వసూలు చేసినట్లు తెలిసింది. ఇలా సుమారుగా వంద మంది నుంచి గోపాల్ సింగ్ డబ్బులు వసూలు చేసినట్లు సమాచారం. మచిలీపట్నం వైద్య కళాశాల, కృష్ణ యూనివర్సిటీ, విద్యుత్ శాఖలో ఉద్యోగాలు ఇప్సిస్తానని ఒక్కొక్కరి వద్దా 1.50 లక్షల నుంచి రూ.2.50 లక్షల వరకూ వసూలు చేసినట్లు సమాచారం. మొత్తం వంద మంది బాధితుల నుంచి కోటిన్నర వరకూ గోపాల్ సింగ్ వసూలు చేసినట్లు బాధితులు ఆరోపిస్తున్నారు.

డబ్బులు తీసుకున్న తర్వాత తమకు నకిలీ అపాయింట్‌మెంట్ లెటర్లు కూడా ఇచ్చారని బాధితులు చెప్తున్నారు. అయితే అపాయింట్‌మెంట్ లెటర్లు ఇచ్చి రోజులు గడుస్తున్నా కూడా ఉద్యోగంలోకి ఎందుకు తీసుకోవడం లేదనే ప్రశ్నిస్తే.. మరోరకం మోసానికి గోపాల్ సింగ్ పాల్పడినట్లు బాధితులు చెప్తు్న్నారు. ఆలస్యమైందంటూ ఎంపీ వల్లభనేని బాలశౌరి సంతకంతో కూడిన లెటర్ ప్యాడ్లు ఇచ్చినట్లు సమాచారం. అలాగే విజయవాడలోని ఓ హోటల్‌కు రావాలని చెప్పారని.. తీరా అక్కడకు వెళ్లి చూస్తే ఎవరూ లేరని బాధితులు వాపోతున్నారు. దీంతో గోపాల్ సింగ్‌కు ఫోన్ చేశామని.. స్విఛాప్ వచ్చిందన్నారు. ఎంపీ ఆఫీసుకు వెళ్తే గోపాల్ సింగ్ అసలు వ్యవహారం బయటకు వచ్చిందని చెప్తున్నారు. బాలశౌరి కార్యాలయం సిబ్బంది తమకు డబ్బులు వాపస్ ఇప్పిస్తామని హామీ ఇచ్చినట్లు బాధితులు చెప్తున్నారు.

మరోవైపు గోపాల్ సింగ్‌ను పోలీసులు అరెస్ట్ చేశారనే వార్తలు రావటంతో బాధితులు అందరూ జనసేన ఎంపీ బాలశౌరి ఇంటి ఎదుట శనివారం ఆందోళనకు దిగారు. పోలీసు కేసు పెడితే తమ డబ్బులు వెనక్కి రావని.. ఈ విషయంలో ఎంపీ బాలశౌరి కలుగజేసుకుని తమ డబ్బులు తమకు వెనక్కి ఇప్పించాలని కోరుతున్నారు. అలాగే తాము ఫిర్యాదు చేయకుండానే గోపాల్ సింగ్‌ను పోలీసులు ఎలా అరెస్ట్ చేస్తారని ప్రశ్నిస్తున్నారు. అయితే గోపాల్ సింగ్ అరెస్ట్ వ్యవహారంపై పోలీసులు ఇంకా స్పందించలేదు. ఆయన పరారీలో ఉన్నట్లు వార్తలు వస్తున్నాయి.