ప్రజ్వల్ రేవణ్ణ అత్యాచారం కేసు..జీవిత ఖైదు శిక్ష విధిస్తూ కోర్టు సంచలన తీర్పు

అత్యాచారం కేసులో మాజీ ప్రధాని హెచ్.డి. దేవెగౌడ మనవడు.. మాజీ ఎంపీ ప్రజ్వల్ రేవణ్ణకు జీవిత ఖైదు పడింది. బెంగళూరులోని ప్రత్యేక కోర్టు ప్రజ్వల్ రేవణ్ణకు జీవిత ఖైదు విధించింది. ఈ కేసులో ప్రజ్వల్ రేవణ్ణను శుక్రవారమే కోర్టు దోషిగా తేల్చిన సంగతి తెలిసిందే. తాజాగా ప్రత్యేక కోర్టు శిక్షను ఖరారు చేసింది. 47 ఏళ్ల మహిళపై అత్యాచారం చేశారంటూ ప్రజ్వల్ రేవణ్ణపై కేసు నమోదైన సంగతి తెలిసిందే. తనపై అత్యాచారం చేయడమే కాకుండా వీడియో తీశారంటూ బాధితురాలు ఫిర్యాదు చేసింది.

ఈ కేసుకు సంబంధించి ప్రజ్వల్ రేవణ్ణపై అత్యాచారం, లైంగిక వేధింపులు, సాక్ష్యాలను నాశనం చేసే ప్రయత్నం వంటి ఆరోపణలు రాగా.. కోర్టు విచారణలో నిజమని తేలింది. దీంతో శనివారం ప్రత్యేక న్యాయస్థానం జీవిత ఖైదు విధిస్తూ తీర్పు వెలువరించింది. ప్రజ్వల్ రేవణ్ణకు జీవిత ఖైదుతో పాటుగా రూ.10లక్షల జరిమానాను ప్రత్యేక న్యాయస్థానం విధించింది. బాధితురాలికి రూ.7లక్షల పరిహారం ఇవ్వాలని ప్రత్యేక కోర్టు ఆదేశించింది.ఈ కేసులో ప్రజ్వల్ రేవణ్ణ అరెస్ట్ తర్వాత సుమారు 14 నెలల విచారణ అనంతరం జడ్జి సంతోష్ గజానన భట్ తీర్పు వెలువరించారు.

మరోవైపు అత్యాచారం కేసులో తనకు తక్కువ శిక్ష వేయాలని వేడుకుంటూ ప్రజ్వల్ రేవణ్ణ జడ్జి ఎదుట కన్నీరు పెట్టుకున్నట్లు తెలిసింది. ఆగస్ట్ ఒకటో తేదీ( శుక్రవారం) దోషిగా ప్రకటించిన సమయంలోనూ ప్రజ్వల్ రేవణ్ణ భావోద్వేగానికి గురై కన్నీరు పెట్టుకున్నారు. ఈ కేసుకు సంబంధించిన వివరాల్లోకి వెళ్తే.. 2024 ఏప్రిల్ 28వ తేదీన ప్రజ్వల్ రేవణ్ణపై హోళెనరసీపుర పోలీస్ స్టేషన్‌లో ఓ మహిళ ఫిర్యాదు చేశారు. గన్నిగడ ఫాంహౌజ్‌లో తనపై అఘాయిత్యానికి పాల్పడ్డారంటూ బాధితురాలు ఫిర్యాదు చేయటంతో ప్రజ్వల్ రేవణ్ణపై అత్యాచారం కేసు నమోదైంది. అనంతరం మరికొన్ని కేసులు కూడా ప్రజ్వల్ రేవణ్ణ మీద నమోదయ్యాయి.

 మరోవైపు ప్రజ్వల్ రేవణ్ణకు సంబంధించి వందలాది పెన్ డ్రైవ్‌లు లభ్యం కావటం 2024లో సంచలనం రేపింది. ఆ తర్వాత ఆయన జర్మనీకి వెళ్లిపోయారు. ఎన్నికలు ముగిసిన తర్వాత భారతదేశానికి తిరిగి రాగా.. 2024 మే 31న పోలీసులు బెంగళూరు ఎయిర్‌పోర్టులో అరెస్ట్ చేశారు. అప్పటి నుంచి సుమారు 14 నెలలుగా రిమాండ్ ఖైదీగా ఉన్నారు. శుక్రవారం ఈ కేసులో ప్రజ్వల్ రేవణ్ణను దోషిగా తేల్చిన న్యాయస్థానం.. శనివారం రోజు జీవిత ఖైదు విధిస్తూ తీర్పును ప్రకటించింది.