బీఎల్‌వో గౌరవ వేతనాలు పెంపు.. ఒకేసారి రెట్టింపు

ప్రజాస్వామ్య దేశంలో ఎన్నికలది ముఖ్య పాత్ర. ప్రజాస్వామ్యానికి ఎన్నికలే పునాది వంటివి. అలాంటి ఎన్నికల్లో ఓటరు జాబితా అత్యంత కీలకం. జాతీయ రాజకీయాలను, బిహార్ ఓటర్ జాబితాపై జరుగుతున్న రచ్చను గమనిస్తే.. ఓటరు జాబితాకు ఉన్న ప్రాధాన్యం అర్థమవుతుంది. అంతటి ముఖ్యమైన ఓటరు జాబితా తయారీలో కీలకపాత్ర పోషించేవారే బీఎల్‌వో.. అంటే బూత్ లెవల్ ఆఫీసర్స్.. అయితే బూత్ లెవల్ ఆఫీసర్స్ వేతనాలు పెంపు జరిగి సుమారుగా పదేళ్లు కావొస్తోంది. ఇన్నాళ్లకు బీఎల్‌వోల గౌరవ వేతనాలను పెంచారు. ఇప్పటి వరకూ బూత్ లెవల్ ఆఫీసర్లు , సూపర్ వైజర్లకు మాత్రమే ఏడాది కాలానికి గౌరవ వేతనం చెల్లించేవారు. ఎన్నికల సంఘం ఆదేశాల ప్రకారం ఇప్పుడు ఎలక్ట్రోరల్ రిజిస్ట్రేషన్ ఆఫీసర్, అసిస్టెంట్ ఎలక్ట్రోరల్ రిజిస్ట్రేషన్ ఆఫీసర్లకు కూడా గౌరవ వేతనం చెల్లించనున్నారు. ఈ మేరకు ఉత్తర్వులు విడుదలయ్యాయి.

మరోవైపు బూత్ లెవల్ ఆఫీసర్లకు (బీఎల్‌వో) ఏడాదికి గానూ గౌరవ వేతనంగా గతంలో రూ.6000 చెల్లించేవారు. ఇప్పుడా మొత్తాన్ని రూ.12000లకు పెంచారు. అలాగే సూపర్ వైజర్లకు గతంలో 12 వేల రూపాయలుగా గౌరవ వేతనం అందించేవారు. ఇప్పుడు దానిని 18 వేలకు పెంచారు. ఎలక్ట్రోరల్ రిజిస్ట్రేషన్ ఆఫీసర్లకు ఏడాది కాలానికి రూ.30000, అసిస్టెంట్ ఎలక్ట్రోరల్ రిజిస్ట్రేషన్ ఆఫీసర్లకు రూ.25000 చొప్పున చెల్లించనున్నారు. 2015లో బీఎల్‌వోల గౌరవ వేతనాన్ని రూ.6000లకు పెంచగా.. ఇప్పుడు దానిని రూ.12000 లకు పెంచారు. మరోవైపు ఉత్తమ పనితీరు కనబరిచే బూత్ లెవల్ ఆఫీసర్లకు ప్రోత్సాహకం కింద మరో ఆరు వేలు కూడా అందిస్తారు.

మరోవైపు ఆంధ్రప్రదేశ్ విషయానికి వస్తే నాలుగేళ్లుగా బీఎల్‌వోలకు గౌరవ వేతనాలు పెండింగ్‌లో ఉండేవి. అయితే తాజాగా కూటమి ప్రభుత్వం వీటిని ఒకేసారి మంజూరు చేసింది. ప్రస్తుతం గౌరవ వేతనాలను రూ.6000 నుంచి ఒకేసారి రూ.12000 అంటే రెట్టింపు చేయటంతో బీఎల్‌వోలు హర్షం వ్యక్తం చేస్తున్నారు.

మరోవైపు ప్రతి ఎన్నికల బూత్‌కు ఓ బూత్ లెవల్ ఆఫీసర్ ఉంటే.. ప్రతి నియోజకవర్గానికి ఒక ఎలక్ట్రోరల్ రిజిస్ట్రేషన్ ఆఫీసర్, అసిస్టెంట్ ఎలక్ట్రోరల్ రిజిస్ట్రేషన్ ఆఫీసర్ ఉంటారు. ప్రభుత్వ శాఖలలో పనిచేస్తున్న వారినే బూత్ లెవల్ ఆఫీసర్లు, ఈఆర్‌వో, ఏఈఆర్‌వోలుగా నియమిస్తూ ఉంటారు. గతంలో కేవలం బీఎల్వోలకు మాత్రమే గౌరవ వేతనాలు చెల్లించేవారు.. ఇప్పుడు ఈఆర్వో, ఏఈఆర్వోలకు కూడా గౌరవ వేతనాలు చెల్లించనున్నారు.