ఆస్తి తాకట్టు పెట్టి లోన్ తీసుకోవచ్చు

కొంత కాలంగా బ్యాంకుల్లో లోన్లు తీసుకునే వారి సంఖ్య పెరిగిందని చెప్పొచ్చు. బ్యాంకులు ఒకప్పటి కంటే ఇప్పుడు లోన్లు కాస్త వేగంగా.. పెద్దగా డాక్యుమెంటేషన్‌ లేకుండానే రుణాలు మంజూరు చేస్తున్నాయి. ఇంకా జనం అవసరాలు కూడా పెరిగిపోయాయి. అందుకే ఎక్కువగా పర్సనల్ లోన్లు తీసుకునేందుకు మొగ్గు చూపిస్తున్నారు. కాస్త తక్కువ వడ్డీకి లభిస్తాయని బంగారం తాకట్టు పెట్టి గోల్డ్ లోన్స్ కూడా తీసుకుంటుంటారు. పర్సనల్ లోన్ల విషయంలో మనం ఏం తనఖా/హామీ పెట్టము కాబట్టి ఇక్కడ సేఫ్టీ ఉండదు. వడ్డీ రేట్లు ఎక్కువగా ఉంటాయి. అందుకే వీటిని అన్‌సెక్యుర్డ్ లోన్స్ అంటారు. అయితే.. వీటికి ప్రత్యామ్నాయంగా ఆస్తులు ఉన్న వారు.. వాటిని బ్యాంకులకు తాకట్టు పెట్టి లోన్ తీసుకోవచ్చన్న సంగతి మీకు తెలుసా?

ఈ లోన్లు కూడా అంత ఈజీగా వస్తాయని అనుకోవద్దు. ఇక్కడ ఆస్తికి, అప్లై చేసిన వారికి సంబంధించిన ఎన్నో విషయాల్ని బ్యాంకులు పరిగణనలోకి తీసుకుంటాయి. ఇక్కడ మీరేం తెలుసుకోవాలనేది చూద్దాం.

>> మీ ప్రాపర్టీ వాల్యూలో బ్యాంక్ దాదాపు 60 నుంచి 70 శాతం వరకు లోన్ ఇస్తుంది. ప్రాపర్టీ చుట్టున్న మౌలిక సదుపాయాలు, ఇంటి వయసుపై ఆధారపడి బ్యాంక్ లోన్ ఇస్తుందని చెప్పొచ్చు. ఈఎంఐ చెల్లించేటప్పుడు.. లోన్ తీసుకున్న వ్యక్తి తాకట్టు పెట్టిన ఇంట్లో నివాసం ఉండొచ్చు కానీ ఆ ఆస్తి అమ్మే అధికారం ఉండదు. ఇంకా మీరు ఈఎంఐ చెల్లించకుండా డిఫాల్ట్ అయితే నిబంధనల్ని బట్టి బ్యాంకు.. సదరు ఆస్తిని వేలం వేస్తుంది.

>> ఇక్కడ లోన్ తీర్చే వ్యవధి సాధారణంగా 15 సంవత్సరాల వరకు ఉంటుంది. కొన్నేమో కొన్ని రకాల ఆస్తులకు దాదాపు 20 ఏళ్ల వ్యవధి కూడా ఇస్తుంటాయి. అయితే కాల వ్యవధి పెరగడం వల్ల చెల్లించే ఈఎంఐ మొత్తం తగ్గినప్పటికీ.. వడ్డీ ఎక్కువ చెల్లించాల్సి వస్తుంది.

>> ఇక లోన్ ఆమోదించే ముందుగా సదరు ఆస్తికి ప్రభుత్వ ఆమోదం ఉందా.. మార్కెట్ విలువ ఎలా ఉంది వంటి విషయాల్ని ఆరా తీస్తాయి. ఇంకా అదే ఆస్తిపై వేరే రుణాలు ఉన్నాయా లేదా అనేది కూడా చెక్ చేస్తాయి. ఆస్తిపై రుణం తీసుకునే ముందు కూడా కొన్ని డాక్యుమెంట్లు అవసరం పడతాయి. ఇక్కడ కేవైసీ కోసం ఆధార్, పాన్ కార్డు; ఓటర్ ఐడీ వంటివి కావాల్సి ఉంటుంది. వేతనజీవి అయితే 3 నెలల ప్లే స్లిప్స్, 6 నెలల బ్యాంక్ స్టేట్మెంట్, ఫారం- 16 వంటివి చూయించాలి.

చివరగా ఈ రుణాల వడ్డీ రేట్లు బ్యాంకుల్ని బట్టి మారుతుంటాయి. జీతం పొందే వ్యక్తితో పోలిస్తే స్వయం ఉపాధి అంటే సెల్ఫ్ ఎంప్లాయిడ్ (బిజినెస్) వ్యక్తికి వడ్డీ రేట్లు కాస్త అధికంగా ఉండొచ్చు. ఇంకొన్ని బ్యాంకులు లోన్ ప్రీపేమెంట్, ఫోర్ క్లోజర్ వంటి వాటికి ఛార్జీలు విధిస్తాయని గుర్తుంచుకోవాలి. లోన్ తీసుకునే ముందు అన్ని నిబంధనలు, షరతుల్ని తప్పక చదవాలి.