పారాసెటమాల్‌పై నిషేధం విధించలేదని స్పష్టం చేసిన కేంద్రం

జ్వరం వచ్చినప్పుడు అత్యంత సాధారణంగా వినియోగించే పారాసెటమాల్ ఔషధంపై దేశంలో ఎలాంటి నిషేధం విధించలేదని కేంద్ర ప్రభుత్వం స్పష్టం చేసింది. ఈ డ్రగ్‌ను కేంద్ర ఔషధ ప్రమాణాల నియంత్రణ సంస్థ నిషేధించిందంటూ వస్తున్న పుకార్లలో ఏమాత్రం వాస్తవం లేదని తేల్చిచెప్పింది. మంగళవారం నాడు పార్లమెంట్ వర్షాకాల సమావేశాల సందర్భంగా కేంద్ర రసాయనాలు, ఎరువుల శాఖ సహాయ మంత్రి అనుప్రియ పటేల్ ఈ విషయంపై అధికారికంగా వివరణ ఇచ్చారు.పారాసెటమాల్‌ను నిషేధించినట్లు తమ దృష్టికి ఎలాంటి సమాచారం రాలేదని కేంద్ర ఆరోగ్య, కుటుంబ సంక్షేమ మంత్రిత్వ శాఖ తెలిపిందని అనుప్రియ పటేల్ అన్నారు. అయితే, పారాసెటమాల్‌ను ఇతర మందులతో కలిపి తయారుచేసే కొన్ని రకాల ఫిక్స్‌డ్ డోస్ కాంబినేషన్లను మాత్రం గతంలో నిషేధించినట్లు ఆమె గుర్తుచేశారు. కేవలం పారాసెటమాల్‌పై మాత్రం ఎటువంటి ఆంక్షలు లేవని స్పష్టం చేశారు.ఈ సందర్భంగా జాతీయ ఆరోగ్య మిషన్ కింద ప్రభుత్వం అమలు చేస్తున్న ఉచిత మందుల పంపిణీ కార్యక్రమం గురించి మంత్రి వివరించారు. ప్రభుత్వ ఆసుపత్రులు, గ్రామీణ ప్రాథమిక ఆరోగ్య కేంద్రాలకు వచ్చే రోగులపై ఆర్థిక భారం తగ్గించేందుకు ఈ పథకాన్ని తీసుకొచ్చినట్లు తెలిపారు. దీని ద్వారా అత్యవసర మందులను ఉచితంగా అందిస్తున్నట్లు చెప్పారు.ఈ పథకం అమలు కోసం రాష్ట్రాలకు కేంద్రం ఆర్థిక సహాయం అందిస్తోందని అనుప్రియ పటేల్ పేర్కొన్నారు. మందుల కొనుగోలు, నాణ్యత హామీ, సరఫరా వ్యవస్థల నిర్వహణ, గిడ్డంగుల ఏర్పాటు వంటి వాటికి ఈ నిధులను వినియోగిస్తున్నట్లు తెలిపారు. మందుల లభ్యతను పర్యవేక్షించేందుకు డ్రగ్స్ అండ్ వ్యాక్సిన్ డిస్ట్రిబ్యూషన్ మేనేజ్‌మెంట్ సిస్టమ్ అనే ప్రత్యేక ఐటీ ప్లాట్‌ఫామ్‌ను కూడా ఏర్పాటు చేసినట్లు వెల్లడించారు.ప్రభుత్వ ఆరోగ్య కేంద్రాల్లో అందుబాటులో ఉంచాల్సిన అత్యవసర ఔషధాల జాబితాను కూడా ఆరోగ్య మంత్రిత్వ శాఖ సిఫార్సు చేసిందని ఆమె అన్నారు. ప్రభుత్వ ఆసుపత్రులు, గ్రామీణ ఆరోగ్య కేంద్రాలకు మందుల సరఫరా నిరంతరాయంగా కొనసాగేందుకు మెడికల్ స్టోర్స్ ఆర్గనైజేషన్ 697 రకాల ఔషధాలకు రేట్ కాంట్రాక్టులను కలిగి ఉందని ఆమె తన సమాధానంలో పేర్కొన్నారు.