అమెరికాలో మరో భారత సంతతి వ్యక్తికి ఉన్నత పదవి,,,,కట్టుబొట్టుపై విమర్శలు చేస్తోన్న పలువురు నెటిజన్లు

భారత సంతతికి చెందిన అడ్వకేట్ మథుర శ్రీధరన్ అమెరికాలోని ఓహియో రాష్ట్రానికి 12వ సొలిసిటర్ జనరల్‌గా నియమితులయ్యారు. ఇది భారతీయులు గర్వించదగ్గ విషయం. ఎందుకంటే.. ఇది మామూలు పదవి కాదు. రాష్ట్రంలోని అత్యున్నత అప్పీలేట్ లాయర్ పదవి. అంటే, హై-స్టేక్స్ కేసులను స్టేట్, ఫెడరల్ అప్పీల్ కోర్టుల ముందు, అవసరమైతే ఏకంగా అమెరికా సుప్రీం కోర్టు ముందు కూడా ఈమెనే వాదిస్తుంది. ఓహియో అటార్నీ జనరల్ డేవ్ యోస్ట్ స్వయంగా ఈ విషయాన్ని ప్రకటించారు. అంతా బాగానే ఉన్నా. ఆమె కట్టు బొట్టుతో ఇప్పుడు ఆమె విపరీతమైన ట్రోలింగ్ ఎదుర్కొంటున్నారు.

ఎవరీ మథుర శ్రీధరన్?

మథుర శ్రీధరన్ గతంలో ఓహియో సొలిసిటర్ జనరల్ కార్యాలయంలో డిప్యూటీ సాలిసిటర్ జనరల్‌గా పనిచేశారు. 2023లో ఓహియో vs ఈపీఏ కేసులో ఏకంగా అమెరికా సుప్రీం కోర్టులోనే వాదించారు. ఆమె న్యూయార్క్ యూనివర్సిటీ స్కూల్ ఆఫ్ లా నుంచి న్యాయశాస్త్రంలో డిగ్రీ పొందారు. అంతకు ముందు ఏకంగా మస్సాచుసెట్స్ ఇన్‌స్టిట్యూట్ ఆఫ్ టెక్నాలజీ (MIT) నుంచి ఎలక్ట్రికల్ ఇంజనీరింగ్ అండ్ కంప్యూటర్ సైన్స్, అలాగే ఎకనమిక్స్‌లో రెండు డిగ్రీలు, ఆ తర్వాత ఎం.ఎస్. కూడా పూర్తి చేశారు. ఇంజనీరింగ్, లా మాత్రమే కాదు.. ఆమెకు కర్ణాటక సంగీతంలో కూడా ప్రావీణ్యం ఉంది. 2010లో చెన్నై డిసెంబర్ మ్యూజిక్ సీజన్‌లో కూడా ఆమె ప్రదర్శన ఇచ్చారు.

అంత ఘనత సాధించిన మథురకు ఆన్‌లైన్‌లో కొంతమంది నుంచి విమర్శలు ఎదురయ్యాయి. ఆమె బొట్టు పెట్టుకోవడం చూసి, అలాగే ఆమె పేరును బట్టి, రంగును చూసి ఒక ‘అమెరికన్ కాని వ్యక్తి"కి ఇంత పెద్ద పదవి ఎందుకు ఇచ్చారని కొందరు విమర్శిస్తున్నారు. అయితే.. ఈ విమర్శలకు అటార్నీ జనరల్ డేవ్ యోస్ట్ గట్టిగానే సమాధానం ఇచ్చారు. ‘మథుర అమెరికన్ కాదు అని కొందరు తప్పుగా అంటున్నారు. ఆమె అమెరికా సిటిజెన్, ఒక అమెరికన్ సిటిజన్నే పెళ్లి చేసుకుంది. అంతేకాకుండా, ఆమె తల్లిదండ్రులు కూడా సహజ పౌరసత్వం పొందిన వారే’ అని ఆయన స్పష్టం చేశారు.

అలాగే ‘ఒకవేళ ఆమె పేరు, ఆమె రంగు మీకు ఇబ్బంది కలిగిస్తే, ఆ సమస్య ఆమెలో, ఆమె నియామకంలో లేదు.. మీలోనే ఉంది’ అని ఘాటుగా బదులిచ్చారు. ఆమె సుప్రీంకోర్టులో వాదించిన నైపుణ్యాన్ని, తనకున్న చట్టపరమైన ప్రతిభను ఆయన ఎంతగానో ప్రశంసించారు. మథుర శ్రీధరన్ ఓహియో రాష్ట్రానికి సేవ చేయడానికి పూర్తి అర్హురాలు అని ఆయన ధీమా వ్యక్తం చేశారు.