ట్రంప్ గోల్ఫ్ క్లబ్ వైపు దూసుకొచ్చిన విమానం.. అడ్డం తిరిగిన ఫైటర్ జెట్లు

అగ్రరాజ్యం అమెరికా మాజీ అధ్యక్షుడు డొనాల్డ్ ట్రంప్‌నకు చెందిన గోల్ఫ్ క్లబ్ మీదుగా ఒక సాధారణ పౌర విమానం నో-ఫ్లై జోన్‌లోకి ప్రవేశించడంతో అమెరికా భద్రతా వ్యవస్థ మరోసారి ఉలిక్కి పడింది. ఈ ఘటన జరిగిన సమయంలో ట్రంప్ న్యూజెర్సీలోని బెడ్‌మిన్‌స్టర్‌లో ఉన్న తన రిసార్ట్‌లోనే ఉన్నారు. ఈ ఘటనను గుర్తించిన వెంటనే నార్త్ అమెరికన్ ఏరోస్పేస్ డిఫెన్స్ కమాండ్ (NORAD) అప్రమత్తం అయింది. తక్షణమే ఆ విమానాన్ని అడ్డుకోవడానికి రెండు యుద్ధ విమానాలను రంగంలోకి దించింది. ఈ చర్యతో ఒక పెద్ద భద్రతా ఉల్లంఘన మరియు ప్రమాదం తప్పినట్లు అధికారులు తెలిపారు.

ఈ సంఘటన ఆదివారం మధ్యాహ్నం 12.50 గంటల ప్రాంతంలో జరిగిందని NORAD అధికారులు తెలిపారు. విమానం నో-ఫ్లై జోన్‌లోకి ప్రవేశించినట్లు రాడార్లలో గుర్తించగానే.. అత్యవసరంగా ఫైటర్ జెట్‌లను గాల్లోకి పంపించారు. ఆ యుద్ధ విమానాలు పౌర విమాన పైలట్‌ను అప్రమత్తం చేయడానికి ఫ్లేర్లను ఉపయోగించాయి. ఒక రకమైన శబ్దం చేస్తూ పౌర విమానానికి హెచ్చరికలు చేశాయి. దీంతో పైలట్ విషయాన్ని గ్రహించి.. వెంటనే తన విమానాన్ని నియంత్రిత వాయు మార్గం నుంచి బయటకు మళ్లించాడు. ఈ చర్యతో పెద్ద ప్రమాదం తప్పింది.

అధ్యక్షుడి భద్రతకు సంబంధించి ఇలాంటి ఘటన జరగడం తీవ్ర ఆందోళన కలిగించే విషయం. భవిష్యత్తులో ఇలాంటి సంఘటనలు పునరావృతం కాకుండా ఉండటానికి అధికారులు దర్యాప్తు ప్రారంభించారు. నో-ఫ్లై జోన్‌లోకి విమానం ఎలా ప్రవేశించింది, పైలట్‌కు సమాచారం ఎందుకు అందలేదనే దానిపై అధికారులు ఆరా తీస్తున్నారు. సాధారణంగా అధ్యక్షులు, మాజీ అధ్యక్షులు ఉన్న ప్రాంతాల్లో తాత్కాలికంగా నో-ఫ్లై జోన్‌లను ఏర్పాటు చేస్తారు. పైలట్లు ఈ నిబంధనలను పాటించాల్సి ఉంటుంది. అయితే ఈ ఘటనలో నిబంధనల ఉల్లంఘన జరగడంతో.. ఈ విషయంపై ప్రభుత్వం సీరియస్‌గా స్పందించింది.

ఇలాంటి నో-ఫ్లై జోన్‌లోకి ప్రవేశించిన పైలట్‌పై తీవ్రమైన చర్యలు తీసుకునే అవకాశం ఉన్నట్లు తెలుస్తోంది. అమెరికా ఫెడరల్ ఏవియేషన్ అడ్మినిస్ట్రేషన్ నిబంధనల ప్రకారం.. భద్రతా నిబంధనలను ఉల్లంఘించిన పైలట్‌కు భారీ జరిమానాలు విధించడం, లేదా అతని లైసెన్స్‌ను రద్దు చేయడం వంటి శిక్షలు విధించే అవకాశం ఉంటుంది. అంతేకాకుండా ఇది ఒక నేరపూరిత చర్యగా కూడా పరిగణించబడి, చట్టపరమైన విచారణకు దారి తీసే అవకాశం కూడా కనిపిస్తోంది. ఈ ఘటనలో పైలట్ నిర్లక్ష్యం ఉందా లేక సాంకేతికపరమైన లోపం కారణంగా ఇలా జరిగిందా అనేది దర్యాప్తులో తేలనుంది.