ఏపీలోని ఆ జిల్లాలో కొత్త క్రికెట్ స్డేడియం

ఆంధ్రప్రదేశ్‌లో క్రీడాభివృద్ధి కోసం ప్రభుత్వం అనేక చర్యలు చేపడుతోంది. గ్రామీణ ప్రాంతాల్లోని యువత నైపుణ్యాలను వెలికి తీసేందుకు అనేక చర్యలు తీసుకుంటోంది. అలాగే రాజధాని అమరావతిలోనూ స్పోర్ట్స్ సిటీ పేరుతో అంతర్జాతీయ క్రీడా నగరాన్ని నిర్మించేందుకు ప్రణాళికలు రచిస్తున్న సంగతి తెలిసిందే. ఈ స్పోర్ట్స్ సిటీలో అమరావతి ఇంటర్నేషనల్ క్రికెట్ స్టేడియం, బ్యాడ్మింటన్, క్రికెట్ అకాడమీలు ఏర్పాటు చేసే ఆలోచనలో ఉన్నారు. అలాగే రాష్ట్రంలో పలుచోట్ల క్రికెట్ స్టేడియాల నిర్మాణానికి కూడా ఆంధ్రా క్రికెట్ అసోసియేషన్ చర్యలు తీసుకుంటోంది. ఈ క్రమంలోనే పశ్చిమ గోదావరి జిల్లా ఉండి నియోజకవర్గంలో త్వరలోనే ఓ క్రికెట్ స్టేడియం ఏర్పాటు కానుంది.

ఉండి హైస్కూల్ గ్రౌండ్‌ను జిల్లా క్రికెట్ స్టేడియంగా తీర్చి దిద్దే దిశగా అడుగులు పడుతున్నాయి. ఈ విషయాన్ని ఏపీ డిప్యూటీ స్పీకర్, ఉండి నియోజకవర్గం ఎమ్మెల్యే రఘురామకృష్ణరాజు తెలిపారు. ఆంధ్ర క్రికెట్‌ అసోసియేషన్‌ ఆధ్వర్యంలో ఉండి హైస్కూల్ గ్రౌండ్‌ను జిల్లా క్రికెట్‌ స్టేడియంగా తీర్చిదిద్దేందుకు చర్యలు చేపట్టినట్లు రఘురామకృష్ణరాజు తెలిపారు. ఈ క్రమంలోనే రఘురామకృష్ణరాజు స్నేహితులు, సన్నిహితులు, పాఠశాల పూర్వ విద్యార్థులు, దాతల సహకారం ఉండి ఉన్నత పాఠశాలలో అభివృద్ధి పనులు జరుగుతున్నాయి.

రూ.80 లక్షలతో అదనపు తరగతి గదుల నిర్మాణం, ప్రయోగశాలల ఏర్పాటు, పూడిక పనులు, సీసీ రోడ్లు, పచ్చదనం - పరిశుభ్రత, ఆట స్థలాల అభివృద్ధి కార్యక్రమాలు చేపడుతున్నారు. రఘురామకృష్ణరాజు చేతుల మీదుగా మంగళవారం ఈ పనులు ప్రారంభమయ్యాయి. ఈ సందర్భంగా మాట్లాడిన రఘురామకృష్ణరాజు.. ఉండి హైస్కూలు గ్రౌండ్‌ని ఆంధ్ర క్రికెట్‌ అసోసియేషన్‌కిచ్చి స్టేడియంగా మార్చాలనే ప్రతిపాదనకు సూత్రప్రాయంగా అంగీకారం తెలిపినట్లు వెల్లడించారు. అలాగే ఉండి అభివృృద్ధి కోసం ఆలోచనలు ఉంటే పంచుకోవాలని ప్రజలను కోరారు. భీమవరానికి ప్రత్యామ్నాయంగా ఎదిగే అవకాశం ఉండికే ఉందని.. అందుకే ఉండి అభివృద్ధి కోసం సలహాలు, సూచనలు ఉంటే పంచుకోవాలని విజ్ఞప్తి చేశారు.

మరోవైపు ఉండి జిల్లా పరిషత్ ఉన్నత పాఠశాల అభివృద్ధికి సహకరించిన దాతలను రఘురామకృష్ణరాజు సన్మానించారు. 80 లక్షలకు పైగా ఖర్చు చేసి ఎన్నో ఏళ్ల క్రితం నిర్మించిన ఈ పాఠశాల భవనాన్ని పునరుద్ధరించారని.. అధునాతన మౌలిక, క్రీడా సదుపాయాలు ఏర్పాటు చేసినట్లు తెలిపారు.