అమెరికా ఆర్థికవ్యవస్థ కుప్పకూలుతుంది.. యూఎస్ ఎకానమిస్ట్ అంచనా

ప్రపంచ దేశాలపై అమెరికా అధ్యక్షుడు డొనాల్డ్‌ ట్రంప్‌ విధిస్తున్న టారిఫ్‌లపై తీవ్ర విమర్శలు, వ్యతిరేకత వ్యక్తం అవుతోంది. ఇప్పుడు స్వదేశంలోనూ ట్రంప్ సర్కార్‌కు వ్యతిరేకత ఎదురవుతోంది. ఈ క్రమంలోనే యూఎస్ ఆర్థికవేత్త, జాన్ హాప్‌కిన్స్ యూనివర్సిటీ ప్రొఫెసర్ స్టీవ్ హాంకీ.. ట్రంప్ ఆర్థిక విధానాలపై తీవ్ర విమర్శలు గుప్పించారు. ట్రంప్ తనకు తానే నాశనం చేసుకుంటున్నారని మండిపడ్డారు. వివిధ దేశాలపై టారిఫ్‌ల పేరుతో ట్రంప్ కడుతున్న పేక మేడలు.. ఏదో ఒక రోజు కుప్పకూలిపోతాయని అంచనా వేశారు.

దీంతో అమెరికా ఆర్థిక వ్యవస్థ నాశనం అవుతుందని జోస్యం చెప్పారు. ఇక భారత్‌పై అమెరికా విధిస్తున్న సుంకాలపై స్పందించిన స్టీవ్ హాంకీ.. కొన్ని రోజులు వేచి ఉండాలని హితవు పలికారు. అప్పటివరకు ట్రంప్ జోలికి భారత్ వెళ్లకపోవడమే బెటర్ అని సూచించారు. ట్రంప్ విధిస్తున్న సుంకాల వల్ల.. అమెరికా పౌరులకే ఎక్కువ నష్టం వాటిల్లుతుందనే ఆందోళనలు ఇప్పుడు వ్యక్తం అవుతున్నాయి. సుంకాల పేరుతో ట్రంప్‌ నిర్మిస్తున్న పేక మేడ త్వరలోనే కూలిపోనుందని స్టీవ్ హాంకీ వెల్లడించారు.

ఇక భారత్‌పై ట్రంప్‌ విధించిన టారిఫ్‌ల అంశాన్ని ప్రస్తావించిన స్టీవ్ హాంకీ.. సుంకాలపై ట్రంప్‌ తీసుకుంటున్న నిర్ణయాలు పూర్తిగా అర్థరహితమని విమర్శించారు. 'తనను తాను నాశనం చేసుకునే శత్రువు జోలికి వెళ్లకపోవడమే మంచిది’ అని నెపోలియన్‌ చెప్పిన మాటను ఆయన గుర్తు చేశారు. ప్రస్తుతం అమెరికా అధ్యక్షుడు కూడా ప్రపంచ దేశాలతో ట్రేడ్ వార్ చేస్తూ.. తన నాశనాన్ని తానే కొని తెచ్చుకుంటున్నారని అనిపిస్తోందని ఆరోపించారు.

ఇక భారత్‌ విషయానికి వస్తే.. ఇలాంటి పరిస్థితుల్లో ప్రధానమంత్రి నరేంద్ర మోదీ, విదేశాంగ మంత్రి జై శంకర్‌ కొన్ని రోజులు వేచి చూడాలని స్టీవ్ హాంకీ తెలిపారు. ఎందుకంటే త్వరలోనే ట్రంప్‌ కట్టిన పేకమేడ కూలిపోతుందని అభిప్రాయం వ్యక్తం చేశారు. అమెరికా ప్రజల ఖర్చులు పెరిగితే.. తమ దేశ ద్రవ్యలోటు ఎక్కువ అవుతుందని అంచనా వేశారు. సుంకాల విషయంలో ట్రంప్‌ తీసుకుంటున్న నిర్ణయాలు చాలా చెత్తగా ఉన్నాయని మండిపడ్డారు. ఇలాంటి నిర్ణయాల వల్ల అమెరికా ఆర్థిక వ్యవస్థకే ఎక్కువ నష్టం వాటిల్లే ప్రమాదం ఉందని తీవ్ర ఆందోళన వ్యక్తం చేశారు.