జెలెన్‌స్కీ కీలక నిర్ణయం: ట్రంప్-పుతిన్ భేటీ తర్వాత వాషింగ్టన్‌కు పయనం

ప్రపంచ రాజకీయాల్లో కీలక పరిణామం చోటుచేసుకుంది. రష్యా-ఉక్రెయిన్ యుద్ధం ఒక సంక్లిష్ట దశలో ఉన్న తరుణంలో.. అమెరికా అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్‌ల మధ్య జరిగిన ఉన్నత స్థాయి సమావేశంపై ఉక్రెయిన్ అధ్యక్షుడు వోలోడిమిర్ జెలెన్‌స్కీ స్పందించారు. ఈ చర్చల తర్వాత తాను "నిర్మాణాత్మక సహకారానికి" సిద్ధంగా ఉన్నానని జెలెన్‌స్కీ ప్రకటించడం అంతర్జాతీయంగా ఆసక్తి రేకెత్తించింది. ఈ పరిణామాల నేపథ్యంలో జెలెన్‌స్కీ రాబోయే సోమవారం వాషింగ్టన్‌కు పయనం కానున్నారు. ముఖ్యంగా ట్రంప్‌తో ప్రత్యక్షంగా భేటీ కాబోతున్నట్లు తెలుస్తోంది.

ట్రంప్-పుతిన్‌ల మధ్య జరిగిన ఈ సమావేశం ప్రపంచ దేశాలకు ఒక స్పష్టమైన సంకేతాన్ని పంపింది. ఓవైపు యుద్ధం కొనసాగుతుండగా.. మరోవైపు సంధి ప్రయత్నాలు ముమ్మరమయ్యాయి. ఈ నేపథ్యంలోనే జెలెన్‌స్కీ స్పందన ప్రాధాన్యత సంతరించుకుంది. "నిర్మాణాత్మక సహకారం" అన్న మాట వాస్తవానికి ఒక రకమైన దౌత్యపరమైన వ్యూహం. దీని ద్వారా ఉక్రెయిన్ సంధికి సిద్ధంగా ఉన్నట్లు తెలుస్తోంది. అయితే అది తమ జాతీయ ప్రయోజనాలకు అనుగుణంగా ఉండాలని జెలెన్‌స్కీ చెప్పకనే చెబుతున్నారు. ఏదేమైనా ఈ ప్రకటన శాంతి చర్చలకు మార్గం సుగమం చేస్తుందని విశ్లేషకులు భావిస్తున్నారు.

 జెలెన్‌స్కీ త్వరలో వాషింగ్టన్ పర్యటనకు వెళ్లడం కూడా ఈ ప్రయత్నాల్లో ఒక కీలకమైన అడుగుగా చూస్తున్నారు. ఈ పర్యటనలో ఆయన అమెరికా నాయకులతో, ముఖ్యంగా అమెరికా అధ్యక్షుడు ట్రంప్‌తో భేటీ అయి భవిష్యత్తులో ఉక్రెయిన్ సమస్యకు శాశ్వత పరిష్కారాన్ని కనుగొనే మార్గాలపై చర్చించే అవకాశం ఉంది. అయితే జెలెన్‌స్కీ ఈ ప్రకటన చేయడానికి ముందే.. గంటన్నర పాటు ట్రంప్‌తో ఫోన్‌లో మాట్లాడినట్లు తెలుస్తోంది. ముఖ్యంగా ఈ విషయాన్ని శ్వేతసౌధం ప్రెస్ సెక్రటరీ కరోలిన్ లీవిట్ వెల్లడించారు. అలాస్కాలో సమావేశం అనంతరం విమానంలో తిరుగు ప్రయాణం చేస్తూ.. ట్రంప్ ఈ కాల్ మాట్లాడినట్లు తెలిపారు.

ఇదే విషయాన్ని జెలెన్‌స్కీ ఎక్స్ వేదికగా వెల్లడించారు. ట్రంప్‌తో తాను గంటన్నరకు పైగా మాట్లాడినట్లు చెప్పారు. అయితే శాంతి ఒప్పందానికి తాము సిద్ధంగా ఉన్నామని పునరుద్ఘాటించినట్లు వివరించారు. పుతిన్‌తో సమావేశం చర్చించుకున్న తర్వాత మరిన్ని విషయాలు చెప్పే అవకాశం ఉన్నట్లు తెలుస్తోంది. ఇప్పటి వరకు జరిగిన చర్చల్లో ఎలాంటి పురోగతి కనిపించనప్పటికీ.. ఈ కొత్త రాజకీయ సమీకరణాలు భిన్నమైన ఫలితాలను ఇచ్చే అవకాశం ఉన్నట్లు తెలుస్తోంది. ట్రంప్ మధ్యవర్తిత్వం వహిస్తే.. శాంతి ఒప్పందానికి రష్యా అంగీకరించే అవకాశం ఉందని కొందరు అంతర్జాతీయ నిపుణులు అభిప్రాయ పడుతున్నారు.