అనకాపల్లి హత్యల కలకలం – పోలీసులు అప్రమత్తం

అనకాపల్లి జిల్లాలో మళ్లీ వరుస హత్యలు కలకలం రేపుతున్నాయి. నాలుగు రోజుల వ్యవధిలో రెండు మృతదేహాల లభ్యత స్థానికులను, అధికారులను తీవ్ర ఆందోళనకు గురిచేసింది.
*ఇటీవలి రెండు కేసులు:
*గర్భిణీ మహిళ హత్య:నాలుగు రోజుల క్రితం సబ్బవరం మండలంలోని సరుగుడు తోటల వద్ద గుర్తుతెలియని మహిళ మృతదేహం లభించింది. వయసు సుమారు 25–30 సంవత్సరాల మధ్యగా ఉండొచ్చని పోలీసులు అనుమానిస్తున్నారు. ఆమె గర్భిణిగా ఉన్నట్టుగా సమాచారం. శరీరం పూర్తిగా కాలిపోయిన నేపథ్యంలో గుర్తింపు కష్టంగా మారింది. డాగ్ స్క్వాడ్, క్లూస్ టీం రంగంలోకి దిగగా, మృతురాలి ఊహా చిత్రాన్ని రూపొందించి వివిధ పోలీస్‌స్టేషన్‌లకు పంపారు. సమాచారం ఇచ్చిన వారికి ₹50,000 బహుమతి ప్రకటించారు.
*40 ఏళ్ల పురుష మృతి:గర్భిణీ మృతదేహం కేసు ఇంకా పరిష్కారం కాకముందే, మరో పురుష మృతదేహం చిన్నయ్యపాలెం సమీపంలోని టెర్రకాన్ లేఅవుట్ పొదల్లో కనిపించింది. సుమారు నాలుగు రోజుల క్రితం మృతి చెందినట్టుగా పోలీసులు భావిస్తున్నారు. మృతదేహం సబ్బవరం నేషనల్ హైవే సమీపంలో కనుగొనబడింది. ఘటనపై విచారణ కొనసాగుతోంది.
*దర్యాప్తులో కొత్త కోణాలు:పోలీసులు ఈ రెండు మృతదేహాలకు ఎలాంటి సంబంధం ఉందా అన్న కోణంలో దర్యాప్తు చేస్తున్నారు. హత్యలు ఎక్కడ జరిగాయి? మృతదేహాలను అక్కడికే తీసుకొచ్చి పడేశారా? అనే అనుమానాలు ముమ్మడిగా ఉన్నాయి. పరిసర ప్రాంతాల్లో సీసీటీవీ ఫుటేజీలు పరిశీలిస్తున్నారు.మొత్తానికి, సబ్బవరం పరిధిలో మిస్టరీ మరణాలు తీవ్ర చర్చనీయాంశంగా మారాయి. వరుసగా దొరికే మృతదేహాలు, గుర్తు తెలియని హత్యలు — పోలీసులకు సవాల్‌గా మారాయి.