దక్షిణాఫ్రికాతో టీ20 సిరీస్ ఆసీస్ వశం

దక్షిణాఫ్రికాతో జరిగిన టీ20 సిరీస్‌ను ఆస్ట్రేలియా జట్టు 2-1తో కైవసం చేసుకుంది. ఆస్ట్రేలియాలోని కెయిర్న్స్ వేదిక‌గా జరిగిన నిర్ణయాత్మక మూడో మ్యాచ్‌లో ఆసీస్.. 2 వికెట్ల తేడాతో గెలిచింది. దక్షిణాఫ్రికా నిర్దేశించిన 173 పరుగుల లక్ష్యాన్ని 19.5 ఓవర్లలో ఛేదించింది. ఈ సిరీస్‌లో తొలి మ్యాచ్‌లో ఆస్ట్రేలియా గెలవగా.. రెండో మ్యాచ్‌లో విజయంతో దక్షిణాఫ్రికా సిరీస్‌ను సమం చేసింది. మూడో టీ20లోనూ ఇరు జట్లూ నువ్వా నేనా అన్నట్లు తలపడ్డాయి. మ్యాక్స్‌వెల్ పుణ్యమా అని ఆస్ట్రేలియా గెలుపు గీతను దాటింది.

ఈ మ్యాచ్‌లో టాస్ గెలిచిన ఆతిథ్య ఆస్ట్రేలియా.. దక్షిణాఫ్రికాకు బ్యాటింగ్ అప్పగించింది. 49 పరుగులకే 3 వికెట్లు కోల్పోయిన ప్రొటీస్ జట్టును.. డివాల్డ్ బ్రెవిస్ ఆదుకున్నాడు. 26 బంతుల్లో 53 రన్స్ చేశాడు. తన ఇన్నింగ్స్‌లో బ్రెవిస్ ఏకంగా ఆరు సిక్సర్లు కొట్టడం గమనార్హం. ఇందులోనూ మూడు నో లుక్ సిక్సర్లను చూసి తీరాల్సిందే. చివర్లో వాన్ డర్ డసెన్ 26 బంతుల్లో 38 రన్స్ చేసి జట్టు స్కోరును 170 పరుగుల మార్కు దాటించాడు. నిర్ణీత 20 ఓవర్లలో దక్షిణాఫ్రికా 7 వికెట్ల నష్టానికి 172 పరుగులు చేసింది. ఆసీస్ బౌలర్లలో నాథన్ ఇల్లిస్‌ 3, హేజిల్‌వుడ్, ఆడమ్ జంపా చెరో రెండు వికెట్లు తీశారు.

అనంతరం ఓపెనర్లు రాణించడంతో ఆస్ట్రేలియా 7.5 ఓవర్లలో 66/0తో నిలిచింది. అయితే ఈ సిరీస్‌లో పెద్దగా రాణించలేకపోయిన ట్రావిస్ హెడ్ (18 బంతుల్లో 18 రన్స్‌) మరోసారి విఫలమయ్యాడు. మరో ఓపెనర్‌ మిచెల్ మార్ష్ (54) హాఫ్ సెంచరీ చేశాడు. జోష్ ఇంగ్లిస్ (0), కామెరూన్ గ్రీన్ (9), టిమ్ డేవిడ్‌ (17) స్వల్ప స్కోరుకే ఔట్ అయ్యారు. ప్రధాన బ్యాటర్లలో మ్యాక్స్‌వెల్ ఒక్కడే మిగలడంతో దక్షిణాఫ్రికా విజయంపై ధీమాగా ఉంది.

కానీ ప్రతికూల పరిస్థితుల్లో రాణించడమే అలవాటుగా ఉన్న మ్యాక్స్‌వెల్‌.. మరోసారి అద్భుతం చేశాడు. మిగతా బ్యాటర్ల నుంచి సహకారం లేకపోయినా.. టెయిలెండర్లతో కలిసి జట్టును గెలిపించాడు. 36 బంతుల్లో 62 రన్స్‌తో అజేయంగా నిలిచాడు. చివరి రెండు ఓవర్లలో ఆస్ట్రేలియా విజయానికి 12 పరుగులు అవసరం. ఈ సమయంలో 19వ ఓవర్‌లో కార్బిన్ బాష్ రెండు పరుగులు మాత్రమే ఇచ్చి 2 వికెట్లు పడగొట్టాడు. చివరి ఓవర్‌లో 10 పరుగులు అవసరం కాగా.. మరో బంతి ఉండగానే ఆస్ట్రేలియా గెలుపొందింది. ఈ విజయంతో ఆస్ట్రేలియా 2-1తో సిరీస్ కైవసం చేసుకుంది. వన్డే సిరీస్‌లో తొలి వన్డే ఆగస్టు 19న జరగనుంది.