మాజీ ఎమ్మెల్సీ మంతెనకు కీలక పదవి,,,,సహాయ మంత్రి హోదా

ఆంధ్రప్రదేశ్ ప్రభుత్వం నామినేటెడ్ పోస్టుల భర్తీపై దృష్టి సారించింది. ఇప్పటికే కీలకమైన పదవుల భర్తీ పూర్తి చేసింది.. పార్టీ కోసం పనిచేసిన వారికి ప్రాధాన్యం ఇచ్చింది. తాజాగా టీడీపీ మాజీ ఎమ్మెల్సీకి కీలక పదవిని కట్టబెట్టింది. ఏపీ ముఖ్యమంత్రి చంద్రబాబు నాయుడు కార్యక్రమాల సమన్వయకర్తగా మంతెన సత్యనారాయణరాజును నియమించారు. మంతెన సత్యనారాయణరాజుకు సహాయమంత్రి హోదా కల్పిస్తూ ఆదేశాలు ఇచ్చారు. ఈ మేరకు అవసరమైన తదుపరి చర్యలు తీసుకోవాలని జీఏడీ ప్రోటోకాల్ డైరెక్టర్‌కు ప్రభుత్వ ఆదేశాలు జారీ చేసింది.

ఇప్పటికే ముఖ్యమంత్రి చంద్రబాబు ప్రోగ్రామ్ కోఆర్డినేటర్‌గా మాజీ ఎమ్మెల్యే పెందుర్తి వెంకటేష్ నియమితులయ్యారు. ఆయనకు కేబినెట్ ర్యాంక్ కూడా లభించింది. ఎన్నికల ముందు నుంచే వెంకటేష్ చంద్రబాబు కార్యక్రమాల కోఆర్డినేటర్‌గా ఉన్నారు. ఇప్పుడు ప్రభుత్వం అధికారికంగా ఉత్తర్వులు జారీ చేసింది. తాజాగా మంతెన సత్యనారాయణరాజును కూడా ముఖ్యమంత్రి చంద్రబాబు కార్యక్రమాలకు సంబందించిన సమన్వయకర్తగా నియమించడం ఆసక్తికరంగా మారింది. మంతెన సత్యనారాయణ రాజు 2014-2019 మధ్య టీడీపీ ప్రభుత్వ హయాంలో ఎమ్మెల్సీగా ఎన్నికయ్యారు.. ఐదేళ్ల గడువు పూర్తయ్యాక మరోసారి అవకాశం దక్కుతుందని భావించారు.. కానీ ఆయనకు ఛాన్స్ రాలేదు. తాజాగా ప్రభుత్వం ఈ పదవిలో నియమించింది.

గతవారం కుప్పం నియోజకవర్గంలోని వివిధ నామినేటెడ్ పోస్టుల భర్తీకి సీఎం చంద్రబాబు నాయుడు నిర్ణయం తీసుకున్నారు. కుప్పం మార్కెట్ కమిటీ, పలమనేరు-కుప్పం-మదనపల్లె అర్బన్ డెవలప్‌మెంట్ అథారిటీ (PUDA)తో సహా వివిధ పదవులకు ప్రభుత్వం ఉత్తర్వులు జారీ చేసింది. డాక్టర్ బీఆర్ సురేశ్ బాబును PUDA ఛైర్మన్‌గా నియమించారు. జీఎం రాజును కుప్పం మార్కెట్ కమిటీ ఛైర్మన్‌గా నియమించారు. ప్రియ శరవణ వైస్ ఛైర్మన్‌గా ఉంటారు. కుప్పం మార్కెట్ కమిటీకి 13 మంది సభ్యులను ఎంపిక చేశారు. వీజీ ప్రతాప్ కుమార్ కుప్పం రెస్కో ఛైర్మన్‌గా, జి.విశ్వనాథ్ వైస్ ఛైర్మన్‌గా ఉంటారు. రెస్కోకు కూడా 13 మంది సభ్యులను ఎంపిక చేశారు. కుప్పం ఏరియా ఆస్పత్రి కమిటీ వైస్ ఛైర్మన్‌గా భారతీ త్రిలోక్‌ను నియమించారు. ఆస్పత్రి కమిటీలో మరో ఐదుగురు సభ్యులు ఉంటారు.