బుమ్రాను టెస్ట్‌లు మాత్రమే ఆడించాలి: గవాస్కర్‌

భారత క్రికెట్‌ వర్గాల్లో ఇటీవల వర్క్‌లోడ్‌ మేనేజ్‌మెంట్‌ అనే పదం ఎక్కువగా వినిపిస్తోంది. ముఖ్యంగా ఇంగ్లాండ్‌తో టెస్ట్ సిరీస్ ప్రారంభానికి ముందు జస్‌ప్రీత్ బుమ్రా ఈ విషయంపై మాట్లాడుతూ.. ఐదు టెస్ట్‌లకు గానూ తాను కేవలం మూడింట్లో మాత్రమే ఆడతానని చెప్పుకొచ్చాడు. చెప్పినట్లుగానే కేవలం మూడు మ్యాచ్‌లలోనే ఆడాడు. రెండు, ఐదో టెస్ట్‌కు విశ్రాంతి తీసుకున్నాడు. ఈ నేపథ్యంలో వర్క్‌లోడ్ మేనేజ్‌మెంట్‌ అనే అంశంపై జోరుగా చర్చ జరుగుతోంది.

ఇక త్వరలో ఆసియాకప్ 2025 జరగనుంది. సెప్టెంబర్ 9 నుంచి 28 వరకు ఈ టోర్నీ జరగనుంది. ఈ టోర్నీ కోసం భారత సెలక్టర్లు మంగళవారం టీమిండియా జట్టును ప్రకటించనున్నారు. ఇందులో బుమ్రాకు చోటు దక్కుతుందా? లేదా? అనేది తేలాల్సి ఉంది. ఈ పరిస్థితుల్లో టీమిండియా క్రికెట్ దిగ్గజం సునీల్ గవాస్కర్ .. బుమ్రాను ఉద్దేశించి కీలక వ్యాఖ్యలు చేశారు. చీఫ్ సెలక్టర్ అజిత్ అగార్కర్‌కు ఓ సలహా ఇచ్చారు. జస్‌ప్రీత్ సేవలను సుదీర్ఘ ఫార్మాట్‌లో ఎక్కువగా వినియోగించుకోవాలని సూచించారు.

“బుమ్రా విషయంలో భారత సెలక్టర్లు ఓ నిర్ణయానికి రావాలి. ఇటీవల ఇంగ్లాండ్ పర్యటనలో అతడు కేవలం 3 మ్యాచ్‌లే ఆడాడు. ఇది చర్చనీయాంశంగా మారింది. అయితే తాను 3 మ్యాచ్‌లకు మాత్రమే అందుబాటులో ఉంటానని, సెలెక్షన్‌ కమిటీకి ముందుగానే చెప్పాడు. భారత జట్టు అక్టోబర్‌ ప్రారంభంలో వెస్టిండీస్‌తో ఆడనుంది. ఆ తర్వాత నవంబర్‌లో దక్షిణాఫ్రికాతో టెస్ట్‌ సిరీస్‌ ఆడుతుంది. ఈ రెండు సిరీస్‌లకు సుమారు నెల రోజుల గ్యాప్ ఉంది. నాకు తెలిసినంత వరకు బుమ్రాకు ఈ విశ్రాంతి సరిపోతుంది. సెలక్టర్లు అతడిని చిన్న చిన్న జట్లతో ద్వైపాక్షిక సిరీస్‌లు ఆడించొద్దు. ప్రపంచ టెస్ట్ ఛాంపియన్‌షిప్‌ను దృష్టిలో పెట్టుకుని.. నిర్ణయం తీసుకోవాలి. అతడిని సమర్థవంతంగా ఉపయోగించుకోవాలి” అని గవాస్కర్ తన మనసులోని మాట చెప్పారు.

టీ20 ప్రపంచకప్ 2025 తర్వాత బుమ్రా గాయపడ్డాడు. ఆ తర్వాత జాతీయ జట్టుకు దూరమయ్యాడు. ఆస్ట్రేలియాతో టెస్ట్ సిరీస్‌లో అన్ని మ్యాచులలో ఆడాడు. దీంతో వెన్నునొప్పితో ఛాంపియన్స్ ట్రోఫీకి దూరమయ్యాడు. ఆ తర్వాత ఐపీఎల్‌లోనూ కొన్ని మ్యాచ్‌లు ఆడలేదు. ఈ నేపథ్యంలో పనిభారం దృష్ట్యా.. ఇంగ్లాండ్‌తో కూడా మూడు టెస్టులే ఆడాడు. ఈ పరిస్థితుల్లో బుమ్రా రెడ్‌బాల్ క్రికెట్‌ మాత్రమే ఆడించాలని.. చిన్న జట్లపై వైట్‌బాల్ సిరీస్‌లు ఆడించొద్దని గవాస్కర్ సలహా ఇచ్చారు.