అమెజాన్ భారీ రిక్రూట్మెంట్.. పండుగ సీజన్‌లో 1.5 లక్షల ఉద్యోగాలు

భారత్‌లో పండుగల సీజన్ మొదలవుతోంది. వినాయక చవితి మొదలు కొని దసరా దీపావళి అంటూ సెప్టెంబర్ చివరి వారం నుంచి వచ్చే ఏడాది జనవరి వరకు పండుగలు వరుసగా వస్తుంటాయి. ఈ ఫెస్టివల్ సీజన్ కోసం అన్ని కంపెనీలు సన్నద్ధమవుతున్నాయి. భారత్‌లో ప్రముఖ ఈ-కామర్స్ సంస్థ అమెజాన్ సైతం పండుగ సీజన్‌కు సమాయత్తమవుతోంది. పండుగ సీజన్ డిమాండ్‌కి తగినట్లుగా తమ కస్టమర్లకు సర్వీసులు అందించేందుకు భారీగా నియామకాలు చేపడుతున్నట్లు తెలిపింది. ఈ పండుగ సీజన్ కోసం ఏకంగా 1.5 లక్షల ఉద్యోగ అవకాశాలు కల్పించినట్లు సోమవారం ప్రకటించింది. భారత్‌లో ఈ పండుగ సీజన్‌లో భారీ డిమాండ్ ఉంటుందన్న అంచనాల నేపథ్యంలో సిబ్బంది నియామకాలు చేపడుతోంది అమెజాన్ ఇండియా.

'దేశవ్యాప్తంగా ముంబై, ఢిల్లీ, పుణె, బెంగళూరు, హైదరాబాద్, లఖ్‌నవూ, కొచ్చి, కోయంబత్తూర్, ఇండోర్, రాయ్‌పుర్ వంటి 400 పైగా నగరాల్లో అవకాశాలు సృష్టించాం. ప్రత్యక్ష, పరోక్ష ఉపాధి అవకాశాలు ఉన్నాయి.' అని అమెజాన్ ఇండియా తెలిపింది. తాజా నియామకాల ద్వారా అమెజాన్ ఇండియా వేలాది మంది మహిళలను, 2 వేలకు పైగా దివ్యాంగులకు అవకాశాలు కల్పించినట్లు తెలిపింది. ఇప్పటికే కొత్త సిబ్బందిని ఆన్‌బోర్డింగ్ చేసుకుంటున్నట్లు తెలిపింది.

పండుగ సీజన్ ఉద్యోగాలు ఫుల్‌ఫిల్మెంట్ సెంటర్లు, సార్ట్ సెంటర్లు, లాస్ట్ మైల్ డెలివరీ స్టేషన్లలో ఉన్నాయని అమెజాన్ ఇండియా తెలిపింది. కొత్తగా నియామకమయ్యే వారిలో చాలా మంది పండుగల సీజన్‌లోనే కాకుండా ఆ తర్వాత కూడా అమెజాన్ ఇండియాతో కొనసాగనున్నారని, ప్రతి ఏడాది ఉద్యోగాల్లో చేరుతున్న వారి సంఖ్య పెరుగుతున్నట్లు అమెజాన్ ఇండియా ఆపరేషన్స్ వైస్ ప్రెసిడెండ్ అభినవ్ సింగ్ తెలిపారు. ' మా ఆపరేషన్స్‌లో మా ఉద్యోగుల భద్రత, రక్షణకే ఎక్కువ ప్రాధాన్యత ఇస్తాం. వారికి సురక్షితమైన, సమానమైన పని వాతావరణం కల్పిస్తాం. అందులో సామాజిక భద్రతా ప్రయోజనాలు, మద్దతు వంటివి ఉంటాయి.' అని తెలిపారు.

ఈ-కామర్స్ నెట్‌వర్క్‌లో తమ సిబ్బంది భద్రత కోసం భారత్‌లో 100 వరకు ఆశ్రయ విశ్రాంతి కేంద్రాలను ప్రారంభించినట్లు సింగ్ తెలిపారు. ప్రధాన నగరాల్లో 80 వేలకు పైగా డెలివరీ అసోసియేట్లకు ఉచితంగా ఆరోగ్య పరీక్షలు నిర్వహించామని వెల్లడించారు. అందులో కళ్లు, దంతాలు, బీఎంఐ, ఫిజికల్ కన్సల్టేషన్స్ వంటివి ఉన్నాయన్నారు. ఫుల్‌ఫిల్మెంట్ కేంద్రాల్లో ఆన్ సైట్ ఫస్ట్ ఎయిడ్ ఫెసిలిటీలను సైతం ఏర్పాటు చేశామన్నారు. అలాగే ఉద్యోగాలు తమ శాలరీలో 80 శాతం నెలలో మొదటి 20 రోజుల్లోనే విత్ డ్రా చేసుకునేందుకు సైతం అవకాశం కల్పిస్తున్నామన్నారు. దీంతో ఉద్యోగులకు ఆర్థిక సౌలభ్యం ఏర్పడుతుందన్నారు.