ఒక వ్యక్తి ఎన్ని సిమ్ కార్డులు తీసుకోవచ్చు

మొబైల్ ఫోన్ లేని వారు కనిపించడం చాలా అరుదుగా మారిపోయింది. కొందరు రెండు, మూడు ఫోన్లు సైతం వినియోగిస్తున్నారు. డ్యూయల్ సిమ్ కార్డులు వాడుతుంటారు. అలా ఒకటికి మించి సిమ్ కార్డులు తీసుకుంటారు. కొన్నిసార్లు నంబర్లను మార్చేస్తుంటారు. పాత నంబర్ తీసేసి కొత్తది కొనుగోలు చేస్తారు. పాత సిమ్ కార్డును బ్లాక్ చేయడం మర్చిపోతుంటారు. మరి ఇలా ఎన్నిసార్లైనా సిమ్ కార్డులు తీసుకోవచ్చా? ఒక వ్యక్తికి ఎన్ని సిమ్ కార్డులు ఇస్తారు? మీ పేరిట ఎన్ని సిమ్ కార్డులు యాక్టివ్‌గా ఉన్నాయి? ఎవరైనా మీకు తెలియకుండా మీ ఆధార్ నంబర్‌తో సిమ్ కార్డు తీసుకుంటే ఎలా తెలుసుకోవాలి? అనే విషయాలను ఇప్పుడు మనం తెలుసుకుందాం.

టెలికాం సంస్థలు సిమ్ కార్డులను ఉచితంగానే ఇస్తున్నాయి. వాటిపై ఒక నెల, మూడు నెలల వరకు ఉచిత రీఛార్జ్ ఆఫర్లు, డేటా ఆఫర్లు ఇస్తుంటాయి. ఇలా చేయడం వల్ల కొందరు ఆఫర్ల కోసమే సిమ్ తీసుకుంటారు. ఆ తర్వాత పక్కన పడేస్తారు. వాటిని బ్లాక్ చేయకుండా పక్కన పెట్టేసిన కొన్ని సందర్భంల్లో సైబర్ మోసగాళ్ల చేతిలోకి వెళ్తుంటాయి. కొందరు మనకు తెలియకుండానే మన పేరిట కొత్త సిమ్ తీసుకుంటారు. ఆధార్ కార్డును దుర్వినియోగం చేసి సిమ్ తీసుకుంటారు. స్విమ్ స్వాప్ వల్ల నేరాలు పెరుగుతున్నాయి. దీంతో సిమ్ కార్డుల జారీ రూల్స్ మార్చింది టెలికాం రెగ్యులేటరీ సంస్థ. ఒక వ్యక్తి తన ఆధార్ కార్డుతో 9 వరకు సిమ్ కార్డులు మాత్రమే తీసుకోవచ్చు. అంతకు మించి తీసుకునేందుకు వీలు లేదు.

మరి మీ పేరిట ఎన్ని ఉన్నాయి తెలుసుకోవడం ఎలా?

మీ ఆధార్ కార్డుతో ఎన్ని సిమ్ కార్డులు తీసుకున్నారు అనేది తెలుసుకోవచ్చు. టెలికాం అనలిటిక్స్ ఫర్ ఫ్రాడ్ మేనేజ్మెంట్ అండ్ కన్జూమర్ ప్రొటెక్షన్ అనే వెబ్‌సైట్ అందుబాటులోకి తెచ్చింది డాట్. దీని ద్వారా మీ ఆధార్ ద్వారా ఎన్ని సిమ్ కార్డులు జారీ అయ్యాయి అనేది ఈజీగా తెలుసుకోవచ్చు. అలాగే మీ ఫోన్ ఎవరైనా చోరీ చేసినా, పోగొట్టుకున్నా మీ సిమ్ కార్డులను బ్లాక్ చేయవచ్చు. ఇందుకోసం మీరు డాట్ తీసుకొచ్చిన అధికారిక వెబ్‌సైట్ Sancharasasthi లోకి లాగిన్ కావాల్సి ఉంటుంది.

అందులో Citizen Centric Services అనే ఆప్షన్ పై క్లిక్ చేయాలి. అందులో నో యువర్ మొబైల్ కనెక్షన్స్ పై క్లిక్ చేయాలి. ఆ తర్వాత మీ మొబైల్ నంబర్, క్యాప్చా కోడ్ ఎంటర్ చేయాగానే మీ ఫోన్ కు ఓటీపీ వస్తుంది. మీకు వచ్చిన ఓటీపీని ఎంటర్ చేసి సబ్మిట్ చేయగా మీ పేరుపై ఎన్ని ఫోన్ నంబర్లు ఉంటే అన్నింటి వివరాలు కనబడతాయి. అందులో ఉన్నవి అన్ని మీరు ఉపయోగిస్తున్నవేనా? లేదా అనేది నిర్ధరించుకోవాలి. ఒక వేళ మీరు వినియోగించని నంబర్లు కనిపిస్తే అక్కడే బ్లాక్ అని కనిపిస్తుంది దానిపై క్లిక్ చేసి ఆయా నంబర్లను బ్లాక్ చేయవచ్చు.