ట్రంప్ ముందే జెలెన్‌స్కీని ప్రశంసించిన రిపోర్టర్లు, దేశాధినేతల ఫన్నీ రియాక్షన్

అంతర్జాతీయ రాజకీయాలు సాధారణంగా తీవ్రమైన చర్చలు, దౌత్యనీతితో నిండి ఉంటాయి. కానీ కొన్నిసార్లు ఈ వాతావరణంలో కూడా ఊహించని హాస్య సన్నివేశాలు చోటు చేసుకుంటాయి. ఉక్రెయిన్ అధ్యక్షుడు వోలోడిమిర్ జెలెన్‌స్కీ.. తాజాగా అగ్రరాజ్యం అమెరికా అధ్యక్షుడు డొనాల్డ్ ట్రంప్‌తో వైట్ హౌస్‌లో భేటీ అయిన విషయం అందరికీ తెలిసిందే. అయితే ఈ సమావేశంలో అలాంటి చమత్కారమే వెలుగులోకి వచ్చింది. ఈ భేటీకి వచ్చిన జెలెన్‌స్కీని ఉద్దేశించి ఒక అమెరికన్ రిపోర్టర్ చేసిన వ్యాఖ్యకు.. ఆయన ఇచ్చిన తెలివైన సమాధానం ఇప్పుడు సామాజిక మాధ్యమాల్లో వైరల్‌గా మారింది.

ఈ సమావేశంలో రిపోర్టర్ బ్రయాన్ గ్లెన్.. జెలెన్‌స్కీని చూసి.. మీరు ఈ సూట్‌లో చాలా అందంగా, అద్భుతంగా ఉన్నారని ప్రశంసించారు. అయితే ఈ రిపోర్టరే గతంలో.. అంటే ఫిబ్రవరిలో జరిగిన భేటీలో జెలెన్‌స్కీని తన సైనిక దుస్తులను ధరించడంపై విమర్శలు చేసి, ఎందుకు సూట్ వేసుకోలేదని ప్రశ్నించారు. అప్పుడు జెలెన్‌స్కీ.. ఉక్రెయిన్‌లో శాంతి తిరిగి వచ్చేవరకు తాను సైనిక దుస్తులే ధరిస్తానని గట్టిగా సమాధానం చెప్పారు. ఇప్పుడు అవే దుస్తులను పొగుడుతున్న గ్లెన్‌ను చూసి ట్రంప్ జోక్యం చేసుకున్నారు. నేను కూడా అదే చెప్పానంటూ..గతంలో మిమ్మల్ని విమర్శించింది ఈయనే అని జెలెన్‌స్కీకి గుర్తు చేశారు.

ట్రంప్ వ్యాఖ్యకు స్పందించిన జెలెన్‌స్కీ.. రిపోర్టర్‌ వైపు చూస్తూ.. అవును ఆయన అప్పుడు నన్ను విమర్శించారని అన్నారు. అయితే ఇప్పుడు మీరు కూడా అదే సూట్ వేసుకున్నారని ట్రంప్‌ను ఉద్దేశించి చమత్కారంగా అన్నారు. జెలెన్‌స్కీ ఇచ్చిన ఈ తెలివైన సమాధానానికి గదిలోని వారంతా ఒక్కసారిగా నవ్వేశారు. దీంతో సమావేశ వాతావరణం తేలికపడింది. ఈ సంఘటన జెలెన్‌స్కీ రాజకీయ చాతుర్యం, హాస్యభరిత స్వభావానికి నిదర్శనమని విశ్లేషకులు చెబుతున్నారు.

యుద్ధం ప్రారంభమైనప్పటి నుంచి జెలెన్స్కీ ఎక్కువగా తన సైనిక దుస్తులనే ధరిస్తున్నారు. అంతర్జాతీయ వేదికలపై కూడా అదే దుస్తుల్లో కనిపించడం ఒక సందేశాన్ని ఇస్తుంది. ఉక్రెయిన్‌ సైనికులకు, ప్రజలకు తాను అండగా ఉన్నానని, యుద్ధం ఇంకా ముగియలేదని ఆయన ఈ దుస్తుల ద్వారా ప్రపంచానికి చాటి చెబుతున్నారు. ఇలాంటి తరుణంలో ఆయన వేసుకున్న దుస్తులపై వచ్చిన ప్రశంసలకు హాస్యభరితంగా స్పందించడం చూసి అంతా తెగ సంబుర పడిపోతున్నారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది.