విదేశీ విద్యార్థుల నెత్తిన అమెరికా మరో బాంబ్.. 6 వేల మంది వీసాలు రద్దు

అమెరికా ప్రభుత్వం విదేశీ విద్యార్థులపై కఠినమైన చర్యలను వేగవంతం చేసింది. ఇటీవల కాలంలో ఆ దేశంలో చదువుకుంటున్న విద్యార్థులకు చెందిన 6,000కు పైగా వీసాలను రద్దు చేసినట్లు వెల్లడైంది. ఇందులో సుమారు 4,000 వీసాలు నేర సంబంధిత ఆరోపణల కారణంగా రద్దు అయినట్లు సమాచారం. ఈ పరిణామం విదేశాల నుంచి అమెరికాలో ఉన్నత విద్య కోసం వెళ్లే విద్యార్థులను.. ముఖ్యంగా భారతీయ విద్యార్థులను తీవ్ర ఆందోళనకు గురిచేస్తోంది. మరోవైపు వీసా అనేది రాజ్యాంగ హక్కు కాదని.. ఎప్పుడైనా కొత్త సమాచారం వెలుగులోకి వస్తే దాన్ని రద్దు చేసే అధికారం ప్రభుత్వానికి ఉంటుందని అమెరికా విదేశాంగ మంత్రి మార్కో రుబియో స్పష్టం చేశారు.

ఆగస్టు నెల ప్రారంభంలో EWTNకి ఇచ్చిన ఇంటర్వ్యూలో.. విద్యార్థి వీసాకు రాజ్యాంగబద్ధమైన హక్కు లేదని అమెరికా విదేశాంగ కార్యదర్శి మార్కో రూబియో తెలిపారు. విద్యార్థి వీసా అనేది మేము ఇవ్వాలని నిర్ణయించుకున్నది మాత్రమేనని స్పష్టం చేశారు. ప్రపంచవ్యాప్తంగా ప్రతిరోజూ ప్రతీ రకమైన వీసాలు తిరస్కరించబడుతున్నాయని గుర్తు చేశారు. ఒక వ్యక్తి ప్రవర్తన గురించి ఏమీ తెలియకుండా వీసా ఇచ్చి.. ఆ తర్వాత అతడి నేర ప్రవృతి గురించి తెలిస్తే మేము వీసా రద్దు చేయకుండా ఎందుకు ఉంటామన్నారు.

ఈ ఏడాది కాలంగా చేసిన వీసాల రద్దుకు గల ప్రధాన కారణాల్లో అమెరికన్ చట్టాలను ఉల్లంఘించడం, వీసా కాలం ముగిసిన తర్వాత కూడా దేశంలో నివసించడం వంటివి ఉన్నాయి. రద్దు చేసిన కేసుల్లో ఎక్కువగా దాడి, మద్యం సేవించి వాహనం నడపడం, దొంగతనం వంటి నేరాలు ఉన్నట్లు అధికారులు తెలిపారు. అయితే వీటితో పాటు దాదాపు 200 నుంచి 300 వీసాలు ఉగ్రవాదానికి మద్దతు ఇస్తున్నారనే ఆరోపణల కారణంగా రద్దు కావడం గమనార్హం. ఈ వీసా రద్దుల వెనుక కేవలం నేరపూరిత కారణాలే కాకుండా అంతర్జాతీయంగా జరుగుతున్న రాజకీయ పరిణామాలు కూడా ఉన్నాయి.

ఇజ్రాయెల్-గాజా యుద్ధానికి వ్యతిరేకంగా అమెరికాలోని యూనివర్సిటీ క్యాంపస్‌లలో జరిగిన నిరసనలలో పాల్గొన్న విద్యార్థులపై ప్రభుత్వం ప్రత్యేక దృష్టి సారించినట్లు తెలుస్తోంది. ఈ నిరసనకారులను యూదు వ్యతిరేకులుగా.. ఉగ్రవాదానికి మద్దతుగా వ్యవహరిస్తున్నారని అధికార వర్గాలు ఆరోపిస్తున్నాయి. దీనిలో భాగంగానే సోషల్ మీడియాలో పోస్టులు, ఇతర కార్యకలాపాలను కూడా నిశితంగా పరిశీలిస్తున్నట్లు సమాచారం. విదేశీ విద్యార్థులు అమెరికాకు వ్యతిరేకంగా 'శత్రు వైఖరి'ని కలిగి ఉన్నారా అనే విషయాన్ని గుర్తించేందుకు రాయబార కార్యాలయాలు, కాన్సులేట్‌లకు మరింత కఠినమైన మార్గదర్శకాలను ప్రభుత్వం జారీ చేసింది. దీనిలో భాగంగా వీసా దరఖాస్తుదారులు తమ సోషల్ మీడియా ఖాతాలను పరిశీలించడానికి వీలు కల్పించాలని కోరింది.

గత ఆర్థిక సంవత్సరంలో అమెరికా సుమారు 4,00,000 ఎఫ్-1 విద్యార్థి వీసాలను జారీ చేసింది. అయితే ప్రస్తుతం ఉన్న పరిస్థితులు మాత్రం విదేశీ విద్యార్థులు అమెరికాలో అడుగు పెట్టేందుకు, తమ చదువును కొనసాగించేందుకు తీవ్ర సవాళ్లను విసురుతున్నాయి. ఏదైనా చిన్న తప్పు చేసినా, రాజకీయంగా సున్నితమైన అంశాలలో పాల్గొన్నా, వీసా రద్దు అవుతుందన్న భయం విద్యార్థుల్లో నెలకొంది. ఈ నిబంధనలు విదేశీ విద్యార్థులను ఆందోళనకు గురిచేస్తున్నాయి. అమెరికా ప్రభుత్వం తీసుకున్న ఈ నిర్ణయం విద్యార్థుల భవిష్యత్తుపై తీవ్ర ప్రభావం చూపుతుందని నిపుణులు అభిప్రాయ పడుతున్నారు. అంతేకాకుండా ఈ చర్యలు అమెరికా విద్యా వ్యవస్థకు అంతర్జాతీయ విద్యార్థుల నుంచి వచ్చే ఆదాయంపై కూడా ప్రభావం చూపుతాయని అంచనా వేస్తున్నారు.