పెరిగిన రక్తపోటును తగ్గించే నేచురల్ డ్రింక్స్

అధిక రక్తపోటు ఈ రోజుల్లో ఒక సాధారణ సమస్యగా మారింది. ఈ సమస్య లక్షలాది మందిని ప్రభావితం చేస్తుంది. అధిక రక్తపోటును నియంత్రణలో ఉంచుకోవాలి. లేదంటే ఇది గుండె జబ్బులు, స్ట్రోక్, మూత్రపిండాల వ్యాధులకు కూడా ప్రధాన కారణం కావచ్చు. అయితే, మందులు, ఆహారం, సరైన జీవనశైలిని పాటించడం ద్వారా రక్తపోటును నియంత్రించవచ్చు. ఇక, రెగ్యులర్‌గా కొన్ని డ్రింక్స్ తాగితే రక్తపోటు కంట్రోల్‌లో ఉంటుందని నిపుణులు చెబుతున్నారు. ఈ పానీయాల్లో ఉండే లక్షణాలు బీపీని నియంత్రించడమే కాకుండా అనేక ఇతర ఆరోగ్య ప్రయోజనాల్ని అందిస్తాయి. అధిక రక్తపోటు తగ్గించడానికి రోజూ ఏ పానీయాలు తీసుకోవాలో ఇప్పుడు తెలుసుకుందాం.

కొబ్బరి నీళ్లు

​కొబ్బరి నీళ్ళు సహజంగా పొటాషియం, మెగ్నీషియం, సోడియం వంటి ఖనిజాలతో సహా ఎలక్ట్రోలైట్లతో సమృద్ధిగా నిండి ఉంటాయి. ముఖ్యంగా పొటాషియం శరీరంలో సోడియం ప్రభావాలను సమతుల్యం చేస్తుంది. ఈ ప్రక్రియ వల్ల పెరిగిన రక్తపోటు తగ్గుతుందని నిపుణులు అంటున్నారు. ఇది రక్త నాళాలను సడలించి, ఒత్తిడిని తగ్గిస్తుంది. అలాగే, కొబ్బరి నీళ్లు తాగడం వల్ల శరీరం హైడ్రేట్‌గా ఉంటుంది. అంతేకాకుండా రక్త ప్రసరణ మెరుగుపడుతుంది. కొబ్బరి నీళ్లలో యాంటీ ఆక్సిడెంట్లు ఉంటాయి. ఇవి ఆక్సీకరణ ఒత్తిడిని తగ్గిస్తాయి.

బీట్‌రూట్ జ్యూస్

​బీట్‌రూట్‌లో ఆరోగ్యానికి మేలు చేసే ఎన్నో పోషకాలు ఉన్నాయి. బీట్‌రూట్‌లో విటమిన్లు, ఖనిజాలు, శక్తివంతమైన యాంటీ ఆక్సిడెంట్లు పుష్కలంగా ఉన్నాయి. బీట్‌రూట్‌లో విటమిన్ సి, ఫోలేట్, పొటాషియం, ఐరన్, మాంగనీస్, ఫైబర్ ఉన్నాయి. బీట్‌రూట్‌లో నైట్రేట్లు పుష్కలంగా ఉంటాయి, ఇవి శరీరంలో నైట్రిక్ ఆక్సైడ్‌గా మారుతాయి. ఇది రక్త నాళాలను సడలించడం ద్వారా రక్తపోటును తగ్గిస్తుంది. ఇది సిస్టోలిక్, డయాస్టొలిక్ రక్తపోటు రెండింటినీ తగ్గిస్తుంది. ఇది గుండె ఆరోగ్యాన్ని కూడా మెరుగుపరుస్తుంది. అందుకే రక్తపోటుతో బాధపడేవారు రెగ్యులర్‌గా బీట్‌రూట్ జ్యూస్ తాగాలని నిపుణులు చెబుతున్నారు.

మందార టీ

మందార టీని మందార పువ్వులను ఉపయోగించి తయారు చేస్తారు. ఇది ఒక హెర్బల్ టీ. మందార టీ అధిక రక్తపోటును తగ్గించడంలో సాయపడుతుందని అనేక అధ్యయనాలు సూచిస్తున్నాయి. మందారంలో ఆంథోసైనిన్లు, యాంటీఆక్సిడెంట్లు ఉంటాయి. ఇవి రక్తపోటును తగ్గించడంలో సాయపడతాయి. ఇది రక్త నాళాలను సడలిస్తుంది. కొలెస్ట్రాల్‌ను తగ్గించడంలో కూడా సాయపడుతుంది. మందారం టీలో యాంటీ ఆక్సిడెంట్లు పుష్కలంగా ఉంటాయి. ఇవి శరీరానికి హాని కలిగించే ఫ్రీ రాడికల్స్‌తో పోరాడటానికి సాయపడతాయి.

దాల్చిన చెక్క టీ

దాల్చిన చెక్క టీలో యాంటీ ఆక్సిడెంట్లు పుష్కలంగా ఉంటాయి. ఇవి శరీరానికి హానికరమైన ఫ్రీ రాడికల్స్‌తో పోరాడటంలో సాయపడతాయి. అంతేకాకుండా దాల్చిన చెక్కలో యాంటీ ఇన్ఫ్లమేటరీ లక్షణాలు ఉన్నాయి. ఇవి రక్తపోటును నియంత్రించడంలో సాయపడతాయి.. ఇది ఇన్సులిన్ సెన్సిటివిటీని కూడా మెరుగుపరుస్తుంది. ఇది రక్తపోటును ప్రభావితం చేస్తుంది. అలాగే, ఇది రక్త ప్రసరణను మెరుగుపరుస్తుంది. అయితే, దాల్చిన చెక్క టీని మితంగా తీసుకోవాలని నిపుణులు సూచిస్తున్నారు.

టమాటా జ్యూస్

టమాటలో విటమిన్ సితో పాటు యాంటీ ఆక్సిడెంట్లు ఉంటాయి. టమాటాలో విటమిన్ కె, కాల్షియం ఉంటాయి. ​టమాటాలో లైకోపిన్ అనే శక్తివంతమైన యాంటీ ఆక్సిడెంట్ ఉంటుంది. అందుకే టమాటా జ్యూస్ తాగాలని నిపుణులు చెబుతున్నారు. టమాటా జ్యూస్ తాగడం వల్ల లైకోపిన్ శరీరానికి అందుతుంది. ఇది రక్తపోటును నియంత్రించడంలో సాయపడుతుంది. దీంతో గుండె జబ్బుల ప్రమాదం కూడా తగ్గుతుందని నిపుణులు చెబుతున్నారు. టమాటలో ఉండే పొటాషియం కూడా రక్తపోటును అదుపులో ఉంచుతుంది.