ఇన్‌స్టాగ్రామ్‌‌లో ప్రేమ.. రహస్యంగా రొమాన్స్, ప్రెగ్నెంట్ అని చెప్పడంతో

ఈ మధ్య కాలంలో చాలా మంది యువత ఆన్‌లైన్‌లోనే ప్రేమించుకుంటున్నారు. ఫేస్‌బుక్, ఇన్‌స్టాగ్రామ్, ట్విట్టర్ వంటి వాటల్లో.. ముఖాలు తెలియకుండానే స్నేహాలు పెంచుకుని.. ఆపై ప్రేమ, సహజీవనం వరకూ వెళ్తున్నారు. అచ్చంగా ఇలాగే చేసిందో యువతి. కానీ సహజీవనం చేయకుండా చాటుమాటుగా ప్రేమికుడుతో కలిసింది. ఫలితంగా ఆమె గర్భం దాల్చడంతో.. పెళ్లి చేసుకుందామని పట్టుబట్టింది. కానీ అందుకు ఏమాత్రం అంగీకరించని ప్రియుడు.. ఆమెను ఎలాగైనా అడ్డు తొలగించుకోవాలనుకున్నాడు. అందుకోసం ఎవరూ లేని నిర్మానుష్య ప్రదేశానికి తీసుకెళ్లి.. అతి కిరాతకంగా హత్య చేశాడు. గర్భవతి అని కూడా చూడకుండా.. చంపేసి మృతేదహం కూడా కనిపించకుండా చేయాలనుకున్నాడు. కానీ వరుణదేవుడి సాయంతో ఈ దారుణం వెలుగులోకి వచ్చింది. ఎలాగంటే..?

కర్ణాటకలోని చిత్రదుర్గకు చెందిన 19 ఏళ్ల వర్షిత డిగ్రీ చదువుతోంది. అయితే ఓవైపు చదువుకుంటూనే మరోవైపు ఏదైనా పని చేయాలని భావించింది. ఇందుకోసం తన వద్ద ఉన్న ఫోన్ ద్వారానే ఉద్యోగాల కోసం వెతికింది. ఈక్రమంలోనే ఇన్‌స్టాగ్రామ్ వేదికగా.. ఒక నెట్ వర్కింగ్ సంస్థలో పని చేస్తున్న 21 ఏళ్ల చేతన్.. కొత్తవారిని తన సంస్థలోకి చేర్చుకుంటామంటూ పోస్ట్ పెట్టాడు. ఇది చూసిన వర్షిత ఉద్యోగం కోసం చేతన్‌ను సంప్రదించింది. ఇలా వీరిద్దరి మధ్య మాటలు ప్రారంభం కాగా.. అది కాస్తా త్వరలోనే స్నేహంగా మారింది. ఇద్దరూ ఒకరికి సంబంధించిన విషయాలను మరొకరితో పంచుకున్నారు. చాలా రోజుల పాటు ఇలా స్నేహం చేసిన వీరు.. వారికి తెలియకుండానే ప్రేమలో పడిపోయారు.

ఆ విషయం అర్థం అయ్యాకా.. చాటుమాటుగా కలవడం కూడా ప్రారంభించారు. చేతన్ పదే పదే.. వర్షితను బయటకు తీసుకెళ్లి శారీరకంగా కలిసేవాడు. ఫలితంగా వర్షిత గర్భం దాల్చింది. దీంతో ఆమె ఈ విషయాన్ని తన తల్లిదండ్రులకు చెప్పింది. తాను చేతన్ అనే అబ్బాయిని ప్రేమిస్తున్నానని, అతడినే పెళ్లి కూడా చేసుకుంటానని పేర్కొంది. దీంతో ఆమె తల్లిదండ్రులు, ముఖ్యంగా పినతల్లి చేతన్‌కు ఫోన్ చేసింది. వర్షిత గర్భం దాల్చిందని.. మీ పెద్దవాళ్లను తీసుకు వస్తే పెళ్లి చేస్తామని వివరించింది. కానీ చేతన్ మాత్రం అందుకు ఒప్పుకోలేదు. ముఖ్యంగా వర్షిత మరెవరితోనే క్లోజ్‌గా ఉంటుందనే అనుమానం, ఆమెను పెళ్లి చేసుకోవడం ఇష్టం లేకపోవడంతో.. పెళ్లి చేసుకోనని మెండికేశాడు.

అయినా వర్షిత పదే పదే ఫోన్ చేసి పెళ్లి చేసుకోవాలని ఒత్తిడి చేసింది. దీంతో వర్షితను పెళ్లి చేసుకోవడం ఇష్టం లేని చేతన్.. ఆమెను అడ్డు తొలగించుకోవాలనుకున్నాడు. ముఖ్యంగా ఎవరికీ అనుమానం రాకుండా ఆమెను హత్య చేయాలనుకున్నాడు. ఇందుకోసం ఓ పథకం కూడా వేశాడు. ఈ నెల 18వ తేదీన వర్షితను నమ్మించి చిత్రదుర్గ బైపాస్ రోడ్డులో ఉన్న ఒక నిర్మానుష్య ప్రాంతానికి తీసుకెళ్లాడు. అక్కడ ఆమెను అత్యంత కిరాతకంగా హత్య చేసి.. నేరాన్ని దాచి పెట్టేందుకు మృతదేహాన్ని కూడా మాయం చేయాలనుకున్నాడు.

అందుకోసం తన వెంట తెచ్చుకున్న పెట్రోల్ పోసి నిప్పంటించాడు. ఆపై తనకేమీ తెలియదన్నట్లుగా పారిపోయాడు. కానీ ఆరోజు రాత్రి భారీగా వర్షం కురవడంతో.. మృతదేహం పూర్తిగా కాలిపోలేదు. దీంతో అతని పన్నాగం పాక్షికంగా విఫలమైంది. సగం కాలిన స్థితిలో ఉన్న మృతదేహాన్ని గమనించిన స్థానికులు వెంటనే పోలీసులకు సమాచారం అందించారు. ఇలా హుటాహుటిన సంఘటనా స్థలానికి చేరుకున్న పోలీసులు.. మృతదేహాన్ని గుర్తించడానికి ప్రయత్నించారు. అయితే ముఖం గుర్తుపట్టలేని విధంగా మారడంతో.. మృతదేహానికి సంబంధించిన వివరాలను కనుగొనడం కష్టమైంది.

కానీ, పోలీసులు ఒక ముఖ్యమైన ఆధారాన్ని గుర్తించారు. వర్షిత చేతిపై ఉన్న ఒక టాటూ ఆధారంగా ఆమెను వర్షితగా గుర్తించారు. ఆ తర్వాత విచారణను వేగవంతం చేశారు. వర్షిత కాల్ రికార్డులను పరిశీలించగా.. ఆమె చివరిగా చేతన్‌తో మాట్లాడినట్లు తేలింది. చేతన్‌ను అదుపులోకి తీసుకుని విచారించగా.. అతడు తన నేరాన్ని అంగీకరించాడు. వర్షిత గర్భం దాల్చడంతో ఆమెను పెళ్లి చేసుకోవాల్సి వస్తుందని భయపడే ఈ దారుణానికి పాల్పడ్డానని పోలీసులకు చెప్పాడు. కేసు నమోదు చేసుకున్న పోలీసులు కేసును మరింత లోతుగా దర్యాప్తు చేస్తున్నారు.