బ్యాంకు లోన్‌కు ఇక 'సిబిల్' స్కోర్ అవసరం లేదు

బ్యాంకులో లోన్ తీసుకోవాలంటే మంచి క్రెడిట్ స్కోర్ ఉండాలని చెబుతుంటారు. వ్యక్తిగత రుణాల వంటి అన్‌షెక్యూర్డ్ రుణాలకు ఈ స్కోర్ కచ్చితంగా అడుగుతాయి బ్యాంకులు. 650 ఆపైన స్కోర్ ఉండి, లోన్ డీఫాల్ట్ కాని వారికి మాత్రమే లోన్ ఇచ్చేందుకు బ్యాంకులు ముందుకొస్తాయి. అయితే, మరి క్రెడిట్ స్కోర్ లేకుండా లోన్ ఇవ్వరా? క్రెడిట్ స్కోర్ గురించి తెలియని, అసలు స్కోర్ లేని వారి పరిస్థితి ఏంటి? అనే సందేహాలు చాలా మందిలోనే ఉంటాయి. ఈ విషయం తాజాగా కేంద్ర ఆర్థిక మంత్రిత్వ శాఖ క్లారిటీ ఇచ్చింది. మరి ఆ వివరాలు తెలుసుకుందాం.

మొదటి సారి లోన్ కోసం దరఖాస్తు చేసుకుంటున్న వారికి కనీస సిబిల్ స్కోర్ అవసరం లేదని కేంద్ర ఆర్థిక మంత్రిత్వ శాఖ ప్రకటించింది. గత వారం లోక్‌సభ సమావేశాల్లో ఈ విషయాన్ని వెల్లడించారు కేంద్ర ఆర్థిక శాఖ సహాయ మంత్రి పంకజ్ చౌధరీ. తొలిసారి లోన్ కోసం అప్లై చేసిన వారికి క్రెడిట్ స్కోరు తక్కువగా ఉన్నా లేదా సున్నాగా ఉన్నప్పటికీ బ్యాంకులు వారి లోన్ దరఖాస్తులను తిరస్కరించలేవని గతంలో ఆర్‌బీఐ చేసిన వ్యాఖ్యలను కేంద్ర మంత్రి పునరుద్ఘాటించారు. ఆర్‌బీఐ 2025, జనవరి 6వ తేదీన జారీ చేసిన మాస్టర్ డైరెక్షన్ ప్రకారం, క్రెడిట్ ఇన్‌స్టిట్యూషన్లు తొలిసారి లోన్ కోసం దరఖాస్తు చేసుకునే వారికి కేవలం క్రెడిట్ హిస్టరీ లేదనే కారణంతో తిరస్కరించరాదని ఆర్‌బీఐ సూచించినట్లు పేర్కొన్నారు. లోన్ దరఖాస్తు కోసం ఆర్‌బీఐ లాంటి కనీస క్రెడిట్ స్కోర్ నిర్దేశించలేదన్నారు.

అయితే, రుణ దాతలు (బ్యాంకులు) తమ వాణిజ్య అవసరాలు, వారి బోర్డు ఆమోదించిన విధానాలు, రిజర్వ్ బ్యాంక్ నియంత్రణ మార్గదర్శకాలు, క్రెడిట్ ఇన్ఫర్మేషన్ నివేదికల వంటి కీలక అంశాలను పరిగణనలోకి తీసుకుని లోన్ మంజూరు చేయాలా వద్దా అనే అంశంపై నిర్ణయం తీసుకుంటాయని కేంద్ర మంత్రి స్పష్టం చేశారు. తొలిసారి లోన్ తీసుకునే వారికి కనీస సిబిల్ స్కోర్ అనేది తప్పనిసరి కాదని నొక్తి చెప్పారు. బ్యాంకులు సైతం క్రెడిట్ హిస్టరీ లేదని అప్లికేషన్ తిరస్కరించరాదన్నారు.

సిబిల్ స్కోర్ అంటే ఏంటి?

క్రెడిట్ స్కోర్ అంటే ఒక వ్యక్తి క్రెడిట్ అర్హతను సూచించే ఒక ప్రమాణికత. ఇది సాధారణంగా 300 నుంచి 900 మధ్య ఉంటుంది. మన దేశంలో క్రెడిట్ ఇన్ఫర్మేషన్ బ్యూరో ఆఫ్ ఇండియా లిమిటెడ్ సిబిల్ ఈ స్కోరును లెక్కిస్తుంది. సిబిల్ స్కోర్ ఆధారంగానే బ్యాంకులు, ఫైనాన్షియల్ సంస్థలు వ్యక్తిగత లోన్స్, బంగారంపై రుణాలు, హోమ్ లోన్స్, వెహికల్ లోన్స్ వంటి రుణాలు ఇస్తుంటాయి.