ధర రూ.15లోపే.. 5 రోజుల్లో 21 శాతం లాభాలు

దేశీయ స్టాక్ మార్కెట్లు ఒడుదొడుకులకు లోనవుతున్నాయి. ఈ ఏడాదిలో అమెరికా తీసుకుంటున్న నిర్ణయాలు, పలు దేశాల మధ్య యుద్ధాలు, భౌగోళిక రాజకీయ అంశాలు మార్కెట్లపై ప్రతికూల ప్రభావం చూపిస్తున్నాయి. అయితే, ఇలాంటి పరిస్థితుల్లోనూ కొన్ని పెన్నీ స్టాక్స్ రాణిస్తున్నాయి. అందులో ఒకటే ఓసియా హైబర్ రిటైల్ (Osia Hyper Retail). సోమవారం ఆగస్టు 25వ తేదీ నాటి స్టాక్ మార్కెట్ ట్రేడింగ్‌లో ఈ స్టాక్ ఫోకస్‌లో నిలవనుంది. అందుకో ప్రధాన కారణం ఉంది. ఆగస్టు 23వ తేదీ శనివారం రోజున కంపెనీ ఓ కీలక ప్రకటన చేసింది. ఆ వివరాలు తెలుసుకుందాం.

స్టాక్ మార్కెట్ చివరి ట్రేడింగ్ సెషన్‌లో ఓసియా హైపర్ రిటైల్ షేరు ధర 4.95 శాతం పెరిగి రూ.14.41 వద్ద ముగిసింది. ఈ స్మాల్ క్యాప్ స్టాక్ గడిచిన 5 ట్రేడింగ్ సెషన్లలోనే ఏకంగా 21.40 శాతం లాభాలు అందించింది. వరుస సెషన్లలో లాభాల్లో కొనసాగుతూ ఇన్వెస్టర్లను ఆకర్షిస్తోంది. దానికి తోడు కంపెనీ కీలక ప్రకటనలు చేయడం మళ్లీ ఫోకస్‌లోకి తీసుకొచ్చాయి.

ఓసియా హైపర్ రిటైల్ కంపెనీ ఎక్స్చేంజ్ ఫైలింగ్ ప్రకారం.. కంపెనీ బోర్డ్ ఆఫ్ డైరెక్టర్లు కంపెనీ షేర్ క్యాపిటల్ రూ. 500,00,00,000కు పెంచేందుకు ఆమోదం తెలిపారు. క్యూఐపీ ద్వారా ఈక్విటీ షేర్ల జారీ, ప్రిఫెరెన్షియల్ బేసిస్ షేర్ల కేటాయింపు, కన్వర్టబుల్ వారెంట్స్ జారీ చేసేందుకు అంగీకరించింది. 'కంపెనీ ఆథరైజ్డ్ షేర్ క్యాపిటల్ రూ.5 వందల కోట్లకు పెంచాలనే ప్రతిపాదనకు సంస్థ బోర్డు నుంచి ఆమోదం లభించింది. ఇందుకు ఇతర అప్రూవల్స్, అనుమతులు, ప్రభుత్వ, రెగ్యులేటరీ, చట్టపరమైన అనుమతులు పొందాల్సి ఉంటుంది' అని కంపెనీ ఎక్స్చేంజ్ ఫైలింగ్‌లో పేర్కొంది.

వీటితో పాటుగా క్వాలిఫైడ్ ఇన్‌స్టిట్యూషనల్ ప్లేస్‌మెంట్ (క్యూఐపీ) ద్వారా రూ. 200 కోట్లు విలువైన షేర్లు జారీ చేయడం, రూ. 100 కోట్లు విలువైన ప్రిఫెరెన్షియల్ బేసిస్ షేర్ల జారీ చేసేందుకు సైతం బోర్డు ఆమోదం తెలిపినట్లు పేర్కొంది. అలాగే రూ. 350 కోట్లు విలువైన కన్వర్టెబుల్ వారెంట్స్ జారీకి సైతం ఆమోదం తెలిపినట్లు పేర్కొంది. మరోవైపు.. కంపెనీ ఎక్ట్రార్డినరీ జనరల్ మీటింగ్ సెప్టెంబర్ 22, 2025 రోజున నిర్వహించనున్నట్లు ఎక్స్చేంజ్ ఫైలింగ్‌లో పేర్కొంది.

ఈ కథనం సమాచారం అందించేందుకే తప్ప ఎవరినీ పెట్టుబడులు పెట్టాలని ప్రోత్సహించేందుకు కాదు. స్టాక్ మార్కెట్లో పెట్టుబడులపై హైరిస్క్ ఉంటుంది. ఎంచుకునే స్టాక్ గురించి ముందే పూర్తి వివరాలు తెలుసుకోవాలి. నిపుణుల సలహాలు తీసుకుని ఇన్వెస్ట్ చేస్తే మంచిది. లేదంటే నష్టపోయే ప్రమాదం ఉంటుంది.