జెలెన్‌స్కీ నాటకాలకు లొంగిపోవద్దు, నిజమైన జర్నలిస్టుగా ఉండండి

ఉక్రెయిన్‌పై రష్యా దాడి మొదలుపెట్టినప్పటి నుంచి సమాచార యుద్ధం కూడా కొనసాగుతూనే ఉంది. ప్రతికూల ప్రచారాన్ని ఎదుర్కోవడంలో రష్యా కీలక పాత్ర పోషిస్తోంది. ఈ నేపథ్యంలోనే రష్యా విదేశాంగ మంత్రి సెర్గీ లావ్రోవ్ అమెరికా మీడియాకు ఇచ్చిన ఒక ఇంటర్వ్యూలో షాకింగ్ కామెంట్లు చేశారు. ఉక్రెయిన్ సంక్షోభంపై పశ్చిమ దేశాలకు చెందిన మీడియా సంస్థలు చేస్తున్న ఆరోపణలను ఆయన గట్టిగా తిప్పికొట్టారు. ఈ సందర్భంగానే.. జర్నలిస్టులకు ఒక ప్రత్యేకమైన సలహా ఇచ్చారు. జెలెన్‌స్కీలా వ్యవహరించవద్దు, నిజమైన జర్నలిస్టుగా ఉండండి అంటూ చురకలు అంటించారు.

ఇంటర్వ్యూలో అమెరికా జర్నలిస్టు అడిగిన ప్రశ్నలకు లావ్రోవ్ కోపంతో.. సమాధానం చెప్పారు. రష్యా ఉద్దేశపూర్వకంగా ఉక్రెయిన్‌లోని పౌర ప్రాంతాలను లక్ష్యంగా చేసుకుని దాడి చేస్తోందన్న ఆరోపణలను ఆయన పూర్తిగా ఖండించారు. తమ సైనిక చర్య ఉద్దేశం పౌరులను చంపడం కాదని.. ఉక్రెయిన్ నుంచి భద్రతాపరమైన ముప్పులను తొలగించడమేనని పునరుద్ఘాటించారు. అలాగే రష్యా మాట్లాడే ప్రజలను కాపాడడం, కైవ్ తటస్థంగా, అణ్వాయుధాలు లేనిదిగా, నాటో కూటమికి దూరంగా ఉండేలా చూడడమే తమ లక్ష్యాలని మరోసారి స్పష్టం చేశారు.

ఈ ఇంటర్వ్యూలో తన కోపాన్ని బయటపెడుతూ.. జర్నలిస్టులను నిజాయితీగల జర్నలిస్టులుగా ఉండమని కోరారు. ఉక్రెయిన్ అధ్యక్షుడు వోలోడిమిర్ జెలెన్‌స్కీ చేసే నాటకాలకు లొంగిపోకూడదని.. బదులుగా వాస్తవాలను నివేదించాలని సలహా ఇచ్చారు. "మీరు ఒక జర్నలిస్టుగా వ్యవహరించాలి, జెలెన్‌స్కీలా కాదు" అని నేరుగా పేర్కొన్నారు. ఉక్రెయిన్‌కు చెందిన ఓ ఫ్యాక్టరీపై రష్యా క్షిపణి దాడులు చేసింది. అయితే అందులో కాఫీ మెషీన్లు మాత్రమే తయారు చేస్తారని వచ్చిన వార్తలను కూడా లావ్రోవ్ కొట్టిపారేశారు. అది ఉక్రెయిన్ సైనిక పరిశ్రమకు సంబంధించినదని ఆయన స్పష్టం చేశారు. ఈ ఘటన పశ్చిమ దేశాల మీడియా ఏ విధంగా రష్యాకు వ్యతిరేకంగా ప్రచారం చేస్తోందో చూపిస్తోందని ఆయన అన్నారు.

అలాగే రష్యా అధ్యక్షుడు వ్లాదిమిర్ పుతిన్, జెలెన్‌స్కీ మధ్య భేటీకి ప్రస్తుతానికి ఎలాంటి ప్రణాళికలు లేవని లావ్రోవ్ తెలిపారు. ఇలాంటి సమావేశం ఉపయోగకరంగా ఉండదని.. జెలెన్‌స్కీ ఎలాంటి స్పష్టమైన ఎజెండా లేకుండా కేవలం "వేదికపైకి వచ్చి నాటకాలు వేయడానికి" మాత్రమే ప్రయత్నిస్తారని ఆయన తీవ్రంగా ఆరోపించారు. ఉక్రెయిన్ యుద్ధం కేవలం సైనికపరంగానే కాకుండా మాటల యుద్ధం, ప్రచారపరంగా కూడా తీవ్రంగా కొనసాగుతోందని లావ్రోవ్ వివరించారు. అందుకే తాను జర్నలిస్టులకు ఈ సూచనలు చేసినట్లు మరోసారి స్పష్టం చేశారు.