నేను ఎదుర్కొన్న కఠినమైన బౌలర్లు వాళ్లే: చెతేశ్వర్ పుజారా

టీమిండియా టెస్టు స్పెషలిస్ట ప్లేయర్, నయా వాల్‌గా పేరుగాంచిన చెతేశ్వర్ పుజారా .. అంతర్జాతీయ క్రికెట్‌కు వీడ్కోలు పలికాడు. 13 ఏళ్ల అంతర్జాతీయ కెరీర్‌కు వీడ్కోలు పలుకుతూ ఆదివారం ప్రకటన విడుదల చేశాడు. 2010లో అంతర్జాతీయ క్రికెట్‌లోకి అరంగేట్రం చేసిన ఈ నయావాల్.. 103 టెస్ట్‌లు ఆడి 43 సగటుతో 7,195 పరుగులు చేశాడు. ఇందులో 3 డబుల్ సెంచరీలు, 19 శతకాలు కూడా ఉన్నాయి. అయితే తన బ్యాటింగ్‌తో ఎంతో మంది బౌలర్లను విసిగించిన పుజారా.. తన కెరీర్‌లో ఎదుర్కొన్న టఫ్‌ బౌలర్లెవరో చెప్పాడు. ఇందులో ఒక్క స్పిన్నర్ కూడా లేకపోవడం గమనార్హం.

టెస్ట్ క్రికెట్‌లో ప్రత్యర్థి బౌలర్ల సహనాన్ని పరీక్షించిన పుజారా.. తనను ఎక్కువగా ఇబ్బంది పెట్టిన బౌలర్లు ఎవరో చెప్పాడు. దక్షిణాఫ్రికాకు చెందిన పేసర్లు డేల్ స్టెయిన్‌, మోర్నీ మోర్కెల్‌, ఆస్ట్రేలియా కెప్టెన్ ప్యాట్ కమిన్స్, ఇంగ్లాండ్‌కు చెందిన జేమ్స్ అండర్సన్‌ల బౌలింగ్ ఎదుర్కోవడం కష్టంగా అనిపించేందని ఓ ఇంటర్వ్యూలో తెలిపాడు.

“అంతర్జాతీయ క్రికెట్‌ కెరీర్‌లో నేను ఎదుర్కొన్న అత్యంత కఠినమైన బౌలర్లు.. డేల్ స్టెయిన్, మోర్నీ మెర్కెల్, జేమ్స్ అండర్సన్, ప్యాట్ కమిన్స్‌‌” అని చెతేశ్వర్ పుజారా ఓ ఇంటర్వ్యూలో చెప్పాడు. నచ్చిన కెప్టెన్ ఎవరని అడగ్గా చాకచక్యంగా సమాధానం దాటవేశాడు. తాను ధోనీ, కోహ్లీ, రోహిత్, గంగూలీ, అజింక్య రహానే కెప్టెన్సీలో ఆడానని.. ఇందులో ఒక్కరి పేరు చెప్పడం కష్టమని వ్యాఖ్యానించాడు. ప్రతీ కెప్టెన్‌కు ఉండే బలాలు వేర్వేరుగా ఉంటాయని చెప్పాడు. వీరి నాయకత్వంలో ఆడటాన్ని తాను ఆస్వాదించనని చెప్పుకొచ్చాడు.

37 ఏళ్ల పుజారా 2010లో భారత్‌ తరఫున డెబ్యూ చేశాడు. తన కెరీర్‌లో టీమిండియా తరఫున.. 103 టెస్టులు, 5 వన్డేలు ఆడాడు. ఒక్క టీ20 మ్యాచ్ కూడా ఆడలేదు. టెస్టుల్లో 43.60 సగటుతో 7,195 రన్స్‌ చేశాడు. స్వదేశంలో టెస్టుల్లో 52.58 సగటుతో 3,839 పరుగులు చేశాడు. 2023 జూన్‌లో ఓవల్ మైదానంలో ఆస్ట్రేలియాతో జరిగిన ప్రపంచ టెస్టు ఛాంపియన్‌షిప్‌ ఫైనల్ పుజారా ఆడిన చివరి టెస్టు మ్యాచ్.