అధిక వడ్డీ ఇచ్చే 444, 555, 700 స్పెషల్ ఫిక్స్‌డ్ డిపాజిట్ స్కీమ్స్.. ఈ తేదీ తర్వాత ఉండవు

 ప్రస్తుతం ఫిక్స్‌డ్ డిపాజిట్లపై వడ్డీ రేట్లు భారీగా తగ్గిపోయాయి. అయితే, బ్యాంకులు కొన్ని ప్రత్యేక టెన్యూర్ డిపాజిట్ల ద్వారా అధిక వడ్డీ రేట్లు కల్పిస్తున్నాయి. అందులో ఇండియన్ బ్యాంక్, ఐడీబీఐ బ్యాంకులు అందిస్తోన్న స్పెషల్ టెన్యూర్ డిపాజిట్ పథకాలైన 444, 555, 700 రోజుల డిపాజిట్ల గడువు దగ్గరపడుతోంది. ఇప్పటికే పలు బ్యాంకులు అందించిన ప్రత్యేక డిపాజిట్ పథకాల గడువును మళ్లీ పొడిగించకపోవడంతో ఇప్పుడు ఈ పథకాలను సైతం మళ్లీ పొడిగించరన్న వాదనలు వినిపిస్తున్నాయి. ప్రస్తుతం ఈ స్పెషల్ స్కీమ్స్  ద్వారా గరిష్ఠంగా 7.45 శాతం వరకు వడ్డీ రేట్లు ఆఫర్ చేస్తున్నాయి బ్యాంకులు. ఈ గరిష్ఠ వడ్డీ రేటును అందుకోవాలంటే గడువు తేదీలోపు డిపాజిట్ చేయాల్సి ఉంటుంది. ఆ వివరాలు తెలుసుకుందాం.

ఇండియన్ బ్యాంక్ స్పెషల్ డిపాజిట్లు

ఇండియన్ బ్యాంకు ప్రస్తుతం 444 రోజుల స్పెషల్ ఫిక్స్‌డ్ డిపాజిట్ స్కీమ్ ఇండ్ సెక్యూర్ ప్రొడక్ట్ ద్వారా 6.70 శాతం వడ్డీ ఆఫర్ చేస్తోంది. అదే సీనియర్ సిటిజన్లకు అయితే, వడ్డీ రేటు 7.20 శాతం, సూపర్ సీనియర్ సిటిజన్లకు అయితే 7.45 శాతం మేర వడ్డీ ఆఫర్ చేస్తోంది. ఇండ్ సెక్యూర్ డిపాజిట్ పథకాలను మే 8, 2025 నుంచే అమలులోకి తెచ్చారు. ఇందులో రూ.1000 నుంచి 3 కోట్ల వరకు ఇన్వెస్ట్ చేయవచ్చు. అలాగే 555 రోజుల స్పెషల్ ఫిక్స్‌డ్ డిపాజిట్ స్కీమ్ ఇండ్ గ్రీన్ ప్రొడక్ట్ ద్వారా సాధారణ కస్టమర్లకు 6.60 శాతం వడ్డీ ఇస్తోంది. అలాగే సీనియర్లకు 7.10 శాతం, సూపర్ సీనియర్ సిటిజన్లకు 7.35 శాతం వడ్డీ అందిస్తోంది. ఈ రెండు పథకాల గడువు సెప్టెంబర్ 30, 2025 వరకు ఉంది. ఆలోపు డిపాజిట్లు చేసిన వారికే ఈ వడ్డీ రేట్లు వర్తిస్తాయి.

ఐడీబీఐ బ్యాంక్ స్పెషల్ డిపాజిట్ స్కీమ్స్

ఐడీబీఐ బ్యాంక్ అందిస్తోన్న ఉత్సవ్ కాలెబుల్ ఎఫ్‌డీ స్కీమ్స్ 444, 555, 700 రోజుల మెచ్యూరిటీ టెన్యూర్‌తో ఉన్నాయి. ఈ మూడు ప్రత్యేక ఎఫ్‌డీ పథకాల గడువు సెప్టెంబర్ 30, 2025 వరకు ఉంటుంది. ఇందులో జనరల్ కస్టమర్లు, ఎన్ఆర్ఈ, ఎన్ఆర్ఓలకు 444 రోజుల డిపాజిట్ పథకం ద్వారా 6.70 శాతం వడ్డీ ఇస్తోంది. సీనియర్ సిటిజన్లకు 7.20 శాతం వడ్డీ ఇస్తోంది. ఇక 555 రోజుల స్పెషల్ డిపాజిట్ స్కీమ్ ద్వారా సాధారణ కస్టమర్లకు 6.25 శాతం, సీనియర్ సిటిజన్లకు 7.25 శాతం వడ్డీ ఇస్తోంది. అలాగే 700 రోజుల మెచ్యూరిటీ టెన్యూర్ డిపాజిట్ స్కీమ్ ద్వారా సాధారణ కస్టమర్లకు 6.60 శాతం, సీనియర్ సిటిజన్కు 7.10 శాతం మేర వడ్డీ ఆఫర్ చేస్తోంది.

ఐడీబీఐ చిరంజీవి సూపర్ సీనియర్ సిటిజెన్ ఎఫ్‌డీ

ఐడీబీఐ బ్యాంక్ తీసుకొచ్చిన చిరంజీవి సూపర్ సీనియర్ సిటిజెన్ డిపాజిట్ స్కీమ్ 80 ఏళ్ల వయసు దాటిన వారికి ప్రత్యేకంగా రూపొందించారు. ఇందులో 444 రోజుల టెన్యూర్ ఉంటే 7.35 శాతం, 555 రోజుల టెన్యూర్ ఎంచుకుంటే 7.40 శాతం, 700 రోజుల టెన్యూర్ అయితే 7.25 శాతం వడ్డీ ఇస్తోంది. ఈ మూడు చిరంజీవి పథకాల గడువు సైతం సెప్టెంబర్ 30, 2025తో ముగుస్తుంది.