వెలగ పండుతో అనారోగ్యాలన్నీ దూరం

వినాయక చవితికి తప్పనిసరిగా కొనే పదార్థాల్లో వెలగ పండు ఒకటి. వినాయకుడు ఎంతో మెచ్చిన ఆహారం ఇది. అందుకే..కచ్చితంగా పూజలో నైవేద్యంగా అందిస్తారు. ఇప్పుడు మార్కెట్ లో విరివిగా దొరుకుతాయి కూడా. ఇంగ్లీష్ లో దీన్ని వుడ్ యాపిల్ (Wood Apple) అని పిలుస్తారు. బేల్ ఫ్రూట్ అని కూడా అంటారు. ఆయుర్వేద వైద్యంలో ఎన్నో విధాలుగా ఈ పండుని వాడుతుంటారు. తీపితో పాటు పుల్లగా ఉండే ఈ పండు ఫ్లేవర్ కాస్త వెరైటీగా ఉంటుంది. అయితే..వినాయకుడు మెచ్చిన ఈ పండుతో ఎన్నో ఆరోగ్య ప్రయోజనాలున్నాయి. షుగర్ తగ్గడం నుంచి గుండె జబ్బులు తగ్గడం వరకూ ఎన్నో రకాలుగా ఇది ఆరోగ్యాన్ని అందిస్తుంది. ఏయే రోగాలను నయం చేస్తుంది. ఎలా తింటే మంచిదో తెలుసుకుందాం.

వెలగపండులో పోషకాలు

వెలగ పండులో ఎన్నో పోషక విలువలున్నాయి. ఒక్క పండులోనే శరీరానికి కావాల్సిన న్యూట్రియెంట్స్ అన్నీ అందుతాయి. 100 గ్రాముల పండులో 120 కేలరీలుంటాయి. ఇక ప్రొటీన్ విషయానికొస్తే..3.5 గ్రాముల వరకూ ఉంటుంది. కార్బొహైడ్రేట్స్ 20 గ్రాములు, ఫైబర్ 4.6 గ్రాముల వరకూ ఉంటాయి. క్యాల్షియం మాత్రం 190 మిల్లీ గ్రాముల వరకూ ఉంటుంది. ఐరన్ 1.6 మిల్లీ గ్రాములు, సోడియం 190 మిల్లీ గ్రాముల వరకూ ఉంటాయి. ఈ పోషకాల పరంగా చూస్తే..వెలగ పండులో ఫైబర్ ఎక్కువగా ఉంటుంది. అందుకే త్వరగా జీర్ణమవుతుంది. జీర్ణ వ్యవస్థను మెరుగుపరచడంలో ఇది తోడ్పడుతుంది. విటమిన్ సి సహా యాంటీ ఆక్సిడెంట్స్ పుష్కలంగా ఉంటాయి. పైగా గ్లైసెమిక్ ఇండెక్స్ కూడా తక్కువే. ఫలితంగా షుగర్ ఉన్న వారు కూడా ఎలాంటి ఆందోళన పెట్టుకోకుండా తినవచ్చు.

జీర్ణ శక్తికి

ఇందాక చెప్పుకున్నట్టుగా వెలగ పండుతో జీర్ణ శక్తి మెరుగవుతుంది. ఎంతో కాలంగా మలబద్ధకంతో ఇబ్బంది పడుతున్న వారు వెలగపండు తినవచ్చు. ఇందులో యాంటీ ఇన్ ఫ్లమేటరీ గుణాలతో పాటు మోషన్ ఫ్రీగా అయ్యేందుకు తోడ్పడే గుణాలుంటాయి. ముఖ్యంగా యాంటీ మైక్రోబయల్ ప్రాపర్టీస్ అధికంగా ఉంటాయి. ఇవి పొట్టలోని చెడు బ్యాక్టీరియాతో పోరాడతాయి. ఆయుర్వేద వైద్యంలో మలబద్ధకం తగ్గేందుకు వాడే మందులలో వెలగ పండుని ఉపయోగిస్తుంటారు. అయితే మలబద్ధకం తగ్గాలంటే ఇప్పుడు చెప్పిన విధంగా వెలగ పండు వాడాలి. వెలగ పండు గుజ్జులో ఓ టేబుల్ స్పూన్ నెయ్యి కలపాలి. గోరు వెచ్చని నీటిలో ఈ రెండిటినీ మిక్స్ చేసి రాత్రి పూట నిద్రపోయే ముందు తాగాలి. క్రమంగా మలబద్ధకం తగ్గిపోతుంది.

షుగర్ కంట్రోల్

వెలగ పండులో ఫైబర్ అధికంగా ఉంటుంది. అయితే..ఇదే సమయంలో గ్లైసెమిక్ ఇండెక్స్ మాత్రం తక్కువగా ఉంటుంది. అంటే..ఈ పండు తిన్న వెంటనే రక్తంలో షుగర్ ఎక్కువగా రిలీజ్ అవ్వదు. ఫలితంగా అమాంతం షుగర్ లెవెల్స్ పెరిగే ముప్పు ఉండదు. ఇన్సులిన్ హార్మోన్ పెరగడాన్నీ అడ్డుకుంటుంది. ఎక్కువ రోజుల పాటు షుగర్ కంట్రోల్ లో ఉంచుకోడానికి ఈ పండు ఎంతగానో ఉపయోగపడుతుంది. డయాబెటిస్ ఉన్నవారు తప్పనిసరిగా వెలగ పండు తీసుకోవాలి. అయితే...పండులోని గుజ్జుని అలాగే తింటేనే డయాబెటిస్ పేషెంట్స్ కి మంచిది. చాలా మంది జ్యూస్ చేసుకుని చక్కెర కలుపుకుని తాగుతుంటారు. అలా కాకుండా నేరుగా తింటేనే ప్రయోజనాలు ఎక్కువగా అందుతాయి.

ఇమ్యూనిటీ పెరగడానికి

వెలగ పండులో రోజు మొత్తంలో శరీరానికి అందాల్సిన విటమిన్ సి ఉంటుంది. అంతే కాదు. ఇందులో జింక్, ఐరన్ కూడా పుష్కలంగా ఉంటాయి. వీటి వల్ల తెల్ల రక్త కణాలు ఎక్కువగా ఉత్పత్తి అవుతాయి. ఇక ఇందులోని యాంటీ ఆక్సిడెంట్స్ ఇమ్యూనిటీ పెంచుతాయి. ముఖ్యంగా వర్షాకాలంలో వచ్చే ఇన్ఫెక్షన్స్, జ్వరాలు లాంటివి రాకుండా వెలగ పండు అడ్డుకుంటుంది.

అన్నింటి కన్నా ముఖ్యమైన విషయం ఏంటంటే..గుండె జబ్బులు రాకుండా కాపాడడంలోనూ వెలగ పండు ఎంతో ఉపయోగపడుతుంది. ఇందులో పొటాషియం అధికంగా ఉంటుంది. దీని వల్ల బ్లడ్ ప్రెజర్ కంట్రోల్ లో ఉంటుంది. ఇదే సమయంలో ఎల్డీఎల్ కొలెస్ట్రాల్..అంటే చెడు కొవ్వు తగ్గుతుంది. ఇందులో ఉండే యాంటీ ఆక్సిడెంట్స్ ధమనులు మూసుకుపోకుండా చూస్తాయి. ఉదయం స్మూతీలాగా చేసుకుని అందులో కాసిన్ని అవిసె గింజలు కలుపుకుని తాగితే చాలా మంచిది.

మహిళల సమస్యలకు

మహిళల ఆరోగ్యాన్ని కాపాడడంలోనూ వెలగ పండు ఎంతో తోడ్పడుతుంది. నెలసరి సరిగ్గా రాకపోయినా, రక్త హీనత ఉన్నా..ఈ సమస్యలను తగ్గించడంలో వెలగ పండు ఉపయోగపడుతుంది. ఇందులో ఉండే ఐరన్, విటమిన్ సి కారణంగా ఇమ్యూనిటీ పెరగుతుంది. దీంతో పాటు శ్వాస కోశ సమస్యలు కూడా తగ్గుతాయి. ఆస్తమా ఉన్న వారికి వెలగ పండు ఎంతో ఉపయోగపడుతుంది. యాంటీ ఇన్ ఫ్లమేటరీ, యాంటీ మైక్రో బయల్ ప్రాపర్టీస్ శ్వాస కోశ సమస్యలపై పోరాడుతుంది. క్రమంగా లంగ్ ఇరిటేషన్ ని తగ్గిస్తుంది.