ఐఎంఎఫ్ ఎగ్జిక్యూటివ్ డైరెక్టర్‌గా ఉర్జిత్ పటేల్ నియామకం

భారతీయ రిజర్వ్ బ్యాంక్ (ఆర్‌బీఐ) మాజీ గవర్నర్ ఉర్జిత్ పటేల్ అంతర్జాతీయ ద్రవ్య నిధి (ఐఎంఎఫ్)లో కీలక పదవిని చేపట్టనున్నారు. కేంద్ర ప్రభుత్వం ఆయనను ఐఎంఎఫ్‌కి కార్యనిర్వాహక డైరెక్టర్‌గా (ఎగ్జిక్యూటివ్ డైరెక్టర్) నియమించింది. ఈ నియామకాన్ని కేంద్ర మంత్రివర్గ నియామకాల కమిటీ ఆమోదించింది. ఈ పదవిలో ఆయన మూడేళ్ల పాటు కొనసాగనున్నారు. ఇంతకుముందు ఈ స్థానంలో కృష్ణమూర్తి సుబ్రమణియన్ ఉండేవారు. అయితే ఆయన పదవీకాలం ముందే ముగియడంతో ఈ స్థానం ఖాళీ అయ్యింది.

ఐఎంఎఫ్‌కి సంబంధించి ఉర్జిత్ పటేల్‌కి ఇది కొత్త అనుభవం కాదు. ఆయన 1990 నుంచి 1995 వరకు ఐఎంఎఫ్‌లో ఆర్థికవేత్తగా పని చేశారు. ఆ తర్వాత 1996-97లో ఐఎంఎఫ్ తరపున ఆర్‌బీఐకి డిప్యుటేషన్ మీద వచ్చి రుణ మార్కెట్లు, బ్యాంకింగ్ సంస్కరణలు, పెన్షన్ ఫండ్ సంస్కరణలపై సలహాలు అందించారు. ఈ సుదీర్ఘ అనుభవం ఆయనకు కొత్త బాధ్యతలను సమర్థవంతంగా నిర్వహించడానికి సహాయ పడుతుంది.

 ఉర్జిత్ పటేల్ తన కెరీర్‌లో అనేక కీలక పదవులను నిర్వహించారు. ఆర్‌బీఐ గవర్నర్‌గా బాధ్యతలు చేపట్టక ముందు ఆయన డిప్యూటీ గవర్నర్‌గా కూడా పని చేశారు. ఈ సమయంలో ద్రవ్య విధాన రూపకల్పన, ఆర్థిక పరిశోధన, గణాంకాలు, సమాచార నిర్వహణ వంటి అనేక విభాగాలను పర్యవేక్షించారు. 2016లో రఘురామ్ రాజన్ తర్వాత 24వ ఆర్‌బీఐ గవర్నర్‌గా ఆయన బాధ్యతలు చేపట్టారు. అయితే 2018 డిసెంబర్‌లో వ్యక్తిగత కారణాలు పేర్కొంటూ పదవి నుంచి తప్పుకున్నారు. ఆర్‌బీఐ చరిత్రలో ఆయన పదవీకాలం చాలా తక్కువగా ఉంది. గవర్నర్‌గా ఆయన హయాంలోనే పెద్ద నోట్ల రద్దు వంటి చారిత్రక నిర్ణయాలు అమలయ్యాయి.

ఐఎంఎఫ్ ఎగ్జిక్యూటివ్ బోర్డులో మొత్తం 25 మంది డైరెక్టర్లు ఉంటారు. వీరు వివిధ సభ్య దేశాలు లేదా దేశాల గ్రూపుల నుంచి ఎన్నికవుతారు. ఐఎంఎఫ్ బోర్డులో భారత్, బంగ్లాదేశ్, శ్రీలంక, భూటాన్‌లతో కూడిన ఒక గ్రూపుగా ప్రాతినిధ్యం వహిస్తుంది. ఇప్పుడు ఉర్జిత్ పటేల్ ఈ గ్రూపు తరపున బోర్డులో సభ్యుడిగా ఉంటారు. ప్రపంచ ఆర్థిక విధాన నిర్ణయాలు, రుణాల ఆమోదం వంటి కీలక విషయాల్లో భారత్ తరపున ఆయన తన వాణిని వినిపిస్తారు. ఐఎంఎఫ్‌లో ఈ నియామకం చాలా కీలకమైన సమయంలో జరిగింది. ఇటీవల పాకిస్థాన్‌కు ఐఎంఎఫ్ రుణ సహాయం అందించడంపై భారత్ అభ్యంతరం వ్యక్తం చేసింది. ఉగ్రవాదాన్ని, సరిహద్దు ఉద్రిక్తతలను పెంచడానికి ఇటువంటి నిధులను ఉపయోగిస్తారన్న ఆందోళనలను భారత్ లేవనెత్తింది. ఇటువంటి క్లిష్టమైన అంతర్జాతీయ ఆర్థిక చర్చల్లో భారత్‌ వాదనలను బలంగా వినిపించడానికి ఉర్జిత్ పటేల్ నియామకం ఉపయోగపడనుంది.

ఆయన కేవలం ఆర్‌బీఐ, ఐఎంఎఫ్‌లోనే కాకుండా ఆసియన్ ఇన్‌ఫ్రాస్ట్రక్చర్ ఇన్వెస్ట్‌మెంట్ బ్యాంక్ (ఏఐఐబీ)లోనూ వైస్ ప్రెసిడెంట్‌గా పనిచేశారు. అక్కడి నుంచి కుటుంబ ఆరోగ్య కారణాల వల్ల 2024లో రాజీనామా చేశారు. ఇంతకుముందు రిలయన్స్ ఇండస్ట్రీస్, ఐడీఎఫ్‌సీ లిమిటెడ్ వంటి ప్రైవేట్ రంగ సంస్థల్లోనూ ఆయన పనిచేశారు. లండన్ స్కూల్ ఆఫ్ ఎకనామిక్స్‌లో ఎకనామిక్స్‌లో బ్యాచిలర్ డిగ్రీ, ఆక్స్‌ఫర్డ్ యూనివర్శిటీ నుంచి ఎం.ఫిల్, యేల్ యూనివర్శిటీ నుంచి పీహెచ్‌డీ పొందిన ఉర్జిత్ పటేల్... తన విద్య, వృత్తిపరమైన అనుభవంతో ఈ కొత్త బాధ్యతలను సమర్థవంతంగా నిర్వహిస్తారని ఆశాభావం వ్యక్తం అవుతోంది.