పవన్ కళ్యాణ్‌పై సుగాలి ప్రీతి తల్లి సంచలన ఆరోపణలు

ఆంధ్రప్రదేశ్ డిప్యూటీ సీఎం, జనసేన అధినేత పవన్ కళ్యాణ్‌పై.. సుగాలి ప్రీతి తల్లి పార్వతి మరోసారి తీవ్ర ఆరోపణలు చేశారు. 2024లో కూటమి ప్రభుత్వం అధికారంలోకి రాకముందు.. పవన్ కళ్యాణ్ సుగాలి ప్రీతి కేసు గురించి పదే పదే మాట్లాడేవారని, కానీ అధికారంలోకి వచ్చిన తర్వాత మాత్రం ఆ కేసు విచారణ గురించి పట్టించుకోవడం లేదని పేర్కొన్నారు. కనీసం తమకు అపాయింట్‌మెంట్ కూడా ఇవ్వడం లేదని సుగాలి ప్రీతి తల్లి సంచలన ఆరోపణలకు తెరతీశారు. తాము కేసు విచారణ కోసం హైకోర్టుకు వచ్చిన ప్రతీసారి.. అపాయింట్‌మెంట్ ఇవ్వాలని పవన్ కళ్యాణ్‌ను కోరామని.. కానీ ఇవ్వలేదని తెలిపారు.

ఈ ఏడాది మే నెల మొదటి నుంచి.. జూలై నెల 31వ తేదీ వరకు సుగాలి ప్రీతి కేసుకు సంబంధించి విచారణ కోసం.. 3 నెలల్లో తాము 11 సార్లు హైకోర్టుకు వచ్చామని.. సుగాలి ప్రీతి తల్లి వెల్లడించారు. అయితే వచ్చిన ప్రతీ సారి పవన్ కళ్యాణ్‌ను కలవాలని అపాయింట్‌మెంట్ అడిగినట్లు చెప్పారు. కానీ తమను కలిసేందుకు.. అపాయింట్‌మెంట్ ఇవ్వలేదని తీవ్ర ఆవేదన వ్యక్తం చేశారు. గతంలో ప్రతీ నిమిషం పవన్ కళ్యాణ్.. సుగాలి ప్రీతి, సుగాలి ప్రీతి కేసు అనేవారని.. కానీ ఇప్పుడు అధికారంలోకి వచ్చిన తర్వాత మాత్రం.. అసలు సుగాలి ప్రీతి కేసు అంటేనే తలనొప్పి వస్తుందని అంటున్నారని సుగాలి ప్రీతి తల్లి ఆరోపించారు.

మరోవైపు.. ఇటీవల సుగాలి ప్రీతి కేసు విషయంలో తనపై వస్తున్న ఆరోపణలపై పవన్ కళ్యాణ్ ఇవాళ స్పందించారు. గత వైసీపీ ప్రభుత్వ హయాంలో ఈ కేసుకు సంబంధించి తాను చేసిన పోరాటం.. సుగాలి ప్రీతి తల్లి మర్చిపోవడం బాధాకరమని వ్యాఖ్యానించారు. ఆపదలో ఉన్నవారికి చేయి అందించిన తననే ఇలా దూషించడం సరైంది కాదని అన్నారు. పండ్లు ఉన్న చెట్టుకే రాళ్ల దెబ్బలు అనేది.. ఈ కేసులో తనకే జరిగిందని పేర్కొన్నారు. గత ముఖ్యమంత్రికి వ్యతిరేకంగా మాట్లాడే ధైర్యం ఎవరికీ లేదని.. అలాంటి సమయంలో సుగాలి ప్రీతి తల్లి పడే బాధను చూసి.. తాను 2 లక్షల మందితో కర్నూలు గడ్డపైకి వెళ్లి.. ఈ కేసును బయటికి తీసుకువచ్చినట్లు చెప్పారు. జనసేన చేసిన పోరాటం ఫలితంగానే సుగాలి ప్రీతి కేసును సీబీఐకి అప్పగించారని.. గుర్తు చేశారు.

తాము చేసిన పోరాటం కారణంగానే సుగాలి ప్రీతి కుటుంబానికి.. కర్నూలు నగరానికి సమీపంలోని దిన్నెదేవరపాడులో రూ.10 కోట్ల మార్కెట్ విలువ కలిగిన 5 ఎకరాల వ్యవసాయ భూమితోపాటు.. కర్నూలులో 5 సెంట్ల ఇంటి స్థలం.. సుగాలి ప్రీతి తండ్రికి రెవెన్యూ శాఖలో జూనియర్‌ అసిస్టెంట్‌ ఉద్యోగం వచ్చినట్లు చెప్పారు. సుగాలి ప్రీతి కేసులో రాజకీయపరంగా జనసేన తెచ్చిన ఒత్తిడి ఫలితంగానే ఇవన్నీ వచ్చినట్లు పవన్ కళ్యాణ్ వెల్లడించారు.