17వ బిడ్డకు జన్మనిచ్చిన 55 ఏళ్ల మహిళ

ఈమధ్య కాలంలో ఇద్దరు పిల్లల్ని కనడానికే దంపతులు పదే పదే ఆలోచిస్తున్నారు. వారిని పెంచగలమా, ఆర్థిక భద్రత ఇవ్వగలమా అని ఆలోచిస్తూ.. ఒక్క బిడ్డతోనే పిల్లల్ని కనడం ఆపేస్తున్నారు. ఇక ఇంకొదరు కుటుంబ సభ్యుల ఒత్తిడి వల్ల రెండో బిడ్డకు జన్మనిస్తున్నారు. కానీ ఇంతకు మించి పిల్లల్ని కనేవారి సంఖ్య చాలా తగ్గిపోయింది. ఇలాంటివే ఇప్పటి వరకు మనం చూశాం, అనుభవించాం. కానీ రాజస్థాన్‌కు చెందిన ఓ మహిళ మాత్రం తన 55వ ఏట 17వ సంతానానికి జన్మను ఇచ్చింది. ఇప్పటికే 16 మంది పిల్లలు ఉండగా.. తాజాగా మరో బిడ్డను కని వార్తల్లో నిలిచింది.

రాజస్థాన్ ఉదయ్‌పూర్‌లోని గిరిజన ప్రాంతానికి చెందిన 55 ఏళ్ల రేఖ గలబేలియా అనే మహిళకు జడోల్ కమ్యూనిటీ హెల్త్ సెంటర్లో ఈ ప్రసవం జరిగింది. ఆమె ఇంతకు ముందు 16 మంది పిల్లలకు జన్మను ఇచ్చారు. అయితే వారిలో ఐదుగురు శిశువులు పుట్టిన కొద్ది కాలానికే మరణించారు. బతికి ఉన్న మొత్తం 12 మంది సంతానంలో ఏడుగురు మగ పిల్లలు కాగా.. ఐదుగురు ఆడ పిల్లలు. అయితే ఇందులో ఏ ఒక్కరు కూడా ఇప్పటి వరకు బడి ముఖమే చూడలేదు. ఓ పూట తింటే మరోపూట పస్తులు ఉంటూనే.. వీరంతా పోషకాహార లోపంతో జీవిస్తున్నారు.

ముఖ్యంగా రేఖ కుమార్తె శిలా కల్‌బేలియా, భర్త కవ్రా కల్‌బేలియా తమ కుటుంబ దీనస్థితిని వివరించారు. వారు కటిక పేదరికంలో బతుకుతున్నట్లు వెల్లడించారు. ఇల్లు కూడా లేకుండానే తాము జీవనం సాగిస్తున్నట్లు చెప్పుకొచ్చారు. అంతేకాకుండా తాను కేవలం చెత్త ఏరుకుని కుటుంబాన్ని పోషిస్తున్నట్లు కవ్రా కల్‌బేలియా వెల్లడించారు. ఇది మాత్రమే కాకుండా కుటుంబ పోషణ కోసం.. వడ్డీ వ్యాపారుల దగ్గర భారీగా అప్పులు కూడా చేసినట్లు వివరించారు. ప్రధాన మంత్రి ఆవాస్ యోజన కింద ఇల్లు మంజూరు అయినప్పటికీ.. భూమి వారి పేరు మీద లేకపోవడం వల్ల ఆ సహాయం అందుకోలేకపోయినట్లు తెలిపారు.

రేఖను పరీక్షించిన గైనకాలజిస్ట్ డాక్టర్ రోషన్ దరాంగి మాట్లాడుతూ.. ఈ ప్రసవం నిజంగా ఒక షాకింగ్ సంఘటన అని చెప్పారు. మొదట రేఖ కుటుంబ సభ్యులు ఆమెకు ఇది నాలుగో ప్రసవం అని తమతో చెప్పినట్లు వైద్యులు వివరించారు. కానీ పరీక్షల తర్వాత నిజం బయట పడిందన్నారు. 55 ఏళ్ల వయసులో ఇంతమంది పిల్లలకు జన్మనిచ్చిన తరువాత కూడా గర్భం ధరించడం వైద్యపరంగా చాలా అసాధారణమైన కేసు అని తెలిపారు. కుటుంబ నియంత్రణపై వారికి అవగాహన లేకపోవడమే ఈ పరిస్థితికి ప్రధాన కారణమని పేర్కొన్నారు.