మీ గుండె చుట్టూ కొవ్వు పేరుకుపోతే శరీరంలో కనిపించే లక్షణాలు

మనలో చాలా మంది ఫ్యాటీ లివర్ వ్యాధి గురించి విన్నాం. కానీ చాలా కొద్ది మందికి ఫ్యాటీ హార్ట్ గురించి తెలుసు. గుండె చుట్టూ కొవ్వు పేరుకుపోయే పరిస్థితి ఫ్యాటీ హార్ట్ అని పిలుస్తారు. ఇది సైలెంట్ కిల్లర్. గుండె వైఫల్యం, అరిథ్మియా, ఇతర ప్రాణాంతక సమస్యల ప్రమాదాన్ని పెంచుతుంది. అందుకే ఫ్యాటీ హార్ట్ గురించి తప్పకుండా తెలుసుకోవాలి. అసలు ఫ్యాటీ హార్ట్ అంటే ఏంటి? ఈ సమస్యకు కారణాలు, లక్షణాలు, ఏం చేయాలో అని పూర్తి వివారాలు ఇప్పుడు తెలుసుకుందాం.

ఈ రోజుల్లో చెడు జీవనశైలి, అనారోగ్యకరమైన ఆహారపు అలవాట్ల కారణంగా తీవ్రమైన వ్యాధుల ముప్పు పెరుగుతుంది. గత కొన్నేళ్లుగా గుండె జబ్బుల కేసులు వేగంగా పెరిగాయి. గతంలో గుండె జబ్బులు వృద్ధులకే పరిమితం అని భావించే వారు. ఇప్పుడు యువతలో కేసులు పెరుగుతున్నాయి. గుండెపోటుతో చాలా మంది యువత ప్రాణాలు కోల్పోతున్నారు. అలాంటి గుండె సంబంధిత వ్యాధుల్లో ఫ్యాటీ హార్ట్ ఒకటి. దీనిని కార్డియాక్ స్టీటోసిస్ అని కూడా పిలుస్తారు. ఇది తీవ్రమైన ఆరోగ్య సమస్య. ఇది ఇప్పుడు మరింత గుర్తించదగిన వ్యాధిగా మారుతోంది.

అధిక రక్తపోటు లేదా మధుమేహం వంటి సాధారణ వ్యాధులతో పోలిస్తే.. ఫ్యాటీ హార్ట్ తరచుగా ఎటువంటి ముందస్తు హెచ్చరిక లేకుండా సైలెంట్‌గా వృద్ధి చెందుతుంది. కానీ దాని ప్రభావం మొత్తం ఆరోగ్యం, జీవనశైలిపై తీవ్రంగా ఉంటుంది. అసలు ఫ్యాటీ హార్ట్ అంటే ఏంటి, కారణాలు, లక్షణాలు, ఎలా నివారించాలో ఇప్పుడు తెలుసుకుందాం.

ఫ్యాటీ హార్ట్ అంటే ఏంటి?

గుండె కండరాల్లో అధిక కొవ్వు పేరుకుపోయినప్పుడు ఫ్యాటీ హార్ట్ వస్తుంది. సాధారణంగా కొద్దిగా కొవ్వు ఉండటం పర్వాలేదు. కానీ ఎక్కువ కొవ్వు గుండె రక్తాన్ని పంప్ చేసే సామర్థ్యాన్ని ప్రభావితం చేస్తుంది. కాలక్రమేణా, ఇది గుండెపై అదనపు ఒత్తిడిని కలిగిస్తుంది. గుండె వైఫల్యం లేదా హార్ట్ ఎటాక్ వంటి సమస్యల ప్రమాదాన్ని పెంచుతుంది. ఈ పరిస్థితి ఊబకాయం, అనియంత్రిత మధుమేహం, అధిక కొలెస్ట్రాల్, అధిక రక్తపోటుతో ముడిపడి ఉంటుంది.

ఫ్యాటీ హార్ట్‌ కారణాలు

* ఊబకాయం: ఫ్యాటీ హార్ట్‌కి ప్రధాన కారణం ఊబకాయం. ఊబకాయం ఉన్నవారిలో 55% మందిలో ఫ్యాటీ హార్ట్ ఉన్నట్లు అధ్యయనాలు చెబుతున్నాయి. అయితే ఇది దాదాపు 10% మంది సన్నగా ఉన్నవారిని కూడా ప్రభావితం చేస్తుంది.

* డయాబెటిస్: టైప్ 2 డయాబెటిస్ జీవక్రియ రుగ్మతలకు కారణమవుతుంది. దీని వల్ల గుండె లోపల, చుట్టూ కొవ్వు పేరుకుపోతుంది.

* అధిక కొలెస్ట్రాల్: చెడు కొలెస్ట్రాల్ పెరగడం వల్ల గుండె కండరాలు, ధమనుల్లో కొవ్వు పేరుకుపోతుంది. ఇది గుండెపోటు, స్ట్రోక్ వంటి ప్రాణాంతక పరిస్థితులకు కారణమవుతుంది.

* అతిగా మద్యం సేవించడం: అతిగా మద్యం సేవించడం వల్ల కాలేయం, గుండె రెండూ దెబ్బతింటాయి. దీనివల్ల గుండె కండరాలలో కొవ్వు పేరుకుపోతుంది.

* వ్యాయామం చేయకపోవడం: శారీరక శ్రమ లేకపోవడం వల్ల కేలరీల ఖర్చు తగ్గుతుంది. ఇది శరీరంలో, గుండె చుట్టూ కొవ్వు పేరుకుపోవడానికి దారితీస్తుంది.

* జన్యుపరమైన కారణాలు: కుటుంబ చరిత్ర ప్రకారం గుండె జబ్బులు ఉంటే, అది ఫ్యాటీ హార్ట్‌కి కారణం అవ్వచ్చు.

ఫ్యాటీ హార్ట్ లక్షణాలు

* గుండె పంపింగ్ సరిగా లేకపోవడం వల్ల నిరంతరం అలసట, బలహీనత

* ఫ్యాటీ హార్ట్ కారణంగా గుండెపై ఒత్తిడి పడుతుంది. దీంతో ఛాతీ నొప్పి, భారంగా అనిపిస్తుంది.

* చిన్న పనులు చేసినా.. శ్వాస తీసుకోవడం ఇబ్బంది

* క్రమరహితంగా లేదా అసాధారణంగా హృదయ స్పందన, వేగంగా గుండె కొట్టుకోవడం

* కాళ్ళు లేదా పొత్తికడుపులో వాపు, ఇది గుండె పనితీరు సరిగా లేదని సూచిస్తుంది.

* రాత్రి పడుకున్నప్పుడు శ్వాస తీసుకోవడంలో ఇబ్బంది

ఫ్యాటీ హార్ట్‌ను ఎలా నివారించాలి?

ఫ్యాటీ హార్ట్ నివారణ ప్రధానంగా జీవనశైలి మార్పులపై ఆధారపడి ఉంటుంది. పండ్లు, కూరగాయలు, తృణధాన్యాలు, పప్పుధాన్యాలు, లీన్ ప్రోటీన్లతో కూడిన సమతుల్య ఆహారాన్ని వైద్యులు సిఫార్సు చేస్తారు. రెట్ మీట్, షుగరీ డ్రింక్స్, వేయించిన ఆహారాలు తీసుకోవడం తగ్గించండి. అలాగే మద్యపానాన్ని పరిమితం చేయండి. వ్యాయామం అత్యంత ప్రభావవంతమైన నివారణ చర్య. ప్రతిరోజూ కనీసం 30 నిమిషాలు వేగంగా నడవడం, సైక్లింగ్ లేదా ఈత కొట్టడం వంటి వ్యాయామాలు చేయండి. దీంతో గుండె దగ్గర పేరుకుపోయిన కొవ్వు గణనీయంగా తగ్గుతుంది. బరువు నియంత్రణ, రక్తపోటు, రక్తంలో చక్కెర, కొలెస్ట్రాల్‌ను సమతుల్యంగా ఉంచడం కూడా ముఖ్యం.

చికిత్స

ఫ్యాటీ హార్ట్ నిర్ధారణ అయితే, చికిత్స వ్యక్తి పరిస్థితికి అనుగుణంగా ఉంటుంది. అధిక రక్తపోటు, మధుమేహం లేదా అధిక కొలెస్ట్రాల్ వంటి సంబంధిత సమస్యలను నియంత్రించడానికి మందులు సూచించవచ్చు. తీవ్రమైన సందర్భాల్లో, గుండె పనితీరును స్థిరీకరించడానికి ప్రత్యేక చికిత్స అవసరం కావచ్చు. అయితే, చాలా మంది రోగులు స్థిరమైన జీవనశైలి మార్పులు, క్రమం తప్పకుండా వైద్య పర్యవేక్షణతో చాలా ప్రయోజనాలు పొందారు.