యూట్యూబ్ ప్రీమియం యూజర్లకు షాక్ – ఫ్యామిలీ ప్లాన్లో కఠిన రూల్స్
Andhra Pradesh Telugu | Suryaa Desk | Published : Wed, Sep 03, 2025, 09:52 PM
ప్రముఖ స్ట్రీమింగ్ ప్లాట్ఫాం యూట్యూబ్ తన ఫ్యామిలీ ప్లాన్ యూజర్లకు సంబంధించి కీలక నిర్ణయం తీసుకుంది. ఇకపై ఫ్యామిలీ ప్లాన్ సభ్యులంతా ఒకే ఇంటి నుంచి వినియోగించకపోతే ఆ ప్లాన్ను నిలిపివేస్తామంటూ హెచ్చరించింది.యూట్యూబ్ గత కొన్ని రోజులుగా దీనికి సంబంధించి యూజర్లకు మెయిల్స్ పంపుతున్నట్లు తెలుస్తోంది.పాస్వర్డ్ షేరింగ్పై ఇటీవల నెట్ఫ్లిక్స్ కఠిన చర్యలు తీసుకున్న సంగతి తెలిసిందే. అదే తరహాలో ఇప్పుడు యూట్యూబ్ కూడా తన ప్రీమియం ఫ్యామిలీ ప్లాన్ యూజర్లపై దృష్టి సారించింది. అకౌంట్ హోల్డర్తో ఒకే ఇంట్లో నివసించే వారే ఫ్యామిలీ మెంబర్స్గా ఉండాలనే షరతు ఎప్పటి నుంచో ఉన్నప్పటికీ, యూట్యూబ్ ఇప్పటివరకు దాన్ని కఠినంగా అమలు చేయలేదు. అయితే ఇప్పుడు ప్రతి 30 రోజులకు అకౌంట్ యాక్టివిటీని చెక్ చేసి, లొకేషన్ ఆధారంగా ఈ రూల్స్ను అమలు చేస్తున్నట్లు తెలుస్తోంది.ప్రస్తుతం ఈ నియమాలు కొన్ని ప్రాంతాల్లోనే కఠినంగా అమలవుతున్నాయని సమాచారం. అయితే ఏ దేశాల్లో అమలు చేస్తున్నారో యూట్యూబ్ అధికారికంగా ప్రకటించలేదు. కానీ ఇప్పటికే పలు ప్రాంతాల యూజర్లకు వార్నింగ్ మెయిల్స్ వెళ్లినట్లు వారు చెబుతున్నారు.ప్రీమియం ఫ్యామిలీ ప్లాన్ నెలకు రూ.299కి అందుబాటులో ఉన్న యూట్యూబ్ ప్రీమియం ఫ్యామిలీ ప్లాన్లో ఒక అకౌంట్ హోల్డర్ మరో ఐదుగురి సభ్యుల వరకు యాక్సెస్ షేర్ చేయవచ్చు. ఈ ప్లాన్లో భాగంగా యాడ్ ఫ్రీ వీడియోలు, బ్యాక్గ్రౌండ్ ప్లే, ఆఫ్లైన్ డౌన్లోడ్స్, అలాగే యూట్యూబ్ మ్యూజిక్ యాక్సెస్ వంటి సౌకర్యాలు లభిస్తాయి.
|
|