లంక పరువు కాపాడిన సన్‌రైజర్స్ ప్లేయర్

పాకిస్తాన్‌ను మట్టికరిపించిన తర్వాత నుంచి జింబాబ్వే జట్టులో కాన్ఫిడెంట్ పెరిగింది. తమ దేశానికి వచ్చిన ఏ జట్టును అయినా సరే చెమటలు పట్టించకుండా విడిచిపెట్టడం లేదు. ఓడిపోయినా ఆఖరి వరకూ పోరాడి ప్రత్యర్థికి గట్టి పోటీని ఇస్తుంది. శ్రీలంకతో ఇవాళ జరిగిన తొలి టీ20లో ఆల్‌మోస్ట్ గెలిచినంత పనిచేసింది. కానీ, ఆఖర్లో లంక ప్లేయర్ విధ్వంసంతో పరువు నిలిచింది.

హరారేలోని హరారే స్పోర్ట్స్ క్లబ్ వేదికగా జింబాబ్వే, శ్రీలంక మధ్య తొలి టీ20 మ్యాచ్ జరిగింది. ఈ మ్యాచ్‌లో టాస్ గెలిచిన శ్రీలంక జట్టు బౌలింగ్ ఎంచుకుని జింబాబ్వేను బ్యాటింగ్‌కి ఆహ్వానించింది. ఓపెనర్ బ్రయాన్ బెన్నెట్ తన బ్యాట్‌తో లంక బౌలర్లకు చుక్కలు చూయించాడు. 57 బంతులు ఆడిన బెన్నెట్ 12 ఫోర్లతో 81 పరుగులు చేశాడు. అతను తప్ప మిగతా బ్యాటర్లంతా విఫలమవడంతో భారీ స్కోర్ చేసే అవకాశాన్ని కోల్పోయి నిర్ణీత 20 ఓవర్లలో 7 వికెట్ల నష్టానికి 175 పరుగులు చేసింది.

జింబాబ్వే ఇచ్చిన 176 పరుగుల లక్ష్యంతో బరిలోకి దిగిన శ్రీలంకకు ఓపెనర్లు శుభారంభం అందించారు. పాతూమ్ నిస్సంక 32 బంతుల్లో 4 ఫోర్లు, 2 సిక్సర్లతో 55 పరుగులు చేయగా.. కుశాల్ మెండిస్ 35 బంతుల్లో 38 పరుగులు చేశాడు. ఆ తర్వాత ముగ్గురు బ్యాటర్లు సింగిల్ డిజిట్‌కే పెవిలియన్ బాట పట్టడంతో లంక ఓటమి ఖాయమని అందరూ అనుకున్నారు.

అదే సమయంలో కమిందు మెండిస్ 16 బంతుల్లో ఒక ఫోర్, నాలుగు సిక్సర్లతో 41 పరుగులతో నాటౌట్‌గా నిలిచి మ్యాచ్‌ని ఒంటిచేత్తో గెలిపించాడు. ఆఖరి ఓవర్ వరకూ సాగిన ఈ మ్యాచ్‌లో శ్రీలంక జట్టు మరో ఐదు బంతులు మిగిలుండగానే నాలుగు వికెట్ల తేడాతో విజయం సాధించింది. మూడు మ్యాచ్‌ల టీ20 సిరీస్‌లో శ్రీలంక 1-0తో లీడ్‌లో ఉంది. ఐపీఎల్ 2025లో కమిందు మెండిస్ సన్‌రైజర్స్ హైదరాబాద్ తరఫున ఆడాడు.

స్కోర్ వివరాలు

తొలుత బ్యాటింగ్ చేసిన జింబాబ్వే జట్టు 20 ఓవర్లలో 7 వికెట్ల నష్టానికి 175 పరుగులు చేసింది. బ్రయాన్ బెన్నెట్ 81, మరుమానీ 7. సీన్ విలియమ్స్ 14, సికందర్ రజా 28, రయాన్ బర్ల్ 17, టాషింగా ముసెకివా 11, మున్యోంగా 0, బ్రాడ్ ఎవాన్స్ 0, మాపోసా 2 పరుగులు చేశారు. శ్రీలంక బౌలర్లలో చమీరా మూడు వికెట్లు తీయగా.. తుషారా, తీక్షణ, హెమంతా తలో వికెట్ పడగొట్టారు.

శ్రీలంక బ్యాటర్లలో పాతూమ్ నిస్సంక 55, కుశాల్ మెండీస్ 38, కుశాల్ పెరీరా 4, నువనిడూ ఫెర్నాండో 7, చరితా అసలంక 1, షానక 6, కుశాల్ మెండీస్ 41 నాటౌట్, దుష్మన్ హేమంత 14 నాటౌట్‌తో 19.1 ఓవర్లలో 6 వికెట్ల నష్టానికి 177 పరుగులు చేశారు. రిచర్డ్ నగర్వా రెండు వికెట్లు పడగొట్టగా, మిగతా బౌలర్లు తలో వికెట్ తీసుకున్నారు.